1, 2. Soske i molitva tani jekh posebno poklon? Soske valjani te džana so sikavela amen i Biblija baši molitva?

AMARI Phuv tani but tikni ki sporedba e čerenjencar so isi ko nebo. Keda o Jehova dikhela ki Phuv, sa o manuša soj ki late tane sar tikni kapka pani ki jekh kofa (Psalm 115:15; Isaija 40:15). Iako siem but tikne ki sporedba e bukjencar so kergja len o Jehova ko nebo, ko Psalm 145:18, 19 pišinela: „O Jehova tano paše uzi sarinende so rodena le, uzi sarinende so rodena le iskreno. Ov ka ispolninel i želba adalengiri so darana lestar, ka šunel len keda ola rodena le hem ka spasinel len“. Kobor bari prednost isi amen! O Jehova, o semokjno Devel kova so kergja sa, mangela te ovel paše amencar hem te šunel amare molitve. Oja, i molitva tani bari prednost, jekh posebno poklon so dengja le o Jehova sekaske amendar.

² Ama, o Jehova ka šunel amare molitve samo ako molinaja amen ko način sar ov so mangela. Sar šaj te kera adava? Te dikha so vakerela i Biblija baši molitva.

3. Soske valjani te molina amen e Jehovaske?

³ O Jehova mangela te molina amen leske, ili javere lafencar, te kera lea lafi. Kotar džanaja adava? Molinaja tut čitin Filipjanite 4:6, 7. Razmislin bašo akala lafija. O Devel kova so kergja sa, but grižinela pe amenge hem mangela te vakera leske amare problemija hem sar osetinaja amen.

4. Sar adava so ka molina amen redovno e Jehovaske ka kerel amen popaše amala lea?

 ⁴ I molitva pomožinela amen te ova paše amala e Jehovaja. Keda o amala redovno kerena lafi bašo adava so mislinena, bašo ple sekiracie hem čuvstvija, tegani ola ovena panda popaše. Slično tano amencar hem e Jehovaja. Preku i Biblija, o Jehova vakergja amenge but bukja baši peste, hem isto agjaar vakerela amenge so ka kerel ki idnina. Amen šaj te vakera leske čak amare najhor čuvstvija adalea so redovno ka kera lea lafi ki molitva. Keda keraja adava, ka ova panda popaše amala e Jehovaja (Jakov 4:8).

5. Kotar džanaja kaj o Jehova na šunela sa o molitve?

⁵ Dali o Jehova šunela sa o molitve? Na, na šunela. Ko purano vreme, o Jehova vakergja e Izraelconge: „Vakerena but molitve, ama me na šunava — tumare vasta tane pherde ratea“ (Isaija 1:15). Ako na pazinaja, šaj te kera bukja kola so mrzinela len o Jehova hem tegani ov nane te šunel amare molitve.

6. Soske tano but važno te ovel amen vera? Sar šaj te sikava amari vera?

 ⁶ Ako mangaja o Jehova te šunel amare molitve, mora te ovel amen vera ki leste (Marko 11:24). O apostol Pavle vakergja: „Bizi vera našti te ugodina e Devleske, soske okova so mangela te avel paše dži leste mora te verujnel kaj ov postojnela hem kaj nagradinela okolen so iskreno rodena le“ (Evreite 11:6). Ama, nane dovolno samo te vakera kaj verujnaja ko Devel. Valjani te sikava amari vera, agjaar so ka kera adava so mangela o Jehova sekova dive. (Čitin Jakov 2:26.)

7. a) Soske valjani te ova ponizna hem te sikava kaj poštujnaja e Jehova keda molinaja amen leske? b) Sar šaj te sikava kaj siem iskrena keda molinaja amen?

⁷ Amen valjani te ova ponizna hem te sikava kaj poštujnaja e Jehova keda molinaja amen leske. Soske? Pa, ako keraja lafi nesave carea ili pretsedatelea, ka kera lafi ko način so sikavela kaj poštujnaja le. O Jehova tano Semokjno Devel, adaleske na valjani li te sikava panda pobaro poštovanje hem poniznost keda keraja lea lafi? (1. Mojseeva 17:1; Psalm 138:6). Isto agjaar, valjani te ova iskrena hem te molina amen taro vilo, na valjani samo te povtorina sa ista lafija (Matej 6:7, 8).

8. Keda molinaja amen bašo nešto, so valjani te kera?

⁸ Keda molinaja bašo nešto, tegani valjani te da sa amendar te kera agjaar sar so molingjem amen. Na primer, šaj molinaja amen e Jehovaske bašo bukja so valjanena amenge sekova dive. Ama, na valjani te ova mrzale hem samo te adžikera o Jehova te del amen sa so valjani amenge. Valjani te trudina amen te kera buti hem te prifatina sekoja buti so šaj te kera la (Matej 6:11; 2. Solunjanite 3:10). Ili, ako molinaja e Jehova te pomožinel amenge te čhinava nesave lošna bukjencar, tegani mora te cida amen taro situacie so šaj  te čhiven amen ko iskušenie (Kološanite 3:5). Te dikha nekobor pučiba baši molitva.

9. Kaske valjani te molina amen? So sikljovaja taro Jovan 14:6 baši molitva?

⁹ Kaske valjani te molina amen? O Isus sikavgja ple učenikon te molinen pe e Devleske kova soj ko nebo (Matej 6:9). Ov isto agjaar vakergja lenge: „Me sium o drumo, o čačipe hem o životo. Nikoj našti te avel dži ko Dad, osven preku mande“ (Jovan 14:6). Amen valjani te molina amen e Jehovaske preku o Isus. So značinela te molina amen preku o Isus? Te šaj o Jehova te prifatinel amare molitve, amen valjani te sikava kaj ceninaja i posebno uloga so dengja o Jehova e Isuseske. Sar so siklilem, o Isus alo ki Phuv te spasinel amen taro grevo hem taro meribe (Jovan 3:16; Rimjanite 5:12). O Jehova biringja e Isuse te ovel Prvosvešteniko preku kaste so šaj te prostinen pe amare grevija. Ov isto agjaar biringja le te ovel Sudija (Jovan 5:22; Evreite 6:20).

10. Dali valjani te ova ki nesavi posebno položba keda molinaja amen? Objasnin.

¹⁰ Dali valjani te ova ki nesavi posebno položba keda molinaja amen? Na, o Jehova na rodela amendar te pera ko kočaka, te beša ili te tergjova keda molinaja amen. Tari Biblija džanaja kaj šaj te molina amen e Jehovaske ki bilo koja položba kolaja so ka sikava kaj poštujnaja le (1. Letopisi 17:16; Neemija 8:6; Daniel 6:10; Marko 11:25). E Jehovaske tano najvažno keda molinaja amen te sikava poštovanje hem amare lafija te oven taro vilo, a na ki savi položba siem džikote molinaja amen. Šaj te molina amen ko glaso ili ki amende, bilo kote te ova hem ko bilo savo vreme, sajekh dali diveskoro ili rakjate. Keda molinaja amen e Jehovaske, šaj te ova sigurna  kaj ov ka šunel amen, čak keda nijekh javer našti te šunel amen (Neemija 2:1-6).

11. Bašo kola bukja šaj te molina amen?

¹¹ Bašo so šaj te molina amen? Šaj te molina amen bašo sa soj prifatlivo e Jehovaske. I Biblija vakerela: „Bilo so te roda, ako i sprema leskiri volja, ov šunela amen“ (1. Jovanovo 5:14). Šaj li te molina amen bašo amare lična bukja? Oja. I molitva valjani te ovel sar keda keraja lafi jekhe paše amalea. E Jehovaske šaj te vakera sa so mislinaja hem sa so pašljola amenge ko vilo (Psalm 62:8). Šaj te molina le te del amel plo sveti duh kova so ka pomožinel amenge te kera adava soj šukar (Luka 11:13). Isto agjaar, šaj te roda lestar mudrost te šaj te ana šukar odluke, hem sila te ikljova ko krajo e problemencar (Jakov 1:5). Valjani te molina e Jehova te prostinel amare grevija (Efešanite 1:3, 7). Isto agjaar, valjani te molina amen e javerenge da, sar na primer amare familijake hem amare phralenge hem phenjenge taro sobranie (Dela 12:5; Kološanite 4:12).

12. So valjani te ovel amenge najvažno keda molinaja amen?

¹² So valjani te ovel amenge najvažno keda molinaja amen? O Jehova hem leskiri volja. Valjani vilestar te vakera leske kaj but ceninaja sa so kergja amenge (1. Letopisi 29:10-13). Akava džanaja adaleske so o Isus sikavgja ple učenikon sar te molinen pe. (Čitin Matej 6:9-13.) Ov vakergja kaj prvo valjani te molina amen te slavinel pe e Devleskoro sveto anav. Dujto, valjani te molina amen te avel e Devleskoro Carstvo hem e Jehovaskiri volja te kerel pe ki celo Phuv. Keda vakergja akala duj važna bukja, palo adava o Isus vakergja kaj šaj te molina amen bašo amare lična potrebe. Keda ko amare molitve ko prvo than tano o Jehova hem leskiri volja, sikavaja soj amenge najvažno.

13. Kobor bare valjani te oven amare molitve?

 ¹³ Kobor bare valjani te oven amare molitve? I Biblija na vakerela amenge kobor bare valjani te oven o molitve. Ola šaj te oven tikne ili bare, zavisinela tari situacija. Na primer, šaj te vakera tikni molitva angleder te ha maro, a bari keda mangaja te blagodarina e Jehovaske ili keda mangaja te vakera leske nešto so mučinela amen (1. Samoilova 1:12, 15). Na mangaja te vakera bare molitve samo te  sikava amen anglo javera, sar so kerena sine nesave manuša ko vreme e Isuseskoro (Luka 20:46, 47). E Jehovaske asavke molitve na vredinena. Leske tano važno keda molinaja amen taro vilo.

14. Kobor često valjani te molina amen, hem so sikavela amenge adava bašo Jehova?

¹⁴ Kobor često valjani te molina amen? O Jehova mangela redovno te kera lea lafi ki molitva. Ki Biblija pišinela kaj valjani „te ova istrajna ki molitva“, „sekogaš te molina amen“, hem te vakera „molitve dive hem rat“ (Rimjanite 12:12; 1. Solunjanite 5:17; 1. Timotej 5:5). Akava sikavela amenge kaj o Jehova tano sekogaš spremno te šunel amen. Sekova dive šaj te blagodarina leske bašo leskoro mangipe hem bašo adava so dela amen but bukja. Isto agjaar, šaj te roda lestar te vodinel amen, te del amen sila hem  uteha. Ako čače ceninaja adava so šaj te molina amen e Jehovaske, tegani ka koristina sekoja prilika te kera lea lafi ki molitva.

15. Soske ko krajo tari molitva valjani te vakera „amin“?

¹⁵ Soske valjani te vakera „amin“ ko krajo tari molitva? O lafi „amin“ značinela „agjaar tano“ ili „agjaar te ovel“. Adalea sikavaja kaj čače mangaja te ovel agjaar sar so vakergjem ki molitva (Psalm 41:13). I Biblija sikavela amen kaj tano šukar ko krajo tari molitva te vakera „amin“, sajekh dali ki amende ili ko glaso. Isto agjaar, keda molinena pe o javera da valjani te vakera „amin“, soske agjaar sikavaja kaj soglasinaja amen adalea so sine vakerdo ki molitva (1. Letopisi 16:36; 1. Korinkjanite 14:16).

16. Dali o Jehova čače odgovorinela ko amare molitve? Objasnin.

¹⁶ Dali o Jehova čače odgovorinela ko amare molitve? Oja, odgovorinela. Ki Biblija pišinela kaj ov tano „adava so šunela o molitve“ (Psalm 65:2). O Jehova šunela bute manušengere iskrena molitve, hem odgovorinela lenge ko različno način.

17. Sar o Jehova koristinela e angelen hem ple slugen ki Phuv te šaj te odgovorinel ko amare molitve?

¹⁷ O Jehova koristinela e angelen hem ple slugen ki Phuv te šaj te odgovorinel ko amare molitve (Evreite 1:13, 14). Isi but iskustvija taro manuša so molingje pe te haljoven i Biblija ili pošukar te pendžaren e Devle hem kratko palo adava, ale ki lende e Jehovaskere svedokija. Asavke iskustvija sikavena amenge kaj o angelija pomožinena te vakerel pe „o šukar haberi“ ko celo sveto. (Čitin Otkrovenie 14:6.) Isto agjaar, but džene amendar molingjem amen bašo nesavo problemi ili bašo nešto so valjangja  amenge, hem palo adava dobingjem pomoš taro amare duhovna phralja hem phenja (Izreki 12:25; Jakov 2:16).

18. Sar o Jehova koristinela plo sveti duh hem i Biblija te šaj te odgovorinel ko amare molitve?

¹⁸ O Jehova koristinela plo sveti duh te šaj te odgovorinel ko amare molitve. Keda molinaja te pomožinel amen te ikljova ko krajo nesave problemea, ov šaj te koristinel plo sveti duh agjaar so ka vodinel amen hem ka del amen sila (2. Korinkjanite 4:7). O Jehova isto agjaar preku i Biblija odgovorinela ko amare molitve hem pomožinela amen te ana mudra odluke. Keda čitinaja i Biblija, tegani šaj te arakha stihija kola so ka pomožinen amenge. Isto agjaar, o Jehova šaj te koristinel nekas keda komentirinela ko sostanok te vakerel nešto so baš amenge valjani ili jekhe starešina ko sobranie te vakerel amenge nesavi misla tari Biblija (Galatite 6:1).

19. Soske nekogaš šaj te izgledinel amenge kaj o Jehova na odgovorinela ko amare molitve?

¹⁹ Ponekogaš, šaj pučaja amen: „Soske panda o Jehova na odgovorinela ko mle molitve?“ Ma te bistra kaj ov džanela keda hem sar te odgovorinel ko amare molitve. Ov najšukar džanela so valjani amenge. Šaj baši nesavi buti ka valjani te molina amen poviše puti soske agjaar ka sikava kaj čače mangaja adava so rodaja taro Jehova hem kaj čače isi amen vera ki leste (Luka 11:5-10). Ponekogaš o Jehova odgovorinela ko amare molitve, ama na ko način sar amen so mislinaja. Na primer, šaj molinaja amen baši jekh phari situacija, ama namesto te rešinel o problemi, o Jehova ka del amen sila. (Čitin Filipjanite 4:13.)

20. Soske valjani često te molina amen e Jehovaske?

²⁰ Bari čest isi amen so šaj te molina amen e Jehovaske! Šaj te ova sigurna kaj ov ka šunel amen (Psalm 145:18). Kobor počesto molinaja amen e Jehovaske taro vilo, doborom popaše ovaja lea.