OFTOTO POGLAVJE
Soj tano e Devleskoro Carstvo?
1. Baši koja molitva ka kera lafi?
BUT manuša džanena i molitva so vakergja la o Isus ki jekh prilika. Oj tani pendžardi sar Očenaš. O Isus koristingja akaja molitva te sikavel ple učenikon sar te molinen pe. Bašo so molingja pe ov? Soske akaja molitva amenge tani važno avdive?
2. Bašo kola trin bukja o Isus vakergja te molina amen?
2 O Isus vakergja: „Znači, molinen tumen agjaar: ,Amaro Dad so sian ko nebo, te slavinel pe tlo sveto anav. Te avel tlo Carstvo. Te ovel tli volja, sar ko nebo agjaar ki phuv‘“. (Čitin Matej 6:9-13.) Soske o Isus sikavgja amen te molina amen bašo akala trin bukja? (Dikh i 20 fusnota.)
3. So ka sikljova bašo e Devleskoro Carstvo?
3 Amen siklilem kaj e Devleskoro anav tano Jehova. Isto agjaar, kergjem lafi koja tani e Devleskiri volja e manušencar hem e Phuvjaja. Ama, so mislingja o Isus keda vakergja: „Te avel tlo Carstvo“? Akana ka sikljova soj tano e Devleskoro Carstvo, so ka kerel ov, hem sar ka anel dži ko adava te slavinel pe e Devleskoro anav.
SOJ TANO E DEVLESKORO CARSTVO?
4. Soj tano e Devleskoro Carstvo hem koj tano leskoro Cari?
4 O Jehova kergja jekh vlada ko nebo hem biringja e Isuse te ovel Cari. I Biblija vakerela kaj akaja vlada vikinela pe e Devleskoro Carstvo. O Isus tano „Cari upro carija hem Gospodari upro gospodarija“ (1. Timotej 6:15). O Isus šaj te kerel but pošukar bukja taro sekova manušikano vladeteli, hem ov tano but posilno taro sa o vladetelija zaedno.
5. Kotar ka vladinel e Devleskoro Carstvo? Upro so ka vladinel?
5 Saranda dive palo leskoro voskresenie, o Isus irangja pe ko nebo. Palo nesavo vreme, o Jehova kergja le Cari ko Carstvo (Dela 2:33). E Devleskiri vlada taro nebo ka vladinel upri Phuv (Otkrovenie 11:15). Adaleske i Biblija bašo e Devleskoro Carstvo vakerela kaj tano „nebesno carstvo“ (2. Timotej 4:18).
6, 7. Soske o Isus tano pošukar taro bilo kova manušikano vladeteli?
6 I Biblija vakerela kaj o Isus tano pobaro taro bilo kova manušikano cari soske ov „tano edinstveno so isi le besmrtnost“ (1. Timotej 6:16). Sa o manušikane vladitelija merena, ama o Isus nane nikogaš te merel. Sa o šukar bukja so ka kerel len ov, ka ačhoven zasekogaš.
7 O proroštvija tari Biblija vakerena kaj o Isus ka ovel pravedno hem sočuvstvitelno Cari. Ki late vakerela pe baši leste: „E Jehovaskoro duho ka ovel upri leste. Adaleske ov ka ovel mudro, but šukar ka haljovel o bukja, ka del šukar sovet, ka ovel zoralo, ka džanel but bukja, hem but ka poštujnel e Jehova. Ov ka uživinel but te poštujnel e Jehova. Nane te sudinel sprema adava so dikhela, ni nane te del sovet sprema adava so šunela. Ov pravedno ka sudinel e čorolenge“ (Isaija 11:2-4). Mangea li te ovel tut asavko cari?
8. Kotar džanaja kaj o Isus nane te vladinel korkori?
8 O Devel biringja nesave manušen te vladinen e Isusea ko nebo. Na primer, o apostol Pavle vakergja e Timoteeske: „Ako izdržinaja, amen da ka vladina lea sar carija“ (2. Timotej 2:12). Kobor džene ka vladinen e Isusea sar carija?
9. Kobor džene ka vladinen e Isusea? Keda počmingja o Devel te birinel len?
9 Sar so dikhlem ko eftato poglavje, o apostol Jovan ki vizija dikhlja e Isuse sar Cari ko nebo hem lea 144.000 javera carija. Koj tane akala 144.000? O Jovan vakergja kaj len „isi len e [Isuseskoro] anav hem o anav leskere Dadeskoro pišimo ko lengoro čekat“. Ov isto agjaar vakergja: „Ola džana palo Bakhro [adava tano o Isus] kote bilo te džal. Ola tane kinde taro manuša“. (Čitin Otkrovenie 14:1, 4.) O 144.000 tane verna hristijanja so biringja len o Devel „te vladinen sar carija upri phuv“ zaedno e Isusea. Keda merena, ola voskresninena te živinen ko nebo (Otkrovenie 5:10). Panda taro vreme e apostolengoro, o Jehova birinela sine verno hristijanen te oven delo taro akala 144.000 carija.
10. Sar o Jehova sikavgja kaj grižinela pe amenge adalea so biringja e Isuse hem e 144.000 dženen te vladinen upro manuša?
10 Adava so ka vladinen manuša e Isusea sikavela kobor but o Jehova grižinela pe amenge. O Isus ka ovel šukar vladeteli adaleske so haljovela amen. Ov džanela sar tano te ove manuš hem te ovel tut muke. O Pavle vakergja kaj o Isus džanela sar amen osetinaja amen, ov šaj „te haljovel amare slabostija“ hem „sine iskušimo ko sa sar amende“ (Evreite 4:15; 5:8). Isto agjaar o 144.000 džanena sar tano te ove manuš. Ola da sine nesovršena hem borinena pe sine nasvalipaja. Adaleske šaj te ova sigurna kaj o Isus hem o 144.000 ka haljoven sar osetinaja amen hem save problemencar valjani te ikljova ko krajo.
SO KA KEREL E DEVLESKORO CARSTVO?
11. Soske o Isus sikavgja ple učenikon te molinen pe e Devleskiri volja te kerel pe ko nebo?
11 O Isus sikavgja ple učenikon te molinen pe e Devleskiri volja te kerel pe ko nebo. Soske vakergja lenge agjaar? Ko trinto poglavje siklilem kaj o Beng protivingja pe e Jehovaske. Palo adava, o Jehova dozvolingja leske hem e angelenge so na sine verna, o demonija, te ačhoven nesavo vreme ko nebo. Adaleske šaj te vakera kaj sarine ko nebo na kerena sine e Devleskiri volja. Ko dešto poglavje ka dikha nešto pobuter bašo Beng hem bašo demonija.
12. Kola duj važna bukja tane vakerde ko Otkrovenie 12:10?
12 Keda o Isus ka ovel Cari ko e Devleskoro Carstvo, i Biblija vakerela kaj kratko palo adava ov ka počminel vojna protiv o Satana. (Čitin Otkrovenie 12:7-10.) O 10 stiho vakerela amenge bašo duj važna bukja. Prvo, kaj e Devleskoro Carstvo počminela te vladinel hem o Isus tano Cari, hem dujto, kaj o Satana tano frdimo taro nebo tele ki Phuv. Ponadari ka sikljova kaj akala bukja čače ule.
13. So ulo ko nebo keda o Satana sine frdimo?
13 I Biblija vakerela kobor sine bahtale o verna angelija keda o Beng hem leskere demonija sine frdime taro nebo. Ki late pišinela: „Neka radujnel pe o nebo hem sarine so živinena ki leste!“ (Otkrovenie 12:12). Ko nebo akana isi mir hem sloga soske sarine kerena e Devleskiri volja.
Keda o Satana hem leskere demonija sine frdime taro nebo, ki Phuv počmingje te oven but muke. Akale mukenge panda hari ka avel krajo
14. Kola bukja ule ki Phuv adaleske so o Satana sine frdimo taro nebo?
14 Ama, o životo ki Phuv tano but pojaver. Ule but lošna bukja „soske o Beng hulilo tele“, hem ov „but tano holjamo, džanela kaj isi le hari vreme“ (Otkrovenie 12:12). O Satana tano pherdo holjaja. Ov sine frdimo taro nebo hem džanela kaj panda hari ka ovel uništimo. Ov kerela sa te šaj te oven problemija, dukha hem muke ko celo sveto.
15. Savi tani e Devleskiri namera e Phuvjaja?
15 E Devleskiri namera e Phuvjaja na meningja pe. Ov panda mangela te živinen sovršena manuša zasekogaš ko raj ki Phuv (Psalm 37:29). Sar e Devleskoro Carstvo ka kerel te ovel akava?
16, 17. So vakerela amenge o stiho taro Daniel 2:44 bašo e Devleskoro Carstvo?
16 O proroštvo soj tano pišimo ko Daniel 2:44 vakerela: „Ko dive adale carengere, o nebesno Devel ka vazdel carstvo kova so nikogaš nane te ovel uništimo. Hem adava carstvo nane te del pe javere narodoske. Ov ka uništinel hem ka čhinavel sa o javera carstvija, a korkori ov ka ačhovel zasekogaš“. So sikavela amen akava proroštvo bašo e Devleskoro Carstvo?
17 Prvo, vakerela amenge kaj e Devleskoro Carstvo ka počminel te vladinel „ko dive adale carengere“. Adava značinela kaj keda ka počminel te vladinel e Devleskoro Carstvo, ki Phuv panda ka postojnen javera vlade. Dujto, vakerela amenge kaj e Devleskoro Carstvo ka ačhovel zasekogaš hem nikogaš nane te ovel smenimo javere vladaja. Hem trito, ka ovel vojna maškar e Devleskoro Carstvo hem o vlade akale svetoskere. E Devleskoro Carstvo ka pobedinel hem ka ovel edinstveno vlada so ka vladinel upri Phuv. Tegani, upro manuša ka vladinel i najšukar vlada so šaj te ovel.
18. Sar vikinela pe i vojna so ka ovel maškar e Devleskoro Carstvo hem o vlade akale svetoskere?
18 Sar e Devleskoro Carstvo ka počminel te vladinel upri Phuv? Angleder i posledno vojna, so vikinela pe Armagedon, o demonija ka hovaven „e caren taro celo sveto te kheden len baši vojna so ka ovel ko baro dive e Devleskoro kova soj Semokjno“. Oja, o manušikane vlade ka borinen pe protiv e Devleskoro Carstvo (Otkrovenie 16:14, 16). (Dikh i 10 fusnota.)
19, 20. Soske valjani amenge e Devleskoro Carstvo te vladinel upri Phuv?
19 Soske valjani amenge e Devleskoro Carstvo? Isi najhari trin pričine. Prvo, amen siem grešna, adaleske nasvaljovaja hem meraja. Ama, i Biblija vakerela kaj amen ka živina zasekogaš keda ka vladinel e Devleskoro Carstvo. Ko Jovan 3:16 vakerela: „O Devel doborom but manglja o sveto so dengja ple edinstveno bijame Čhave, te šaj sekoj so ka verujnel ki leste te na ovel uništimo, nego večno te živinel“.
20 Dujto pričina soske valjani amenge e Devleskoro Carstvo tani soske živinaja ko sveto kote so isi lošna manuša. But džene hovavena hem tane nemoralna. Amen našti te promenina adava, ama o Devel šaj. O manuša so kerena lošna bukja ka oven uništime ko Armagedon. (Čitin Psalm 37:10.) I trito pričina soske valjani amenge e Devleskoro Carstvo tani kaj o manušikane vlade tane lošna, surova hem rumime. Ola na pomožinena e manušenge te šunen e Devle. I Biblija vakerela kaj „o manuš vladinela upro manuš ki leskiri šteta“ (Propovednik 8:9).
21. Sar e Devleskoro Carstvo ka anel dži ko adava te kerel pe e Devleskiri volja ki celo Phuv?
21 Palo Armagedon, e Devleskoro Carstvo ka anel dži ko adava te kerel pe e Devleskiri volja ki celo Phuv. Na primer, ka cidel e Satana hem leskere demonen (Otkrovenie 20:1-3). Nikoj nane te nasvaljovel ili te merel. Adaleske so isi otkupnina, sa o verna manuša ka oven len prilika te živinen zasekogaš ko Raj (Otkrovenie 22:1-3). O Carstvo ka slavinel e Devleskoro sveto anav. So značinela akava? Akava značinela kaj keda e Devleskiri vlada ka vladinel upri Phuv, sa o manuša ka falinen e Devleskoro anav. (Dikh i 21 fusnota.)
KEDA O ISUS ULO CARI?
22. Kotar džanaja kaj o Isus na ulo Cari keda sine ki Phuv ili odma keda voskresningja?
22 O Isus sikavgja ple učenikon te molinen pe: „Te avel tlo Carstvo“. Jasno sine kaj e Devleskoro Carstvo valjani te avel ki idnina. O Jehova valjani sine prvo te vospostavinel pli vlada hem te kerel e Isuse Cari. Dali o Isus ulo odma cari keda irangja pe ko nebo? Na, ov valjangja te adžikerel. Palo nesavo vreme keda voskresningja o Isus, o Petar hem o Pavle vakergje kaj o proroštvo taro Psalm 110:1 ispolningja pe upro Isus. Ko akava proroštvo o Jehova vakerela: „Beš tari mli desno strana sa džikote na čhivava tle dušmanen telo tle pre“ (Dela 2:32-35; Evreite 10:12, 13). Kobor vreme valjangja o Isus te adžikerel o Jehova te kerel le Cari?
E Devleskoro Carstvo ka anel e Devleskiri volja te kerel pe ki celo Phuv
23. a) Keda o Isus počmingja te vladinel sar Cari ko e Devleskoro Carstvo? b) So ka dikha ko javer poglavje?
23 But berša angleder 1914 berš, jekh grupa taro iskrena hristijanja halile kaj ko adava berš ka ispolninel pe važno biblisko proroštvo. O bukja so ovena ko sveto taro 1914 berš sikavgje kaj ola tane ko pravo. O Isus adava berš počmingja te vladinel sar Cari (Psalm 110:2). Palo adava, o Satana sine frdimo tele ki Phuv hem akana „isi le hari vreme“ (Otkrovenie 12:12). Ko javer poglavje ka dikha poviše dokazija kaj amen živinaja ko adava vreme. Isto agjaar, ka dikha kaj panda hari e Devleskoro Carstvo ka anel te kerel pe e Devleskiri volja ki celo Phuv. (Dikh i 22 fusnota.)
