O Jehova vetingja: „Nane poviše te ovel rojbe, dukha, nasvalipe, ni meribe. Ka kosav o asva taro e manušengere jakhja. Nikoj nane te setinel pe ko lošna bukja so sine poangle“.

Ko početok, o Jehova kergja e Adameske hem e Evake jekh rajsko gradina te šaj te živinen srekjno hem ko mir. Ola valjani sine te služinen e Devleske hem te pheren i Phuv čhavencar. O Adam hem i Eva na šungje e Jehova, ama leskiri namera na meningja pe. Ko akava lil dikhlem kaj sa so vetingja o Devel ispolningja pe. Keda ka vladinel e Devleskoro Carstvo ki Phuv, ka anel bare blagoslovija, sar so vetingja e Avraameske.

Panda hari, o Satana, o demonija hem o lošna manuša nane više te oven. Tegani sarine ka služinen samo e Jehovaske. Nane te ova nasvale hem nane te mera. Ka ovel amen bari sila hem ka radujna amen so siem dživde sekova dive. I Phuv ka ovel raj.  Sekoj ka ovel le šukar hajbe hem plo kher. O manuša nane te oven lošna hem nasilna, nego šukar hem ljubezna. Nane te dara taro diva životne, ama ola da nane te daran amendar.

Ka ovel amenge but interesno keda o Jehova ka počminel te voskresninel e mulen. Tegani ka šaj te zapoznajna e manušen taro purano vreme, sar soj o Avel, o Noe, o Avraam, i Sara, o Mojsej, i Rut, i Estira hem o David. Zaedno lencar, ka kera i Phuv te ovel raj. Ka oven but interesna bukja so ka kera len sekova dive.

O Jehova mangela tu da te ove adathe. Tegani ka šaj te pendžare le panda pošukar. Adaleske, te ova sa popaše amala e Jehovaja, akana hem zasekogaš!