O PEKAMBERIJA ko purano vreme sikavgje vera ko Devel. Ola verunjgje ko adava so o Devel vetingja hem dživdinena sine agjaar. So vetingja lenge ov?

Keda o Ademi hem i Hava grešingje, o Devel vetingja kaj ka čhivel nekas te zgmečinel e „sapeskoro“ šero kova tano pendžardo sar „o baro ažderi, o najpurano sap, kova so vikinela pe Beng hem Satana“, hem agjaar ka uništinel le zasekogaš (1. Mojseeva 3:14, 15; Otkrovenie 12:9, 12). Kas ka čhivel o Devel te kerel adava?

Palo 2.000 berša sar so vakergja akava prvo proroštvo, o Jehova vetingja e Ibrahimeske kaj okova so ka pherel o proroštvo ka avel taro leskoro potomstvo. O Devel vakergja e Ibrahimeske: „Preku tlo potomstvo ka ovel blagoslovimo sa o narodo ki phuv adaleske so šungjan mo glaso“ (1. Mojseeva 22:18).

Ko 1473 berš angleder amari era, o Devel e Musaske vakergja panda nesave bukja bašo „potomstvo“. O Musa vakergja e Izraelconge: „O Jehova, tumaro Devel, ka vazdel proroko maškar tumende, taro tumare phralja, asavko proroko sar so sium me. Le šunen le!“ (5. Mojseeva 18:15). Isto sar o Musa, akava da pekamberi valjani te avel taro e Ibrahimeskere čhave.

Akava pekamberi ka ovel baro cari hem isto agjaar ka ovel potomco e Dauteskoro kova so sine cari. O Devel vetingja e careske e Dauteske: „Ka vazdav pali tute čhavo taro tlo potomstvo... me ka kerav o prestol taro leskoro carstvo te ačhol zasekogaš“ (2. Samoilova 7:12, 13). O Devel isto agjaar vakergja kaj adava potomco e Dauteskoro ka vikinel pe „Princo e Mireskoro“. Baši leste i vakerdo: „Leskiri vlast dur ka buvljol, o mir ko e  Davideskoro prestol hem ko leskoro carstvo nane te ovel le krajo, te šaj zorale te tergjol hem te ikerel pe ki pravda hem ki pravednost, taro akana hem sa e vekonge“ (Isaija 9:6, 7). Oja, adava pravedno Vodači ki celi Phuv ka anel mir hem pravda. Ama keda ov ka avel?

O meljaiko o Džebraili (Gabriel) vakergja e Devleskere pekambereske e Danieleske: „Valjani te džane hem te haljove kaj taro vreme keda ka ikljol o lafi palem te kerel pe hem palem te gradinel pe o Erusalim, pa dži ko Mesija o Vodači, ka nakhen efta kurke, hem panda šovardešuduj kurke“ (Daniel 9:25). Ko akava proroštvo jekh kurko nane efta dive nego efta berša. Znači o 69 kurke tane 483 berša. Ola počmingje taro 455 berš angleder amari era, a završingje ko 29 berš amari era. *

Dali alo čače ko 29 berš amari era o Mesija, o adžikerdo „potomstvo“, o pekamberi sar o Musa? Ajde te dikha.