O DEVEL angleder vakergja kaj ka čhivel e Mesija sar Vodači sa e narodonge. O Devel džanela savo vodači čače valjani e manušenge hem biringja e najšukar Vodače. Sar savo Vodači sikavgja pe o Mesija? Silno generali? Sposobno političari? Gogjaver filozofi? E Devleskoro Lafi vakerela kaj o Mesija sine o Isa, pekamberi kova so sine but pojaver taro sa o javera (Matej 23:10).

O Devel kergja o Isa te bijangjovel sovršeno, bizo grevo. O Isa ačhilo verno sekova puti keda o Beng iskušingja le. Pe lafencar hem adalea so kergja, o Isa najšukar sikavgja sar o Devel sovršeno koristinela pi sila hem sikavgja e Devleskiri pravda, mudrost hem mangipe. Te dikha so šaj te sikljova taro leskoro primer.

O Isa koristingja i sila so dengja le o Devel te pomožinel e javerenge. Ov čače grižinela pe sine e manušenge hem but mangela sine te koristinel pi sila te del len adava so valjani lenge. Ov vakergja: ,Žal mange e manušenge, soske nane len so te han‘ (Marko 8:2). Tegani o Isa kergja čudo hem parvargja e manušen so ale te šunen le.

O Isa isto agjaar gelo ko but thana te sikavel e manušen hem ,te sasljarel len taro sekova nasvalipa‘ (Matej 4:23). Adaleske šaj te haljova soske but džene džana sine pali leste hem „rodena sine te pipinen le, soske lestar ikljola sine sila hem sasljarela sine sarinen“ (Luka 6:19). Oja, o Isa „na alo te služinen leske, nego te služinel hem te del po dživdipe sar otkupnina bute dženenge“ (Matej 20:28). * Kobor manušikane vodačija tane spremna te keren sa akava e javerenge?

Ov sikavgja e Devleskiri pravda. O Isa ikerela sine e Devleskoro pišimo zakon. Ov džanlja soske o Devel dengja o zakon hem sekogaš kerela sine adava so ov rodela, čak keda na sine pišimo zakon baši nesavi situacija. Sar so sine angleder vakerdo ko e Devleskoro Lafi, ov dživdinela sine sprema o lafija: „But mangava te kerav ti volja, Devla, hem to zakon tano hor ki mande“ (Psalm 40:8). Isto sar o Devel, o Isa poštunjela sine e manušen hem na kerela sine razlika maškar lende — bilo te oven čorole ili barvale, murša ili džuvlja, tikne ili bare. Jekh puti, e Isaskere učenikija vakergje e manušenge te na anen pumare čhaven ko Isa. Ama o Isa vakergja: „Mukhen e čhaven te aven ki mande, ma čhinaven len, soske asavkenge tano dendo e Devleskoro Carstvo“ (Marko 10:14).

Ov sikavgja i mudrost so avela taro Devel. O Isa but šukar haljovela sine e manušen. „Ov korkori džanela sine so isi e manuše ko vilo“ (Jovan 2:25). Keda e Isaskere dušmanja bičhalgje disave manušen te phanden le, čak ola da vakergje: „Nijekh manuš na kergja lafi agjaar“. Kotar e Isaske asavki mudrost? O Isa vakergja: „Adava so sikavava e manušen nane  mandar, nego avela okolestar so bičhalgja ma“ (Jovan 7:16, 46).

Ov sikavgja e Devleskoro mangipe. E Isaske perela sine žal e manušenge. Jekh manuš so sine nasvalo tari lepra molingja le: „Gospodare, ako mangea, šaj te čistine ma“. O Isa žalingja le hem „pružingja po vas, pipingja le hem vakergja leske: ,Mangava, ov čisto!‘ Hem i lepra sigate našavdili lestar“ (Luka 5:12, 13; Marko 1:41, 42). O Isa čače manglja te lokhjarel adale manušeskere dukha.

Dali o Isa grižinela pe tuke da? Ov vakerela: „Aven ki mande, sarine so sien umorna hem so isi tumen pharipe, me ka dav tumen sila. Len mo jarem upri tumende hem sikljoven mandar, soske me sium krotko hem ponizno ko vilo, hem ka ovel tumen nevi sila“ (Matej 11:28, 29).

O Isa tano najšukar Vodači so šaj te ovel amen. Adaleske ov ohrabrinela amen: „Sikljoven mandar“. Ka prifatine li akaja pokana dendi taro vilo? Ako prifatingjan akaja pokana, ka ove bahtalo.