6 LEKCIJA
Soske o Devel kergja i Phuv?
O DEVEL kergja i Phuv te ovel sovršeno than kote so ka dživdinen o manuša. Ko leskoro Lafi tergjola: „O nebo tano e Jehovaskoro, a i phuv dengja la e manušengere čhavenge“ (Psalm 115:16).
Angleder te kerel e prvo manuše, e Ademe (Adame), o Devel ko jekh tikno than tari Phuv kergja jekh šuži gradina hem dengja la anav Eden. E Devleskoro Lafi vakerela kaj i len Eufrat hem i len Tigar (Hidekel) thavdena sine taro Eden. * Avdive mislinela pe kaj i gradina Eden arakhljola sine ko avdisutno istočno Khoranipe. Oja, o Eden čače postonjela sine ki Phuv!
O Devel kergja e Ademe hem čhivgja le ki gradina Eden „te kerel buti hem te arakhel la“ (1. Mojseeva 2:15). Palo adava, o Devel kergja e Ademeske jekh romni, e Hava (Eva) hem dengja len zapoved: „Te ovel tumen pherdo čhave hem te oven but džene, pheren i phuv hem vladinen laja“ (1. Mojseeva 1:28). Znači, o Devel „na kergja i phuv bizi cel, nego kergja la te dživdinel pe ki late“ (Isaija 45:18).
Ama o Ademi hem i Hava, protivingje pe e Devleske hem namerno na šungje leskoro zakon. Adaleske o Devel paldingja len taro Eden. Agjaar ola našti sine pobuter te dživdinen ko adava dženeti. I šteta taro e Ademeskoro grevo tani bari. E Devleskoro Lafi vakerela amenge: „Preku jekh manuš khuvgja o grevo ko sumnal hem preku o grevo o meribe, hem agjaar o meribe širingja pe ko sa o manuša, soske sarine grešingje“ (Rimjanite 5:12).
Dali o Jehova otkažingja pe adalestar so manglja te kerel panda taro početok — celi Phuv te ovel dženeti hem ki late te dživdinen bahtale manuša? Na! Ov vakerela: „Mo lafi so ikljola taro mo muj nane te iranel pe čučo, nego ka kerel adava so mangava hem ka kerel adava bašo so i bičhaldo“ (Isaija 55:11). I Phuv palem ka ovel dženeti!
Savo ka ovel tegani o dživdipe? Te dikha so vetinela amenge e Devleskoro Lafi ko akala duj stranice so avena pali akaja.
^ pas. 4 Ko lil 1. Mojseeva 2:10-14 vakerela: „Taro Eden thavdela sine len so vadinela sine i gradina, hem oj adathar odvojnela pe sine ko štar lenja. O anav e jekhakiri tano Fison. . . o anav tari dujto len tano Gion. . . o anav tari trinto len tano Hidekel [ili Tigar] — oj thavdela ko istok tari Asirija. A i štarto len tani Eufrat“. O prva duj lenja na džangjola pe kote arakhljona hem kola tane ola.
