3 LEKCIJA
Sovetija so kerena o dživdipe te ovel pošukar
ZAMISLIN tuke kaj alo nevo doktori ko than kote so dživdinea. Šaj nane odma te misline kaj ov tano šukar doktori. A so ako nesave taro te amala gele ki leste hem lengoro sastipe ulo pošukar? Nane li tu da te mange te dža ko adava doktori?
Šaj te vakera kaj e Devleskoro Lafi tano sar jekh doktori. Nesave manuša nane sigurna dali te roden lestar sovet. Ama keda kerena adava so pišinela ki leste, lengoro dživdipe ovela pošukar. Te dikha nesave primerija.
Te rešinen pe o problemija ko brako
„Ko početok taro amaro brako, mislingjum kaj mo rom o Dumas, na mislinela sine mange“, setinela pe i Sumijatun. „Ki holi, but puti vikinava sine leske, frdava sine pali leste sa so ka arakhav, čak khuvava le sine. Nesavo puti tari bari holi, perava sine ko nesvest.“
„Keda o Dumas lelja te sikljol taro e Devleskoro Lafi, asava sine leske. Ama, garavindor tari javer soba, šunava le sine sar kerela lafi e manušencar so sikavena le sine bašo Devel. Jekh dive, šungjum sar čitinela akala lafija: ,O romnja te oven podložna pumare romenge sar e Gospodareske ... I romni valjani taro vilo te poštunjel pe rome‘ (Efešanite 5:22, 33). Akala lafija khuvge mange ko vilo. Molingjum ma e Devleske te prostinel mange so sium sine but lošno me romea hem te pomožinel ma te ovav pošukar romni. Sigende palo adava, o Dumas hem me počmingjam te sikljova e Devleskoro Lafi zaedno.“
O Dumas hem i Sumijatun
E Devleskoro Lafi isto agjaar vakerela: „O roma da valjani te mangen pumare romnjen sar korkori pes” (Efešanite 5:28). I Sumijatun vakerela: „O bukja so sikliljam meningje amen soldujen. Počmingjum me romeske te kerav čaj keda avela tari buti hem šukaripaja te kerav lea lafi. A o Dumas, sikavgja mange panda pobaro mangipe hem pomožinela sine mange ko kherutne bukja. Solduj džene dengjam amendar sa ,te sikava milost jekh jekheske, te ova sočuvstvitelna, hem spremno te prostina jekh jekheske‘ (Efešanite 4:32). Adaleske, o mangipe hem o poštovanje maškar amende sa pobuter barile. Akana, amen siam bahtale ko brako pobuter taro 40 berš. O šukar sovet taro e Devleskoro Lafi spasingja amaro brako!“
Te kontrolirinel pe i holi
„But sigate holjanava sine“ vakerela o Taibi. „But puti marava ma sine
hem pištolea daravkerava sine e javeren. Isto agjaar, marava sine me romnja, e Kustrijana, hem ki holi peravava la sine ki phuv. But manuša darana sine mandar.“I Kustrijana hem o Taibi molinena pe zaedno sekoja rat
„Jekh dive, čitingjum o lafija so vakergja len o Isa: ,Dava tumen nevi zapoved: mangen tumen jekh jekhea; sar me so mangljum tumen‘ (Jovan 13:34). Akava hor pogodingja ma hem mangljum te ovav pojaver. Keda uklela ma sine i holi, molinava ma sine e Devleske te ačhovav smirimo. Sigate palo adava mi holi našavgjovela sine. Me hem mi romni kergjam adava so bešela ko Efešanite 4:26, 27: ,Ma mukhen te nakhel o dive, a tumen panda te oven holjame, ni ma mukhen than e bengeske.‘ Sekoja rat zaedno čitinaja sine e Devleskoro Lafi hem molinaja amen sine. Akava cidingja amendar o stres so sine amen sekova dive hem angja amen te ova popaše me romnjaja.“
„Akana džanena ma sar mirno manuš. Mi romni hem me čhave mangena ma hem poštunjena ma. Isi ma but amala, hem sium paše e Devlea. Me sium čače bahtalo manuš.“
Te ciden pe o lošna navike
O Goin
„Družinava ma sine ternencar tari jekh banda, but pušinava sine, hem but puti nakhljum i rat mato ki ulica“, vakerela o Goin. „Isto agjaar, bikinava hem lava sine droga — marihuana hem ekstaze — kola so garavava len sine ko mo pancirno eleko. Dikhjovava sine sar zoralo hem kerava sine lošna bukja, ama palem dživdinava sine ki dar.“
„Tegani nekoj sikavgja mange akala lafija: ,Mo čhavo, ma bistre me lafija so sikavava tut... soske ola ka prodolžinkeren o dive hem o berša ko tlo dživdipe hem o mir‘ (Izreki 3:1, 2). But mangava sine te dživdinav but berša hem ko mir! Isto agjaar, čitingjum akala lafija: ,Adaleske so isi amen akala vetuvanja, me mangle, te čistina sekova melalipe taro amaro telo hem duho, te ova sa pobuter sveta [čista] ki dar e Devlestar‘ (2. Korinkjanite 7:1). Adaleske čhinavgjum e lošna navikencar, ikliljum tari banda, hem počmingjum te služinav e Devleske.“
„Akana, pobuter taro 17 berš na lava droga. Isi ma šukar sastipe, bahtali familija, šukar amala hem čisto sovest. Pobuter na pašljovava mato ki ulica, nego sekoja rat mirno sovava ko mo kreveti.“
Te na kerel pe razlika maškar o manuša
O Bambang vakerela: „Sar terno, sium sine kriminalco hem pobuter taro me žrtve sine manuša tari javer nacija so mrzinava la sine“.
„Sar so nakhela sine o vreme, počmingjum te rodav e Devle. Adava angja ma dži ki jekh grupa so zaedno khedela pe sine te sikljovel e Devleskoro Lafi. Adari sium sine šukar dodžardo taro manuša tari adaja nacija so mrzinava la sine! Isto agjaar dikhljum kaj ki adaja grupa o manuša taro razna rase hem nacie sine bahtale hem slobodno kerena sine lafi maškar peste. Sium sine iznenadimo! Tegani haliljum adava so vakerela e Devleskoro Lafi: ,O Devel na odvojnela e manušen, ov tari sekoja nacija prifatinela okole so darala lestar hem kerela adava so i pravedno‘ (Dela 10:34, 35).“
„Akana, pobuter na mrzinava e javeren. Nesave taro me najšukar amala tane tari adaja nacija so angleder mrzinava la sine. Taro po Lafi, o Devel sikavgja ma te mangav.“
O Bambang akana radunjela pe ko društvo e manušencar taro različna rase
Te na kerel pe nasilstvo
„Panda sar terno čhavo trin puti sium sine ko phanlipe — duj puti bašo čoribe hem jekh puti soske bizi nesavi žal posavgjum jekhe manuše“, vakerela o Garoga. „Khuvgjum ki jekh buntovno grupa hem mudargjum bute manušen. Palo adava, vodinava sine jekh kriminalno grupa so daravkerela sine e manušen hem lela lendar love hem javera bukja. Me telohranitelija sine sekogaš
mancar. Sium sine nasilno hem opasno manuš.“O Garoga nane pobuter nasilno manuš hem sikavela e javeren bašo Devel
„Tegani, jekh dive, ko e Devleskoro Lafi čitingjum akava: ,O manuš kova so isi le mangipe but trpinela hem tano ljubezno. Nane ljubomorno, na falinela pe, na vazdela pe, na kerela nepristojna bukja, na rodela pi korist, na holjanela lokheste, na pamtinela o lošnipe‘ (1. Korinkjanite 13:4, 5). Akala lafija pogodingje ma ko vilo. Geljum te dživdinav ko javer than, tegani počmingjum te sikljovav taro e Devleskoro Lafi hem te kerav ko mo dživdipe adava so sikljovava sine.“
„Akana pobuter na sium nasilno, nego o javera džanena ma sar manuš so sikavela e javeren bašo Devel hem poštunjena ma. Akana sium ko pravo drumo hem džanava soske dživdinava.“
E Devleskoro Lafi tano silno
Akala hem but javera primerija sikavena kaj ,e Devleskoro Lafi tano dživdo hem silno‘ (Evreite 4:12). O sovetija lestar lokhe haljovena pe, pomožinena ko dživdipe hem kerena te ovel amenge pošukar.
Šaj li e Devleskoro Lafi te pomožinel tuke da? Oja, šaj te pomožinel ko sa o problemija so isi tut. Sa so i pišimo ki leste „avela taro Devel hem korisno tano te sikavel e manuše, te sikavel keda nešto tano pogrešno, te ispravinel sa o bukja hem te sikavel sar te dživdinel pe pravedno sar so mangela o Devel, te šaj e Devleskoro manuš te ovel sposobno hem spremno baši sekoja šukar buti“ (2. Timotej 3:16, 17).
Adaleske, te dikha nesave važna bukja so sikavela e Devleskoro Lafi.