O DEVEL pe slugenge vakergja kaj ka ovel iskušimi lengiri vera. Leskoro Lafi vakerela: „Oven džangavde! Tumaro dušmani, o Beng, tano sar lavi so vikinela keda tano bokhalo hem rodela nekas te hal“ (1. Petrovo 5:8). So kerela o Beng te šaj te uništinel amari vera ko Devel?

O Beng šaj preku o javera, čak preku adala so i amenge paše, te terinel amen te čhinava te sikljova taro e Devleskoro Lafi. Adaleske, o Isa vakergja: „E manušeskere dušmanja ka oven leskere kherutne“ (Matej 10:36). I familija hem o amala so na mislinena amenge lošnipe, šaj na džanena kaj o čačipe arakhljola ko e Devleskoro Lafi. Ili, šaj darana so ka vakeren o javera. Ama, e Devleskoro Lafi vakerela: „Koj tinanela daratar taro manuš čhivela peske zamka, a koj verunjela ko Jehova ka ovel zaštitimo“ (Izreki 29:25). Te kergjem e manušengiri volja, adalea so ka čhinava te sikljova taro e Devleskoro Lafi, ka radunja li e Devle? Sigurno na! Ama, ako sikavaja čačutni vera, o Devel ka pomožinel amen. „Amen na siam adalendar so tari dar cidena pe taro Devel hem džana ko uništuvanje, nego adalendar so verunjena hem spasinena po dživdipe“ (Evreite 10:39).

Te setina amen ko primer e Dumaseskoro, so dikhlem le angleder. Leskiri romni asala sine leske baši leskiri vera. Ama palo adava, oj da počmingja te sikljovel taro e Devleskoro Lafi. Ako amen da keraja adava so i pravedno, šaj te pomožina amare amalenge hem amare manglenge, ola da te keren agjaar. But puti, okova so sikljola taro e Devleskoro Lafi ple šukar postapkencar hem adalea so sikavgja poštovanje, pomožingja nekoj tari leskiri familija te služinel e Devleske (1. Petrovo 3:1, 2).

O Beng, isto agjaar, terinela e manušen te mislinen kaj nane len vreme te sikljoven taro e Devleskoro Lafi. Ov mangela o pharipe so isi amen ko amaro dživdipe — o muke hem o finansiska problemija — te ,tasaven o lafi [e Devleskoro]‘ agjaar so amari vera ,nane te del plodi‘ (Marko 4:19). Ma te mukha asavko stavi so nane razumno te vlijanjel upri amende da. E Devleskoro Lafi vakerela: „Te šaj te dobinen večno dživipe valjani šukar te pendžaren tut, e jekhe čačutne Devle, hem okole  so bičhalgjan le, o Isus Hristos“ (Jovan 17:3). Oja, ako ponadari da sikljovaja pobuter bašo Devel hem bašo Isa, o Mesija, ka ovel amen večno dživdipe ko dženeti ki Phuv!

Te setina amen ko pekamberi o Musa, kova so barilo ki familija e faraoneskiri ko Egipet. Šaj sine te ovel le barvalipe, slava hem mokj. Ama, o Musa „pobuter manglja te ovel mučimo e Devleskere narodoja, nego te uživinel ko grešna bukja so sigate nakhena“. Soske? „Ov sine istrajno sar te phene dikhela sine Okole so na dikhjola“ (Evreite 11:24, 25, 27). Oja, e Musa sine le zorali vera ko Devel. Leske sine považno o Devel nego o sebična želbe, hem adaleske o Devel dengja le but bereketija. Ako amen da keraja agjaar, ov ka del bereketija amenge da.

O Beng šaj te probinel te hovavel amen ko but načinija. Ma te mukha te ova leskiri žrtva. E Devleskoro Lafi ohrabrinela amen: „Protivinen tumen e Bengeske, hem ov ka našel tumendar“ (Jakov 4:7). Sar šaj te protivine tu leske?

Ponadari da sikljov taro e Devleskoro Lafi. Čitin e Devleskoro Lafi sekova dive, sikljov lestar hem ker adava so vakerela ov. Kerindor akava, ka urave i „celo voeno oprema taro Devel“, kolaja so ka branine tu taro Beng (Efešanite 6:13).

Ov amal e manušencar so isi len čačutni vera. Rode tuke amala kola so čitinena e Devleskoro Lafi, so sikljovena lestar hem ikerena adava so bešela ki leste. Asavke manuša šunena akava sovet: „Te razmislina jekh jekheske te šaj te pottiknina amen te sikava mangipe hem te kera šukaripe... te ohrabrina amen jekh jekhea“. Ola ka pomožinen tu te bajrol ti vera (Evreite 10:24, 25).

Ov paše e Jehovaja. Molin tu e Devleske te pomožinel tu hem neka ovel tut doverba ki leste. Nikogaš ma bistre, o Devel mangela te pomožinel tut. E Devleskoro Lafi vakerela amenge: „Sa tumaro pharipe frden leske [e Devleske], soske ov grižinela pe tumenge“ (1. Petrovo 5:6, 7). „O Devel tano verno, hem nane te mukhel te oven iskušime pobuter taro adava so šaj te ingaren, nego ka pomožinel tumen keda isi tumen iskušenie te šaj te izdržinen le“ (1. Korinkjanite 10:13).

O Beng asala e Devleske adalea so vakerela kaj nijekh manuš keda isi le problemija nane te služinel leske. Ama, sekoj amendar šaj te sikavel kaj o Beng hovavela! „Ov gogjaver“ vakerela o Devel, „hem radunjker mo vilo, te šaj te odgovorinav okoleske so asala mange“ (Izreki 27:11). Oja, te ova rešime te sikava kaj isi amen čačutni vera!