1. Bašo so sine sekirimo o Isus i rat angleder te merel?

 I RAT angleder te merel, o Isus sine sekirimo bašo adava so ka ovel ki idnina leskere učenikoncar soske džanlja kaj panda hari nane te ovel lencar. Ov vakergja lenge: „Na sien delo taro sveto“ (Jovan 15:19). Pokasno, ov molingja pe ple Dadeske hem vakergja baši lende: „Ola nane delo taro sveto, sar me so na sium delo taro sveto“ (Jovan 17:15, 16). So mislingja o Isus adalea?

2. Soj tano o „sveto“ bašo kova so kergja lafi o Isus?

² Akate e lafea „sveto“ mislinela pe ko manuša so na pendžarena e Devle hem kasaja so vladinela o Satana (Jovan 14:30; Efešanite 2:2; Jakov 4:4; 1. Jovanovo 5:19). Sar šaj te na ova „delo taro sveto“? Ko akava poglavje, ka dikha nekobor načinija: 1) te ova verna bašo e Devleskoro Carstvo hem te ova neutralna ki politika, 2) te sprotivstavina amen e duhoske taro akava sveto, 3) te ova skromna ko urajbe hem doteribe, 4) te ovel amen uramnoteženo stavi sprema o pare hem, 5) te urava celo voeno oprema so dengja amen o Devel. (Dikh i 16 fusnota.)

3. Savo stavi sine e Isuse baši politika?

³ Keda o Isus sine ki Phuv, ov šaj sine te dikhel kaj e manušen isi len but problemija hem kaj na sine lenge  lokho o životo. Ov čače grižinela pe sine lenge hem mangela sine te pomožinel len. Dali ulo političko vodači? Na. Ov džanlja kaj e manušengere problemija šaj te rešinel len samo e Devleskoro Carstvo, ili e Devleskiri vlada kote so valjani sine ov te ovel Cari. E Devleskoro Carstvo sine i glavno tema bašo so propovedinela sine ov (Daniel 7:13, 14; Luka 4:43; 17:20, 21). O Isus na mešingja pe ki politika hem sekogaš sine neutralno. Keda o Isus iklilo anglo rimsko upraviteli, o Pontij Pilat, vakergja: „Mlo Carstvo nane delo taro akava sveto“ (Jovan 18:36). Leskere učenikija isto agjaar sine neutralna. Ko jekh lil pišinela kaj o hristijanja taro prvo veko „na sine ki nisavi političko funkcija“ (On the Road to Civilization). Avdive, o čačutne hristijanja isi len isto stavi. Amen verno poddržinaja e Devleskoro Carstvo hem siem neutralna ki politika (Matej 24:14).

4. Sar o čačutne hristijanja poddržinena e Devleskoro Carstvo?

⁴ Keda nesavo prateniko, ili ambasadori, dobinela zadača te služinel ki javer phuv, ov na mešinela pe ki politika tari adaja phuv. O pomazanikija, kola so isi len nadež te vladinen e Isusea ko nebo, tane ki slično situacija. O Pavle e pomazime hristijanenge pišingja: „Amen siem pratenikija so zastapinena e Isuse“ (2. Korinkjanite 5:20). O pomazanikija tane pretstavnikija tari e Devleskiri vlada. Ola na mešinena pe ko politička bukja akale svetoskere (Filipjanite 3:20). Namesto adava, o pomazanikija pomožingje bute manušenge te džanen baši e Devleskiri vlada. O „javera bakhre“, kola so isi len nadež večno te živinen ko e Devleskoro nevo sveto, poddržinena e pomazanikon. Ola da tane neutralna (Jovan 10:16;  Matej 25:31-40). Jasno tano kaj nijekh čačutno hristijani na valjani te mešinel pe ki politika akale svetoskiri. (Čitin Isaija 2:2-4.)

5. Koja tani jekh pričina soske o čačutne hristijanja na džana ki vojna?

⁵ O čačutne hristijanja dikhena ko pumare phralja hem phenja sar pli familija hem bizo razlika tari koja phuv ili kultura avena, ola tane ko jekhipe (1. Korinkjanite 1:10). Keda bi džaja sine ki vojna, tegani bi valjani sine te borina amen protiv amare phralja hem phenja, ili amari familija, kas so valjani te manga sar so zapovedingja amenge o Isus (Jovan 13:34, 35; 1. Jovanovo 3:10-12). Osven adava, o Isus zapovedingja ple učenikonge te mangen čak pumare dušmanen (Matej 5:44; 26:52).

6. Savo stavi isi e Devleskere slugen sprema o vlastija?

 ⁶ Iako sar hristijanja siem neutralna, trudinaja amen te ova šukar gragjanija. Na primer, amen sikavaja kaj poštujnaja e vlasten agjaar so siem poslušna ko lengere zakonija hem platinaja danokija. Ama najvažno amenge tano te da „e Devleskoro e Devleske“ (Marko 12:17; Rimjanite 13:1-7; 1. Korinkjanite 6:19, 20). Adava so valjani te da e Devleske tano te manga le, te ova leske poslušna hem te služina leske. Poprvo bi meraja sine, nego te ova neposlušna e Jehovaske. (Luka 4:8; 10:27; čitin Dela 5:29; Rimjanite 14:8.)

7-8. Soj tano „o duho e svetoskoro“ hem sar vlijajnela upro manuša?

⁷ Te na ova delo taro sveto e Satanaskoro značinela te na dozvolina „o duho akale svetoskoro“ te vodinel amen. „O duho akale svetoskoro“ tano o razmislibe hem o ponašibe so avela taro Satana, hem vlijajnela upro okola so na služinena e Jehovaske. Ama e Devleskere sluge sprotivstavinena pe akale duhoske. Sar so vakergja o Pavle: „Amen na primingjem o duho e svetoskoro, nego o duho soj tano taro Devel“. (1. Korinkjanite 2:12; Efešanite 2:2, 3; dikh i 17 fusnota.)

⁸ O duho e svetoskoro kerela e manušen sebična, gorda hem buntovna. Terinela len te mislinen kaj na valjani te oven e Devleske poslušna. O Satana mangela o manuša te keren sa so mangena bizo te razmislinen bašo posledice. Ov mangela o manuša te verujnen kaj „i želba e teloskiri hem i želba e jakhengiri“ tane o najvažna bukja ko životo (1. Jovanovo 2:16; 1. Timotej 6:9, 10). O Beng posebno trudinela pe te hovavel e  Devleskere slugen. Ov mangela te terinel amen te razmislina sar leste (Jovan 8:44; Dela 13:10; 1. Jovanovo 3:8).

9. Sar šaj o duho taro sveto te vlijajnel upri amende?

⁹ Isto sar o vozduh so dišinaja, agjaar o duho e svetoskoro tano segde okolu amende. Ako na daja amendar sa te sprotivstavina amen akale duhoske, ov ka vlijajnel upri amende. (Čitin Izreki 4:23.) Asavko vlijanie ko početok šaj te dikhjol amenge kaj nane opasno, na primer, ako dozvolinaja upri amende te vlijajnel o razmislibe hem o stavija e manušengere so na služinena e Jehovaske (Izreki 13:20; 1. Korinkjanite 15:33). Isto agjaar, upri amende šaj te vlijajnen bukja sar soj pornografija, otpadništvo ili sportija kote soj tano najvažno samo te pobedinel pe. (Dikh i 18 fusnota.)

10. Sar šaj te sprotivstavina amen e duhoske taro akava sveto?

¹⁰ So valjani te kera te na dozvolina upri amende te vlijajnel o duho akale svetoskoro? Valjani te ačhova paše e Jehovaja hem te mukha te vodinen amen leskere mudra sovetija. Mora stalno te molina le te del amen plo sveti duh hem te ova zafatime adalea so ka služina leske. O Jehova tano i najmokjno ličnost ko univerzum. Uverime siem kaj ov šaj te pomožinel amen te protivina amen e duhoske taro akava sveto (1. Jovanovo 4:4).

11. Sar o duho akale svetoskoro vlijajnela upro način sar o manuša uravena pe?

¹¹ Javer način sar sikavaja kaj na siem delo taro sveto tano adava sar doterinaja amen hem sar uravaja amen. But manuša ko sveto uravena pe te šaj te privlečinen  vnimanie, te pottikninen ki javerende nemoralna misle, te sikaven buntovnost sprema o opštestvo ili te sikaven kobor pare isi len. A javerenge palem ni najhari nane važno sar izgledinena, dali tane neuredna ili melale. Amen na smejnaja te dozvolina asavke stavija te vlijajnen ko adava sar doterinaja amen hem sar uravaja amen.

12-13. Kola načelija šaj te pomožinen amenge keda odlučinaja so ka urava?

¹² Sar sluge e Jehovaskere, valjani sekogaš te urava amen šukar hem amare šeja te oven čista, uredna hem  soodvetna baši prilika. Amen uravaja amen skromno hem razumno, a adalea sikavaja kaj služinaja e Devleske (1. Timotej 2:9, 10; Juda 21).

¹³ O način sar uravaja amen vlijajnela upro adava savo mislenje isi e javeren bašo Jehova hem bašo leskoro narodo. Amen mangaja te kera „sa baši e Devleskiri slava“ (1. Korinkjanite 10:31). Te ovel pe skromno značinela te la ko predvid o čuvstvija e javerengere hem lengoro mislenje. Adaleske, keda birinaja so ka urava ili sar ka izgledina, na smejnaja te bistra kaj amare odluke vlijajnena upro javera (1. Korinkjanite 4:9; 2. Korinkjanite 6:3, 4; 7:1).

14. Bašo so valjani te razmislina keda birinaja so ka urava keda učestvujnaja ko teokratska aktivnostija?

¹⁴ Sar uravaja amen keda džaja ko sostanokija ili ki služba? Dali privlekujnaja but vnimanie upri amende? Dali uravaja amen agjaar so e javerenge tano nezgodno? Dali mislinaja kaj adava sar uravaja amen tani amari buti hem kaj nikoj na valjani te mešinel pe amenge ko adava? (Filipjanite 4:5; 1. Petrovo 5:6). Normalno tano te manga te izgledina šukar, ama adava so ka kerel amen čače te ova šuže tane amare hristijanska osobine. Adala tane o osobine so o Jehova dikhela ki amende. Ola sikavena save čače siem andre ko vilo, a adava but vredinela anglo Devel (1. Petrovo 3:3, 4).

15. Soske o Jehova na dengja amen konkretna pravilija bašo adava sar valjani te urava amen hem sar te izgledina?

¹⁵ O Jehova na dela amen spisako kote so isi pravilija bašo adava so valjani, a so na valjani te urava. Namesto adava, ov dengja amen bibliska načelija kola so šaj te pomožinen amenge te ana šukar odluke (Evreite 5:14). Ov mangela amare odlukencar, bizi razlika dali  tane tikne ili bare, te sikava kaj mangaja le hem e javeren. (Čitin Marko 12:30, 31.) E Devleskere sluge ko celo sveto uravena pe ko različno način sprema lengiri kultura ili sprema adava sar lenge lično svidžinela pe. Asavke razlike kerena amaro životo pošužo hem pointeresno.

16. a) Savo pogrešno stavi isi e sveto bašo pare? b) Sar šaj te džana dali isi amen ispravno stavi bašo pare?

¹⁶ O Satana mangela o manuša te mislinen kaj o pare hem o materijalna bukja ka keren len bahtale. Ama  e Jehovaskere sluge džanena kaj adava nane točno. Soglasinaja amen e Isuseskere lafencar: „Čak keda nekas isi le but, leskoro životo na avela taro adava so isi le“ (Luka 12:15). O pare našti te keren amen te ova čače bahtale. Lencar našti te kina amenge čačutne amala, andruno mir, a ni večno životo. Džangjola pe, amenge valjani nesave materijalna bukja, a isto agjaar mangaja te uživina ko životo. Ama o Isus sikavgja amen kaj šaj te ova bahtale ako siem paše e Devlea hem ako ko amaro životo najvažno tano te služina leske (Matej 5:3; 6:22, fusnota). Puč tut: „Dali vlijajnela upri mande o stavi bašo pare so isi ko akava sveto? Dali stalno mislinava hem kerava lafi samo bašo pare?“ (Luka 6:45; 21:34-36).

17. Sar ka ovel tlo životo ako na prifatinea o stavi bašo pare so isi e sveto?

¹⁷ Ako amenge tano najvažno te služina e Jehovaske hem ako na prifatinaja o stavi so isi e sveto bašo pare, tegani ka ovel amen smisla ko životo (Matej 11:29, 30). Ka ova zadovolna hem ka ovel amen andruno mir (Matej 6:31, 32; Rimjanite 15:13). Nane te ova preterano sekirime bašo materijalna bukja. (Čitin 1. Timotej 6:9, 10.) Ka osetina amen bahtale keda daja (Dela 20:35). Ka ovel amen poviše vreme okolenge so mangaja len hem pošukar ka sova (Propovednik 5:12).

18. So mangela o Satana te kerel amenge?

¹⁸ O Satana mangela te uništinel amaro amalipe e Jehovaja, adaleske mora te kera sa so šaj te zaštitina le. Amen borinaja amen „protiv o lošna duhija“ (Efešanite  6:12). O Satana hem leskere demonija na mangena te ova bahtale ili te živina večno (1. Petrovo 5:8). Akala mokjna dušmanja borinena pe protiv amende, ama o Jehova šaj te pomožinel amen te pobedina!

19. Sar tani opišimi e Devleskiri „voeno oprema“ ko Efešanite 6:14-18?

¹⁹ Ko purano vreme, o vojnikija sine len voeno oprema te šaj te zaštitinen pe ki vojna. Slično agjaar, amen da mora te urava i „voeno oprema“ so dela amen o Jehova (Efešanite 6:13). Agjaar ka ova zaštitime. Akaja voeno oprema tani opišimi ko Efešanite 6:14-18: „Adaleske, oven postojana! Phanden tumen ki polovina o pojas e čačipaskoro, čhiven ko kolin i pravednost sar oklop hem uraven ko pre i spremnost te propovedinen o šukar haberi bašo mir. Angleder sa, len o baro štiti e verakoro, kolea so ka šaj te ačhaven sa o jagale strele e Lošnoskere. Isto agjaar, len o spasenie sar šlemi hem o mači e duhoskoro, a adava tano e Devleskoro lafi, džikote ponadari da molinena tumen preku o duho ki sekoja prilika agjaar so koristinena sekoja molitva hem sekoja molba taro vilo“.

20. So valjani te kera te šaj i duhovno „voeno oprema“ te pomožinel amenge?

²⁰ Ako jekh vojniko bistrela jekh delo tari voeno oprema hem mukhela nesavo delo taro plo telo bizi zaštita, tegani o dušmani ka napadinel le baš adathe. Ako mangaja amari „voeno oprema“ te zaštitinel amen, na valjani te bistra nijekh delo latar. Valjani te phirava la stalno hem te održina la. Amari borba ka prodolžinel sa džikote e Satanaskoro sveto nane uništimo hem sa džikote o Satana hem leskere demonija nane te ovel len nisavo vlijanie upri Phuv (Otkrovenie  12:17; 20:1-3). Adaleske ako borinaja amen protiv o pogrešna želbe ili nesave slabostija, na valjani te otkažina amen! (1. Korinkjanite 9:27).

21. Sar šaj te pobedina ki duhovno vojna?

²¹ Korkori našti te pobedina e Benge. Ama ako pomožinela amenge o Jehova, šaj! Te šaj te ačhova verna, valjani te molina amen e Jehovaske, te proučina leskoro Lafi hem te ova zaedno amare phralencar hem phenjencar (Evreite 10:24, 25). Akala bukja ka pomožinen amenge te ačhova verna e Devleske hem te ova spremna te branina amari vera.

22-23. a) Sar šaj sekogaš te ova spremna te branina amari vera? b) So ka dikha ko sledno poglavje?

²² Mora sekogaš te ova spremna te branina amari vera (Jovan 15:19). Ko odredena bukja, e Jehovaskere svedokija isi len pojaver stavi taro but manuša. Puč tut: „Dali mange jasno soske isi amen asavko stavi baši akaja buti? Dali sium uverimo kaj adava so pišinela ki Biblija hem adava so vakerela o verno hem razborito robo tano ispravno? (Matej 24:45; Jovan 17:17). Dali sium gordo so sium e Jehovaskoro svedoko? (Psalm 34:2; Matej 10:32, 33). Šaj li te objasninav e javerenge ko so verujnava?“ (Čitin 1. Petrovo 3:15.)

²³ Ko but situacie tano but jasno so valjani te kera te šaj te ačhova odvojme taro sveto. Ama isi situacie keda adava nane doborom jasno. O Satana probinela ko razna načinija te astarel amen ki zamka. Jekh zamka so koristinela tani i zabava. Sar šaj mudro te birina amari zabava? Ka dikha ko sledno poglavje.