16 POGLAVJE
Protivin tut e Bengeske
„Protivinen tumen e Bengeske, hem ov ka našel tumendar“ (JAKOV 4:7)
1-2. So valjani te haljova bašo Satana hem o demonija?
O ŽIVOTO ko nevo sveto ka ovel but šukar. Konečno ka živina agjaar sar so sine e Jehovaskiri namera ko početok. Ama, akana živinaja ko sveto kote so vladinela o Satana hem leskere demonija (2. Korinkjanite 4:4). Iako našti te dikha len, ola postojnena hem tane but mokjna.
2 Ko akava poglavje ka dikha sar šaj te ačhova paše uzo Jehova hem te zaštitina amen taro Satana. O Jehova vetinela kaj ka pomožinel amen. Ama valjani te haljova save metode koristinena o Satana hem o demonija te šaj te hovaven hem te napadinen amen.
„SAR LAVI SO VIKINELA“
3. So mangela te kerel amenge o Beng?
3 O Satana vakerela kaj o manuša obožavinena e Jehova taro sebična pričine, hem keda ka ovel lenge pharo ola ka čhinaven te služinen leske. (Čitin Jov 2:4, 5.) Keda nekoj mangela te sikljovel bašo Jehova, o Satana hem o demonija dikhena adava hem trudinena pe te čhinaven le. Ola tane but holjame keda nekoj dela lafi e Jehovaske kaj ka služinel leske hem keda krstinela pe. I Biblija sporedinela e Benge sar „lavi so vikinela keda tano bokhalo hem rodela nekas te hal“ (1. Petrovo 5:8). O Satana mangela te ruminel amaro amalipe e Jehovaja (Psalm 7:1, 2; 2. Timotej 3:12).
O Satana tano holjamo keda odlučinaja amaro životo te koristina le te kera e Jehovaskiri volja
4-5. a) So našti te kerel o Satana? b) Sar šaj te protivina amen e Bengeske?
4 Ama amen na valjani te dara taro Satana hem leskere demonija. O Jehova ograničingja adava so šaj te keren amenge. O Jehova vetinela kaj jekh „baro mnoštvo“ taro čačutne hristijanja ka preživinen „i bari nevolja“ (Otkrovenie 7:9, 14). Adava o Beng našti te čhinavel soske o Jehova zaštitinela ple narodo.
5 Ako ačhovaja paše uzo Jehova, o Satana našti te ruminel amaro amalipe lea. E Devleskoro Lafi uverinela amen: „O Jehova ka ovel tumencar sa džikote tumen sien lea“. (2. Letopisi 15:2; čitin 1. Korinkjanite 10:13.) But verna murša hem džuvlja taro purano vreme, sar soj o Avel, o Enoh, o Noe, i Sara hem o Mojsej, protivingje pe e Bengeske agjaar so ačhile paše uzo Jehova (Evreite 11:4-40). Amen da šaj te kera isto adava. E Devleskoro Lafi vetinela: „Protivinen tumen e Bengeske, hem ov ka našel tumendar“ (Jakov 4:7).
„BORINAJA AMEN“
6. Sar napadinela amen o Satana?
6 Iako o Satana džanela kaj o Jehova ograničingja adava so šaj te kerel amenge, ov ponadari da ka kerel sa te šaj te ruminel amaro odnos e Devlea. Avdive, o Beng napadinela amen ko različna načinija hem koristinela ista metode so koristinela len beršencar. Kola tane nesave lendar?
7. Soske o Satana napadinela e Jehovaskere narodo?
7 O apostol Jovan pišingja: „Celo sveto tano ko vasta e Lošnoskere“ (1. Jovanovo 5:19). O Satana vladinela akale lošno svetoja, a isto agjaar mangela te vladinel e Jehovaskere narodoja (Mihej 4:1; Jovan 15:19; Otkrovenie 12:12, 17). Ov džanela kaj ačhilo le panda hari vreme, adaleske sekaske amendar kerela baro pritisok te šaj te na ova verna e Devleske. Ponekogaš o Beng napadinela direktno, a ponekogaš adava kerela le bizo te primetina.
8. So valjani sekova hristijani te haljol?
8 Ko Efešanite 6:12 čitinaja: „Borinaja amen... protiv o lošna duhija soj ko nebo“. Sekova hristijani lično valjani te borinel pe protiv o Beng hem o demonija. Valjani te haljova kaj sekoj so dengja lafi kaj ka služinel e Jehovaske tano ki adaja borba. Ko plo pismo dži ko Efešanja, o apostol Pavle nekobor puti pottikningja e hristijanen te ačhoven zorale ki borba protiv o Satana (Efešanite 6:11, 13, 14).
9. So probinena te keren amenge o Satana hem o demonija?
9 O Satana hem o demonija probinena te hovaven amen ko razna načinija. Ako jekh metoda na uspejnela leske ki amende, o Satana ka probinel nesavi javer. Ov trudinela pe te dikhel kola tane amare slabostija te šaj te birinel koja zamka te koristinel. Amen šaj te na pera ki lende soske i Biblija otkrinela amenge e Bengeskere zamke. (2. Korinkjanite 2:11; dikh i 31 fusnota.) Jekh zamka tani o demonizam.
OV PODUR TARO DEMONIJA
10. a) Soj tano o demonizam? b) Sar dikhela o Jehova ko demonizam?
10 Demonizam, ili spiritizam, tano te ovel pe ko kontakt e demonencar, na primer preku o bukja sar soj te dikhel pe ko fali, te keren pe magie ili te kerel pe lafi e mulencar. I Biblija vakerela amenge kaj o demonizam tano „odvratno“. Našti nekoj te kerel bukja kote soj vklučimo o demonizam, a ko isto vreme te obožavinel e Jehova (5. Mojseeva 18:10-12; Otkrovenie 21:8). O hristijanja valjani celosno te otfrlinen sa o vrste taro demonizam (Rimjanite 12:9).
11. So šaj te ovel ako interesinena amen o natprirodna bukja?
11 O Satana džanela kaj ako privlečinena amen o natprirodna bukja, ov šaj te koristinel o demonizam te pera ki adaja zamka. Sekoja vrsta taro demonizam šaj te ruminel amaro amalipe e Jehovaja.
O SATANA PROBINELA TE HOVAVEL AMEN
12. Sar mangela o Satana te vlijajnel ko amaro razmislibe?
12 O Satana mangela te buninel e manušen. Ov hari pohari kerela o manuša te sumninen pe, sa džikote na mislinena „kaj o šukar tano lošno, a o lošno šukar“ (Isaija 5:20). Ov mangela te mislina kaj o sovetija tari Biblija nane korisna hem kaj ka ova pobahtale ako na ikeraja e Devleskere merilija.
13. Sar o Satana probinela te čhivel sumnje?
13 Te širinel sumnje tani jekh taro e Satanaskere najuspešna metode. Ov koristinela la sine but poangle. Ki Edensko gradina, ov probingja te čhivel sumnje e Evake keda pučlja la: „Čače li o Devel vakergja tumenge kaj na smejnena te han taro sekova kaš ki gradina?“ (1. Mojseeva 3:1). Pokasno, ko vreme keda živinela sine o Jov, o Satana pučlja e Jehova anglo angelija: „Zarem o Jov džabe darala taro Devel?“ (Jov 1:9). Odkeda o Isus krstingja pe o Satana vakergja leske: „Ako sian e Devleskoro čhavo, vaker akale barenge te oven mare“ (Matej 4:3).
14. Sar šaj o Satana te kerel o manuša te sumninen pe kaj o demonizam tano pogrešno?
14 O Beng ponadari da čhivela sumnje. Ov mangela amen te verujna kaj o demonizam nane but lošno, agjaar so kerela te izgledinel kaj nane opasno. Čak nesave hristijanja na sine svesna kobor akava tano opasno (2. Korinkjanite 11:3). Adaleske, sar šaj te zaštitina amen? Sar šaj te ova sigurna kaj na pelem e Bengeske ki zamka? Te dikha duj podračja taro životo kote so šaj o Beng te hovavel amen: i zabava hem o medicinska tretmanija.
O SATANA KORISTINELA AMARE PRIRODNA ŽELBE
15. Sar šaj te ovel amen buti e demonencar preku i zabava?
15 Amen o manuša mangaja te zabavina amen. Avdive, ko but filmija, klipija, televiziska emisie, kompjuterska igre hem internet stranice isi demonija, magie hem natprirodna sile. But džene ki lende dikhena sar zabava so nane opasno, ama na haljovena kobor tano opasno te ovel tut buti e demonencar. Ko demonizam isto agjaar tane vklučime o horoskop, te dikhel pe fali ko vas, ko tarot karte, ko fildžani hem ko gravo. O Beng garavela kobor tane opasna akala bukja, hem kerela te dikhjon sar nešto misteriozno, vozbudlivo hem zabavno. Nekoj šaj te mislinel kaj nane ništo lošno te dikhel nešto soj demonsko ili natprirodno, soske ov lično na kerela bukja soj tane povrzime e demonencar. Soske asavko razmislibe tano opasno? (1. Korinkjanite 10:12).
16. Soske valjani te izbegina zabava kote so isi nešto natprirodno?
16 O Satana hem o demonija našti te čitinen amare misle. Ama ola šaj te džanen so mangaja hem sar razmislinaja adalea so dikhena save odluke anaja amenge hem amare familijake, ko adava tano vklučimo hem savi zabava birinaja. Ako birinaja filmija, muzika ili lila kote so isi magioničarija, magie, opsednime demonencar, vešterke, vampirija ili slično, o Satana ka dikhel kaj interesinaja amen lenge. Tegani o Beng hem o demonija šaj te trudinen pe te čhiven amen panda pohor ko demonizam. (Čitin Galatite 6:7.)
17. Sar šaj o Satana te koristinel amari želba te ova saste?
17 O Satana isto agjaar koristinela amari želba te ova saste. But džene avdive tane but nasvale. Nekoj šaj probingja različna tretmanija, ama na uspejngje (Marko 5:25, 26). Asavke manuša šaj te oven but razočarime hem te oven spremna te probinen bilo so. Ama amen sar hristijanja valjani te pazina te na birina medicinska tretmanija kote so isi magie (Isaija 1:13).
Neka ovel tut doverba ko Jehova keda sian nasvalo
18. Kola medicinska tretmanija valjani o hristijanja te odbinen?
18 Ko purano Izrael, nesave manuša koristinena sine magie. O Jehova vakergja lenge: „Keda vazdena tumare vasta ki molitva, phandava me jakhja angli tumende. Vakerena but molitve, ama me na šunava“ (Isaija 1:15). Zamislin tuke, o Jehova na manglja čak te šunel lengere molitve! Na mangaja te kera nešto so ka ruminel amaro amalipe e Jehovaja hem te čhinava le te pomožinel amenge, posebno keda siem nasvale (Psalm 41:3). Angleder te prifatina nesavo tretmani, mora te ispitina hem te dikha dali tano povrzimo demonencar ili natprirodna silencar (Matej 6:13). Ako tano povrzimo, valjani te odbina le! (Dikh i 32 fusnota.)
PARAMISA BAŠO DEMONIJA
19. Sar o Beng daravela e manušen?
19 Nesave manuša mislinena kaj o Beng hem o demonija tane izmislime, a javera džanena kaj ola čače postojnena soske sine len iskustvo lencar. But manuša ikerena nesave sueverna običaija soske darana te na mučinen len o lošna duhija. Javera vakerena paramisa kaj o demonija kerena but strašna bukja e manušenge hem agjaar daravena len. But puti o manuša tane vooduševime taro asavke paramisa, hem mangena te raskažinen len e javerenge. Akala paramisa kerena o manuša te daran taro Beng.
20. Sar šaj te širina e Satanaskere hovajba?
20 Razmislin bašo akava: o Satana mangela o manuša te daran lestar (2. Solunjanite 2:9, 10). Ov hovavela hem džanela sar te vlijajnel ko misle e manušengere so kerena demonizam hem kerela te verujnen ko bukja so nane čače. Akala manuša šaj te vakeren paramisa bašo bukja so ola mislinena kaj dikhle ili šungje. Kobor poviše o manuša raskažinena len, doborom poviše bajrarena o bukja ko akala paramisa. Na mangaja te pomožina e Satanaske te širinel dar adalea so ka raskažina asavke paramisa (Jovan 8:44; 2. Timotej 2:16).
21. Namesto te vakera paramisa bašo demonija, bašo so šaj te kera lafi?
21 Ako nekoj taro e Jehovaskoro narodo doživingja nešto taro demonija, na valjani adava te raskažinel e javerenge sar nešto interesno. E Jehovaskoro narodo na valjani te daral taro adava so šaj te kerel o Beng hem o demonija. Namesto adava, amen valjani te koncentririna amen ko Isus hem ki mokj so dengja le o Jehova (Evreite 12:2). O Isus na raskažingja ple učenikonge paramisa bašo demonija. Ov koncentriringja pe ko haberi bašo Carstvo hem ko šukar bukja so kergja o Devel (Dela 2:11; Luka 8:1; Rimjanite 1:11, 12).
22. So sian odlučno te kere?
22 Ma te bistra kaj e Satanaskiri cel tani te uništinel amaro odnos e Jehovaja. Ov ka kerel sa te šaj te uspejnel ko adava. Ama amen siem svesna kola tane e Bengeskere metode hem odlučna siem te odbina sekoja vrsta taro demonizam. Amen na mukhaja „than e Bengeske“ te hovavel amen nego ikeraja amen cvrsto ki amari odluka. (Čitin Efešanite 4:27.) Oja, ako protivinaja amen e Bengeske nane te pera ko leskere zamke hem o Jehova ka zaštitinel amen (Efešanite 6:11).