1-3. a) Sar dikhena but manuša ki pumari buti? b) Save pučiba ka dikha ko akava poglavje?

 O MANUŠA ko celo sveto kerena but buti te šaj te grižinen pe peske hem ple familijake. But džene na mangena pumari buti, a nesave čak muka len te džan sekova dive ki buti. Ako tu da osetinea tut agjaar, so ka pomožinel tuke te uživine poviše ki tli buti?

² O Jehova vakerela amenge: „Sekova manuš valjani te hal hem te piel hem te uživinel ko šukar bukja taro celo plo trudo. Adava tano poklon taro Devel“ (Propovednik 3:13). O Jehova stvoringja amen te ovel amen potreba hem želba te kera buti. Ov mangela amen te uživina ki amari buti. (Čitin Propovednik 2:24; 5:18.)

³ Adaleske, so ka pomožinel amenge te uživina ki buti? Savi buti valjani o hristijanja te odbinen? Sar šaj te ova uramnotežena maškar amari buti hem i služba e Jehovaske? Hem koja tani i najvažno buti so šaj te kera la?

4-5. So mislinela o Jehova baši buti?

⁴ O Jehova but mangela te kerel buti. Ki 1. Mojseeva 1:1 pišinela: „Ko početok o Devel kergja o nebo hem i  phuv“. Otkeda kergja i Phuv hem sa o javera bukja, ov dikhlja kaj sa adava so kergja sine „but šukar“ (1. Mojseeva 1:31). Amaro Stvoriteli sine zadovolno taro sa adava so kergja (1. Timotej 1:11).

⁵ O Jehova nikogaš na čhinavela te kerel buti. O Isus vakergja: „Mo Dad kerela buti sa dži akana“ (Jovan 5:17). Čače, na džanaja sa o šuže bukja so panda kerela len o Jehova, ama nesave lendar džanaja. Ov birinela okolen so ka vladinen leskere Čhavea, e Isusea, ko nebo (2. Korinkjanite 5:17). O Jehova isto agjaar grižinela pe e manušenge hem aktivno vodinela o propovedničko delo ko celo sveto. Adaleske milionja manuša pendžarena e Jehova hem isi len nadež te živinen zasekogaš ko raj ki Phuv (Jovan 6:44; Rimjanite 6:23).

6-7. Savo rabotniko tano o Isus?

⁶ O Isus, isto sar plo Dad, but mangela te kerel buti. Angleder te avel ki Phuv, o Isus sine e Devleskoro „vešto graditeli“, soske zaedno e Jehovaja kergja sa o bukja soj ko nebo hem ki Phuv (Izreki 8:22-31; Kološanite 1:15-17). Džikote sine ki Phuv, o Isus ponadari da kerela sine but buti. Panda sar terno, ov siklilo o stolarsko zanati, izgleda kerela sine greda, udara, astalija, stolice hem javera predmetija taro kaš. O Isus doborom šukar kerela sine pli buti so sine pendžardo sar „o stolari“ (Marko 6:3).

⁷ Ama, e Isuseskiri najvažno buti ki Phuv sine te propovedinel o šukar haberi hem te sikavel e manušen bašo Jehova. Sine le trin berš tekvaš te završinel pli služba, hem ov kerela sine buti taro rano sabajle dži kasno rakjate (Luka 21:37, 38; Jovan 3:2). O Isus phirgja peški but kilometre ko phuvjale  drumija te propovedinel o šukar haberi kobor so šaj poviše manušenge (Luka 8:1).

8-9. Soske o Isus uživinela sine ki pli buti?

⁸ E Isuseske sine sar hajbe te kerel adava so mangela o Devel. Adava dela le sine sila. Sine dive keda o Isus doborom but sine zafatimo propovedibaja so čak na sine le vreme te hal maro (Jovan 4:31-38). Ov koristinela sine sekoja prilika te pomožinel e javerenge te sikljoven bašo leskoro Dad. Adaleske šaj sine te vakerel e Jehovaske: „Slavingjum tut ki phuv, agjaar so završingjum i buti so dengjan man te kerav la“ (Jovan 17:4).

⁹ Jasno tano kaj o Jehova hem o Isus čače kerena but buti. Ola tane bahtale hem uživinena ki pumari buti. Amen mangaja te postapina sar o Devel hem te dža palo e Isuseskoro primer (Efešanite 5:1; 1. Petrovo 2:21). Adaleske amen da keraja buti hem daja amendar sa keda keraja nešto.

10-11. So ka pomožinel amenge te dikha pozitivno ki amari buti?

¹⁰ Sar e Jehovaskoro narodo, amen keraja but buti te šaj te grižina amen amenge hem amare familijake. Ama nane sekogaš lokho te uživina ki buti. Adaleske, so te kera te šaj te uživina ki amari buti?

¹¹ Ov pozitivno. Šaj našti te menina o than hem adava kobor keraja buti, ama šaj te menina amaro stavi. Ka pomožinel amen but ako haljovaja so očekujnela amendar o Jehova. Na primer, o Jehova očekujnela taro poglavari ki familija te grižinel pe kobor so šaj bašo potrebe ple familijakere. Ustvari, i Biblija vakerela ako nekoj na grižinela pe ple familijake  „pološno tano taro manuš soj bizi vera“ (1. Timotej 5:8). Ako tu sian poglavari ki familija, sigurno kerea but buti te šaj te grižine tut tle familijake. Bizi razlika dali mangea tli buti ili na, tu džanea kaj adalea so grižinea tut tle familijake, tu ugodinea e Jehovaske.

12. Sar pomožinela tuke adava so sian bukjarno hem česno?

¹² Ov bukjarno hem česno. Agjaar ka ovel tuke polokho te uživine ki buti (Izreki 12:24; 22:29). Sar prvo e gazda ka ovel le poviše doverba ki tute. O gazdija ceninena česna rabotnikon adaleske so na čorena pare, materijalija ili vreme (Efešanite 4:28). Soj najvažno, o Jehova džanela kaj sian bukjarno hem česno. Šaj te ovel tut „čisto sovest“ soske džanea kaj ugodinea tle Devleske so mangea le (Evreite 13:18; Kološanite 3:22-24).

13. So šaj javer te slučinel pe ako siem česna ki buti?

¹³ Ov svesno bašo adava kaj tlo ponašibe ki buti šaj te anel slava e Jehovaske. Akava dela amen panda jekh pričina soske valjani te uživina ki amari buti (Tit 2:9, 10). Šaj čak te slučinel pe nekoj taro tle kolege te mangel te proučinel i Biblija taro tlo šukar primer. (Čitin Izreki 27:11; 1. Petrovo 2:12.)

14-16. Bašo so valjani te razmislina keda birinaja buti?

¹⁴ Ki Biblija nane spisako koja buti o hristijanja valjani te prifatinen, a koja na. Ama ki late isi načelija so šaj te pomožinen amenge te ana šukar odluke keda kerela pe lafi baši buti (Izreki 2:6). Džikote koristinaja o bibliska načelija, šaj te puča amen akala pučiba.

 ¹⁵ Dali akaja buti rodela mandar te kerav nešto so o Jehova vakerela kaj tano pogrešno? Amen siklilem kola bukja o Jehova mrzinela, sar soj o čoribe hem o hovajbe (2. Mojseeva 20:4; Dela 15:29; Efešanite 4:28; Otkrovenie 21:8). Amen na prifatinaja buti koja soj tani protiv e Jehovaskere načelija. (Čitin 1. Jovanovo 5:3.)

¹⁶ Dali akale bukjaja poddržinava nešto so o Jehova osudinela? Na primer, so ako nudinela pe tuke te kere buti sar čistači ko nesavo kazino ili obložuvalnica?  Nane ništo pogrešno ko adava te kerel pe buti sar čistači. Ama, tu džanea kaj o komari tano jekh vrsta alčnost hem o Jehova mrzinela adava. Iako tu lično na khelea komari, ama adalea so kerea buti ko asavko than, zarem na poddržinea adava so o Jehova mrzinela? (1. Korinkjanite 6:10; 1. Timotej 3:8).

17. So ka pomožinel amenge te ana odluke so ka oven ugodna e Devleske?

¹⁷ Keda koristinaja e Devleskere načelija, amen šaj te ova sar o manuša soj tane opišime ko Evreite 5:14, kola so lengiri „sposobnost haljojbaske preku iskustvo tani vežbimi te razlikujnel o ispravno hem o pogrešno“. Puč tut: „Dali ka sopkinav e javeren ako prifatinava akaja buti? Dali ka valjani baši akaja buti te mukhav me bračno partnere hem e čhaven hem te džav ki javer phuv? Sar adava ka vlijajnel upri lende?“

18. Soske šaj te ovel pharo te koncentririna amen ko amaro obožavibe?

¹⁸ Šaj te ovel pharo o služibe e Jehovaske te čhiva le ko prvo than, posebno ko akava „but pharo vreme“ (2. Timotej 3:1). Nane lokho te arakhel pe hem te zadržinel pe buti. Džangjola pe, amen valjani te grižina amen amare familijake, ama džanaja kaj amaro obožavibe tano ko prvo than. Na smejnaja te dozvolina o materijalna bukja te oven amenge najvažna ko životo (1. Timotej 6:9, 10). Sar šaj te pomožinel amenge i sposobnost ’te procenina soj tano najvažno‘ te koncentririna amen ko amaro obožavibe e Jehovaske hem ko isto vreme te grižina amen amare familijake? (Filipjanite 1:10).

19. Sar i doverba ko Jehova ka pomožinel amen te ova uramnotežena baši amari buti?

 ¹⁹ Te ovel tut celosno doverba ko Jehova. (Čitin Izreki 3:5, 6.) O Devel džanela so točno valjani amenge hem but grižinela pe amenge (Psalm 37:25; 1. Petrovo 5:7). Leskoro Lafi vakerela: „Ko tumaro životo te na ovel tumen mangipe sprema o pare, nego oven zadovolna adalea so isi tumen. Soske, ov [o Devel] vakergja: ’Nikogaš nane te mukhav tut hem nane te iranav tuke mlo dumo‘“ (Evreite 13:5). O Jehova na mangela stalno te sekirine tut sar ka grižine tut tle familijake. Ov stalno sikavgja kaj šaj te grižinel pe bašo potrebe ple narodoskere (Matej 6:25-32). Bizo razlika savi tani amari situacija, amen redovno proučinaja e Devleskoro Lafi, propovedinaja o šukar haberi hem siem prisutna ko amare hristijanska sostanokija (Matej 24:14; Evreite 10:24, 25).

20. Sar šaj te živina ednostavno životo?

²⁰ Tli jakh neka ovel koncentririmi samo ki jekh buti. (Čitin Matej 6:22, fusnota, 23.) Adava značinela te živina ednostavno životo te šaj te koncentririna amen te služina e Jehovaske. Na smejnaja te dozvolina o pare, o udobno životo hem i najnevi tehnologija te oven amenge považna taro amaro amalipe e Devlea. Adaleske, so ka pomožinel amenge te čhiva ko prvo than o najvažna bukja? Amen mora te da sa amendar te na khuva ko borči. Ako više isi tut borči, ker tuke plani te tiknjare le ili te isplatine le. Ako na pazinaja, o materijalna bukja šaj te len amendar but vreme hem sila, hem šaj nane te ovel amen vreme te molina amen, te proučina hem te dža ki služba. Namesto te dozvolina  o materijalna bukja te komplicirinen amaro životo, amen mangaja te sikljova te ova zadovolna osnovna bukjencar sar soj hajbe hem urajbe (1. Timotej 6:8). Bilo savi te ovel amari situacija, ka ovel šukar često te ispitina save tane amare okolnostija te dikha dali šaj te služina e Jehovaske ki pobari mera.

21. Soske valjani te odlučina so ka ovel amenge ko prvo than ko amaro životo?

²¹ Te oven tut ispravna prioritetija. Valjani mudro te koristina amaro vreme, sila hem materijalna bukja.  Ako na pazinaja o bukja so nane doborom važna, sar soj o obrazovanie ili o pare, šaj te len amaro skapoceno vreme. O Isus vakergja: „Najangle roden o carstvo“ (Matej 6:33). O odluke so anaja len, amare navike, adava so keraja sekova dive hem amare celija sikavena soj amenge ko prvo than ko amaro vilo.

22-23. a) Koja tani i najvažno buti so šaj te kera la sar hristijanja? b) So ka pomožinel amenge te uživina ki amari buti?

²² I najvažno buti so šaj te kera la tani te služina e Jehovaske. Jekh glavno način sar šaj te služina leske tano agjaar so ka propovedina o šukar haberi e javerenge (Matej 24:14; 28:19, 20). Sar o Isus, mangaja te da amendar sa te kera akaja buti. Nesave selingje pe ko thana kote so isi pobari potreba propovedibaske. A javera sikljovena javer čhib te šaj te propovedinen e manušenge ki lengiri čhib. Ker lafi adalencar so kergje asavke promene hem puč len bašo adava. Ola ka vakeren tuke kaj lengoro životo akana tano pobahtalo hem isi le pobari smisla. (Čitin Izreki 10:22.)

²³ Avdive, but džene te šaj te obezbedinen ple familijake o najosnovna bukja kerena but saatija buti pa čak ko poviše thana. O Jehova džanela adava hem ceninela sa so keraja te grižina amen amare familijake. Bizi razlika savi buti keraja, mangaja te ova sar o Jehova hem o Isus kola so kerena but buti. Hem ma te bistra kaj amari najvažno buti tani te služina e Jehovaske hem te propovedina o šukar haberi bašo e Devleskoro Carstvo. Adava ka kerel amen te ova čače bahtale.