Dži okolende so mangena e Jehova hem leskoro Lafi, i Biblija:

„Ka džanen o čačipe, hem o čačipe ka oslobodinel tumen“, vakergja o Isus (Jovan 8:32). Razmislin sar osetingjan tut keda prvo puti doznajngjan bašo čačipe tari Biblija! Vozbudlivo sine te džane kaj ko akava sveto soj pherdo hovajbaja, amen šaj te sikljova o čačipe (2. Timotej 3:1).

O Jehova mangela te džana o čačipe. Hem adaleske so mangaja e manušen, amen vakeraja lenge bašo čačipe. Ama te šaj te služina e Jehovaske valjani nešto poviše. Mora but te trudina amen te živina sar hristijanja soske but ceninaja e Jehovaskere načelija. O Isus objasningja jekh važno način sar šaj te sikava e Devleske kaj mangaja le. Ov vakergja: „Ako ikerena mle zapovedija, ka ačhoven ko mlo mangipe, sar me so ikergjum o zapovedija mle Dadeskere hem ačhiljum ko leskoro mangipe“ (Jovan 15:10).

O Isus čače mangela ple Dade hem kerela sa so rodela lestar leskoro Dad. Ako živinaja sar o Isus, o Jehova ka mangel amen hem ka ova čače bahtale. Sar so vakergja o Isus, „ako džanena akala bukja, bahtale sien keda kerena len“ (Jovan 13:17).

Nadinaja amen kaj akaja publikacija ka pomožinel tuke te živine sprema o čačipe tari Biblija hem te ove e Devleskoro amal. Molinaja amen tlo mangipe sprema o Devel te bajrol hem te ačhove „ko e Devleskoro mangipe“ hem ’te nadine tut ko večno životo‘ (Juda 21).