Mangle phraljalen hem phenjalen,

O mangipe sprema o Jehova hem o manuša pottikninela amen te kera adava soj pišimo ki Biblija: „Džan hem keren učenikija taro manuša taro sa o narodija, hem krstinen len“ (Mat. 28:19, 20; Mar. 12:28-31). O nesebično mangipe šaj te vlijajnel upro okola so ispravno dikhena ko večno životo (Apo. 13:48).

Angleder, koncentririnaja amen sine te pamtina o prezentacie hem te da publikacie. Akana valjani te trudina amen te ova pošukar ko keribe lafi e manušencar. Mangaja te sikava lenge mangipe adalea so ka kera lafi bašo teme so interesinela len. Adava značinela kaj valjani te prilagodina amen hem šukar te razmislina bašo so sekirinena pe hem so interesinela len. Sar akaja brošura ka pomožinel amen te kera adava?

Ki akaja brošura isi 12 lekcie kola so ka pomožinen amenge te oven amen osobine so valjanena amenge te šaj te sikava mangipe hem te pomožina e manušenge te oven e Hristoseskere učenikija. Sekoja lekcija tani temelimi ko biblisko izveštaj ko kova so o Isus ili javer hristijani taro prvo veko sikavgje nesavi osobina ki služba. Amari cel nane te pamtina prezentacie nego te roda načinija sar te sikava kaj mangaja e manušen. Iako sekoja osobina tani važno baši sekoja granka tari amari služba, ka dikha sar nesave osobine tane posebno važna keda počminaja razgovorija, keda keraja povtorna posete ili keda vodinaja bibliska kursija.

Džikote razgledinea sekoja lekcija, šukar razmislin sar šaj te sikave adaja osobina keda kerea lafi e manušencar ko than kote so živinea. Trudin tut te bajrare tlo mangipe sprema o Jehova hem o manuša. Adava ka pomožinel tuke poviše taro bilo so javer te ispolnine tli cel te pomožine e manušenge te oven e Isuseskere učenikija.

But ceninaja i čest so šaj zaedno te sorabotina tumencar (Sof. 3:9). O Jehova neka blagoslovinel tumen ponadari da džikote sikavena e manušenge mangipe hem pomožinena len te oven e Isuseskere učenikija!