LEKCIJA 19
Dali e Jehovaskere svedokija tane o čačutne hristijanja?
Amen sar e Jehovaskere svedokija verujnaja kaj siem o čačutne hristijanja. Soske? Ki akaja lekcija ka doznajne nekobor pričine. Ka dikha ko so temelinena pe amare veruvanja, soske phiravaja o anav e Jehovaskere svedokija hem dali maškar amende isi mangipe.
1. Ko so temelinena pe e Jehovaskere svedokongere veruvanja?
O Isus vakergja: „[E Devleskoro] lafi tano čačipe“ (Jovan 17:17). Isto sar o Isus, amen da sar e Jehovaskere svedokija sekogaš temelingjem amare veruvanja ki Biblija. Na primer, dikh sar kergjem adava ko početok tari amari sovremeno istorija. Ko krajo taro 19-to veko jekh grupa iskrena manuša počmingje šukar te proučinen i Biblija zaedno, te šaj te otkrinen so oj čače sikavela. Ola temelingje pumare veruvanja ki Biblija, iako adava sine različno taro adava so sikavela sine i crkva. Palo adava, ola počmingje te vakeren e javerenge adava so siklile tari Biblija. a
2. Soske phiravaja o anav e Jehovaskere svedokija?
O Jehova bašo ple sluge vakerela kaj tane leskere svedokija, soske ola vakerena o čačipe baši leste (Evreite 11:4—12:1). Na primer, ko purano vreme o Devel vakergja ple narodoske: „Tumen sien mle svedokija“. (Čitin Isaija 43:10.) Bašo Isus vakerela pe kaj tano „Verno svedoko“ (Otkrovenie 1:5). Adaleske, ko 1931 berš, amen lelem o anav e Jehovaskere svedokija. Bahtale siem so phiravaja adava anav.
3. Sar e Jehovaskere svedokija sikavena mangipe sar so sikavgja o Isus?
O Isus manglja ple učenikon doborom but so ola sine leske sar familija. (Čitin Marko 3:35.) Isto agjaar, iako siem ko celo sveto, amen da sar e Jehovaskere svedokija siem sar jekh složno familija. Adaleske vikinaja jekh jekhe phrala hem phene (Filimon 1, 2). Isto agjaar, šunaja i zapoved: „Mangen sa e phralen“ (1. Petrovo 2:17). Amen sikavaja amaro mangipe ko razna načinija. Na primer, agjaar so pomožinaja amare phralenge hem phenjenge keda valjani lenge pomoš.
DOZNAJN POVIŠE
Sikljov poviše baši e Jehovaskere svedokongiri istorija hem dikh javera dokazija so sikavena kaj siem o čačutne hristijanja.
4. Amen temelinaja amare veruvanja ki Biblija
O Jehova prorokujngja kaj ka avel vreme keda leskere sluge pošukar ka haljoven o čačipe tari Biblija. Čitin Daniel 12:4, a palo adava keren lafi bašo akava pučibe:
-
So „ka bajrol“ maškar e Devleskoro narodo?
Dikh sar jekh grupa manuša, kolendar so jekh vikinela pe sine Čarls Rasel, proučingje e Devleskoro Lafi. Dikh o VIDEOKLIPI, a palo adava keren lafi bašo akava pučibe:
-
Ko kova način o Rasel hem leskere sorabotnikija proučingje i Biblija?
Dali džanljan?
Ponekogaš kergjem promene ko amare veruvanja. Soske? Te vakera jekh primer. Keda ikljola o kham, leskiri svetlina hari po hari kerela pojasno te dikha o bukja soj okolu amende. Agjaar o Devel hari po hari pomožinela amenge pošukar te haljova leskoro Lafi. (Čitin Izreki 4:18.) Keda meninaja nesave amare veruvanja, adava nane soske i Biblija meningja pe, nego soske amen pošukar haljovaja la.
5. Amen živinaja sprema o anav so phiravaja
Soske vikinaja amen e Jehovaskere svedokija? Dikh o VIDEOKLIPI, a palo adava keren lafi bašo akava pučibe:
-
Soske odgovorinela amenge o anav e Jehovaskere svedokija?
Soske o Devel biringja manušen te oven leskere svedokija? Adaleske so isi but hovajba bašo Devel, leskere svedokija vakerena o čačipe baši leste. Te dikha duj taro adala hovajba bašo Devel.
Nesave religie sikavena kaj o Devel mangela te koristina slike hem javera predmetija keda obožavinaja le. Ama, dikh so vakerela i Biblija. Čitin 3. Mojseeva 26:1, a palo adava keren lafi bašo akava pučibe:
-
Dali čače o Devel mangela te koristina slike hem javera predmetija keda obožavinaja le?
Nesave verska vodačija sikavena kaj o Isus tano o Devel. Ama, dikh so vakerela i Biblija. Čitin Jovan 20:17, a palo adava keren lafi bašo akala pučiba:
-
Dali o Isus čače tano o Devel?
-
Sar osetinea tut bašo adava so o Devel bičhalgja ple Svedokon te vakeren tuke o čačipe baši leste hem baši leskoro Čhavo?
6. Amen sikavaja mangipe jekh jekheske
I Biblija sporedinela e hristijanen e različna deloncar taro manušikano telo. Čitin 1. Korinkjanite 12:25, 26, a palo adava keren lafi bašo akala pučiba:
-
So valjani te keren o čačutne hristijanja keda nekoj lendar trpinela nevolje?
-
Dali dikhljan sar e Jehovaskere svedokija sikavena mangipe jekh jekheske?
Keda e Jehovaskere svedokija ko jekh delo tari Phuv isi len nevolje, o javera Svedokija taro celo sveto odma pomožinena lenge. Te šaj te dikhe jekh asavko primer, dikh o VIDEOKLIPI, a palo adava keren lafi bašo akava pučibe:
-
Sar e Jehovaskere svedokija pomožingje jekh jekheske pali jekh prirodno katastrofa?
NESAVE ŠAJ VAKERENA: „E Jehovaskere svedokija tane nevi religija“.
-
Panda taro kova vreme vakerela o Jehova ple slugenge kaj tane leskere svedokija?
SO SIKLILEM
E Jehovaskere svedokija tane o čačutne hristijanja. Ko celo sveto isi e Jehovaskere svedokija hem maškar amende isi mangipe. Amare veruvanja temelinena pe ki Biblija hem amen propovedinaja o čačipe bašo Jehova.
Sar ka odgovorine?
-
Soske vikinaja amen e Jehovaskere svedokija?
-
Sar ponašinaja amen jekh jekhea?
-
So mislinea, dali e Jehovaskere svedokija tane o čačutne hristijanja?
ISTRAŽIN
Sikljov poviše baši amari istorija.
Jehovinite svedoci — vera na delo, 1. del: Izlez od temninata (1:00:53)
Dikh sar e Jehovaskere svedokija otkringje jekh hovavno sikljojbe.
Dobin o odgovorija ko najčesta pučiba bašo e Jehovaskere svedokija.
„Najčesta pučiba bašo e Jehovaskere svedokija“ (delo ki amari internet-stranica)
O Stiven mrzingja doborom but e manušen taro javera rase so čak napadingja len. Čitin so pomožingja leske te meninel pe otkeda zapoznajngja e Jehovaskere svedokon.
„Životot mi stanuvaše sé pološ“ (Stražarska kula taro 1 juli 2015)
a Amaro glavno spisanie, Stražarsko kula, taro 1879 berš, redovno objavinela o čačipe tari Biblija.