LEKCIJA 22
Sar šaj tu da te propovedine o šukar haberi?
Džikote sikljovea o bibliska čačipa, šaj mislinea tuke: „Sarine valjani te džanen bašo akava“. Hem adava tano točno. Ama, šaj isi tut trema keda valjani te vakere e javerenge bašo adava so sikliljan. Te dikha sar šaj te nakhave adaja trema hem sar šaj te počmine bahtalipaja te propovedine o šukar haberi tari Biblija.
1. Sar šaj te vakere adava so sikliljan okolenge kas so pendžarea?
E Isuseskere učenikija vakergje: „Amen našti te na kera lafi bašo adava so dikhlem hem šungjem“ (Dela 4:20). Ola doborom but ceningje o čačipe so mangle te vakeren le kobor so šaj poviše manušenge. Dali tu da osetinea tut agjaar? Tegani rode prilike te vakere tle familijake hem tle amalenge bašo adava so sikliljan, ama ma bistre te kere adava ko ljubezno način hem te sikave lenge poštovanje. (Čitin Kološanite 4:6.)
Sar šaj te počmine razgovor?
-
Keda kerea lafi nekasaja tari tli familija, počmin te kere lafi baši nesavi biblisko tema, agjaar so ka vakere: „Sikliljum nešto interesno akava kurko“.
-
Vaker jekh ohrabruvačko stiho tari Biblija jekhe amaleske kova soj tano nasvalo ili sekirimo.
-
Keda o kolege tari buti pučena tut sar nakhljan akava kurko, vaker lenge so sikliljan tari Biblija ko tlo biblisko kursi ili ko sostanok.
-
Sikav tle amalenge amari internet-stranica jw.org.
-
Kanin nekas ko tlo biblisko kursi ili sikav leske sar šaj korkori te rodel biblisko kursi ki jw.org.
2. Soske tano šukar te čhive tuke cel te propovedine zaedno e sobraniea?
E Isuseskere učenikija na propovedinena sine samo e manušenge kaste so pendžarena sine. O Isus „bičhalgja len duj po duj... ki sekoja diz“ te propovedinen (Luka 10:1). Adaleske so ov agjaar organiziringja len, ola šaj sine te propovedinen poviše manušenge. Isto agjaar, adava so o učenikija zaedno propovedingje kergja len bahtale (Luka 10:17). Dali tu da šaj te čhive tuke cel te propovedine zaedno e sobraniea?
DOZNAJN POVIŠE
Sikljov sar šaj te nakhave i trema te propovedine hem dikh kobor bahtalo ka ove keda ka vakere o šukar haberi.
3. O Jehova ka ovel tuja
Nesave šaj mangena te propovedinen, ama darana so ka mislinen o manuša baši lende hem sar ka reagirinen.
-
Dali isi tut trema te vakere e javerenge adava so sikliljan? Soske?
Dikh o VIDEOKLIPI, a palo adava keren lafi bašo akava pučibe:
-
Sar akala terne Svedokija nakhavgje pumari dar?
Čitin Isaija 41:10, a palo adava keren lafi bašo akava pučibe:
-
Sar šaj te pomožinel tuke i molitva keda daraja te propovedine?
Dali džanljan?
But taro e Jehovaskere svedokija mislingje kaj nikogaš ka našti te propovedinen o šukar haberi e javerenge. Na primer, o Sergej osetinela pe sine kaj na vredinela hem sine leske pharo te kerel lafi e javerencar. Ama, počmingja te proučinel i Biblija. Ov vakerela: „Iako darava sine, počmingjum te kerav lafi e javerencar bašo adava so sikljovava sine. Iznenadingjum man kaj adava so kerava sine lafi e javerencar baši Biblija, kergja te ovel man poviše doverba ki mande. Isto agjaar, adava kergja pozorali mli vera“.
4. Sikav poštovanje
Keda vakerea e javerenge o šukar haberi, razmislin na samo so ka vakere nego isto agjaar sar ka vakere. Čitin 2. Timotej 2:24 hem 1. Petrovo 3:15, a palo adava keren lafi bašo akala pučiba:
-
Sar šaj te primenine akala stihija keda kerea lafi e javerencar baši Biblija?
-
Šaj nekoj tari tli familija ili taro tle amala nane te soglasinen pe tuja. So valjani te kere, a so na valjani te kere?
-
Soske tano pošukar te koristine pučiba ko taktično način, namesto silaja te vakere lenge so te verujnen?
5. O propovedibe anela bahtalipe
O Jehova dengja e Isuseske zadača te vakerel o šukar haberi. Sar o Isus dikhlja ki adaja zadača? Čitin Jovan 4:34, a palo adava keren lafi bašo akala pučiba:
-
O šukar hajbe ikerela amen ko životo hem kerela amen bahtale. Soske o Isus vakergja kaj te kerel pe e Devleskiri volja, kote soj vklučimo te vakerel pe o šukar haberi, tano sar te ha nesavo hajbe?
-
So mislinea, soske šaj te ova bahtale keda propovedinaja o šukar haberi?
Predlogija
-
Ko sostanok Amaro životo hem služba primetin ko kola načinija šaj te počmine razgovor.
-
Ker lafi okolea so proučinea so valjani te kere te šaj te ovel tut zadača ko sostanok Amaro životo hem služba. Adala zadače ka pomožinen tuke te sikljove sar te objasnine e javerenge ko so verujnea.
-
Koristin o delija „Nesave šaj vakerena“ ili „Nesave šaj pučena“ te šaj te vežbine sar te odgovorine ko pučiba ili prigovorija so često šunaja len.
NESAVE ŠAJ PUČENA: „So isi nevo ki tute?“
-
Sar šaj te koristine adaja prilika te vakere so sikliljan ko tlo biblisko kursi?
SO SIKLILEM
Te propovedine o šukar haberi zaedno e javerencar anela bahtalipe hem adava nane doborom pharo kobor so šaj mislinea.
Sar ka odgovorine?
-
So pottikninela amen te vakera e javerenge o šukar haberi?
-
Sar šaj te sikave poštovanje keda propovedinea?
-
So ka pomožinel tuke te nakhave i trema?
ISTRAŽIN
Dikh štar ednostavna načinija sar šaj te propovedine o šukar haberi agjaar so ka koristine i vizit-kartička bašo jw.org.
Sikljov bašo štar osobine so šaj te pomožinen tuke te propovedine o šukar haberi.
„Dali sian spremno te ove ribari so astarela manušen?“ (Stražarsko kula taro septemvri 2020)
Dikh sar jekh primer tari Biblija šaj te del amen hrabrost te propovedina o šukar haberi čak keda siem terne.
Sikljov sar šaj te kere lafi baši Biblija tle familijaja kola so na pendžarena e Jehova.
„Dopri do srceto na tvoite najbliski“ (Stražarska kula taro 15 mart 2014)
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
