O meribe anela bari dukh hem bari žal. Adaleske i Biblija bašo meribe vakerela kaj tano dušmani (1. Korinkjanite 15:26). Ki lekcija 27 siklilem kaj o Jehova ka uništinel akale dušmane. Ama, so ka ovel e manušencar kola so više mule? Ki akaja lekcija, tu ka sikljove poviše bašo panda jekh but šužo vetuvanje taro Jehova. Ov vetingja kaj ka voskresninel milijarde manušen, javere lafencar ka iranel len palem ko životo te šaj te ovel len prilika te živinen zasekogaš. Ama, dali o voskresenie čače ka ovel? Dali o manuša ka voskresninen te živinen upre ko nebo ili tele ki Phuv?

1. So mangela te kerel o Jehova amare manglenge so mule?

O Jehova edvaj adžikerela te iranel palem ko životo amare manglen so mule. Jekh verno manuš kova so vikinela pe sine Jov sine uverimo kaj o Devel nane te bistrel le keda ka merel. Ov vakergja e Devleske: „Tu ka vikine man, a me ka odgovorinav tuke [taro grobo]“. (Čitin Jov 14:13-15.)

2. Kotar džanaja kaj o mule šaj te voskresninen?

Keda o Isus sine ki Phuv, o Devel dengja le mokj te voskresninel e manušen. O Isus voskresningja jekhe čhaja so sine la 12 berš hem jekhe udovicakere čhave (Marko 5:41, 42; Luka 7:12-15). Pokasno, leskoro amal o Lazar mulo. Iako o Lazar sine mulo hem parumo više štar dive, o Isus voskresningja le. Otkeda molingja pe e Devleske, o Isus vikingja: „Lazar, ikljov! Hem „o mulo iklilo“ — dživdo! (Jovan 11:43, 44). Zamislin tuke samo kobor sine bahtale e Lazareskiri familija hem leskere amala!

3. Savi nadež isi tle manglenge so mule?

I Biblija vetinela kaj „o Devel ka voskresninel [e mulen]“ (Dela 24:15). Okola kolen so o Isus voskresningja keda sine ki Phuv na gele upre ko nebo (Jovan 3:13). O Isus voskresningja len te živinen akate ki Phuv hem ola sine bahtale bašo adava. Slično agjaar, o Isus panda hari ka voskresninel milijarde manušen te živinen večno ko raj ki Phuv. Ov vakergja kaj o Devel ka setinel pe ko sa okola soj tane ko grobo hem kaj ka oven voskresnime. O Devel čak ka setinel pe ko manuša kolenge so nikoj više na setinela pe (Jovan 5:28, 29).

 DOZNAJN POVIŠE

4. O Isus dokažingja kaj šaj te voskresninel e mulen

Doznajn poviše bašo adava so kergja o Isus ple amaleske e Lazareske. Čitin Jovan 11:14, 38-44, a palo adava keren lafi bašo akala pučiba:

• Kotar džanaja kaj o Lazar čače sine mulo? (Dikh o stiho 39.)

• So mislinea, ako o Lazar gelo ko nebo dali o Isus bi iranela le sine te živinel tele ki Phuv?

Dikh o VIDEOKLIPI.

5. But džene ka oven voskresnime!

Čitin Psalm 37:29, a palo adava keren lafi bašo akava pučibe:

• Kote ka živinen o milijarde manuša so ka oven voskresnime?

O Isus nane te voskresninel samo okolen so služingje e Jehovaske nego hem but javeren. Čitin Dela 24:15, a palo adava keren lafi bašo akava pučibe:

• Koj mangea te voskresninel te šaj palem te dikhe le?

• Sar i nadež bašo voskresenie utešingja hem ohrabringja e Felisitakere roditelen?

 SO SIKLILEM

I Biblija vetinela kaj milijarde manuša kola so mule ka oven voskresnime. O Jehova mangela ola palem te živinen hem dengja mokj e Isuseske te voskresninel len.

Sar ka odgovorine?

• Kotar džanaja kaj o Jehova hem o Isus edvaj adžikerena te voskresninen e mulen?

• Kote ka živinen o milijarde manuša so ka voskresninen — ko nebo ili ki Phuv? Soske mislinea agjaar?

• So uverinela tut kaj tle mangle ka živinen palem?