LEKCIJA 08
Tu šaj te ove e Jehovaskoro amal
O Jehova mangela te pendžare le pošukar. Soske? Ov džanela kaj kobor poviše ka sikljove bašo leskere osobine, leskiri namera hem o način sar postapinela e manušencar, doborom poviše ka mange te ove leskoro amal. Ama, dali čače šaj te ove e Devleskoro amal? (Čitin Psalm 25:14.) So šaj te kere te šaj te ove leskoro amal? I Biblija dela odgovor ko akala pučiba hem sikavela soske o amalipe e Jehovaja tano o najvažno amalipe so šaj te ovel tut.
1. Savi pokana dela tut o Jehova?
„Oven paše e Devlea, hem ov ka ovel paše tumencar“ (Jakov 4:8). So značinela akava? O Jehova kaninela tut te ove leskoro amal. Nesavenge šaj te ovel pharo te zamislinen peske te oven amala e Devlea adaleske so našti te dikhen le. Ama, ko plo Lafi, i Biblija, o Jehova otkrinela amenge sa so valjani te džana bašo leskere osobine te šaj te ova paše lea. Keda čitinaja e Devleskiri poraka amenge soj pišimi ki Biblija, amaro amalipe e Jehovaja bajrovela iako našti te dikha le.
2. Soske o Jehova tano o najšukar amal so šaj te ovel tut?
Nikoj na mangela tut poviše taro Jehova. Ov mangela te ove bahtalo hem te rode lestar pomoš keda valjani tuke. Tu šaj sa tlo pharipe te frde leske, soske ov grižinela pe tuke (1. Petrovo 5:7). O Jehova sekogaš tano spremno te pomožinel, te utešinel hem te šunel ple amalen. (Čitin Psalm 94:18, 19.)
3. So rodela o Jehova taro ple amala?
O Jehova mangela sa e manušen, ama „paše amal tano okolencar soj tane česna“ (Izreki 3:32). Ov rodela taro ple amala te keren adava so ov vakerela kaj tano šukar, a te na keren adava so ov vakerela kaj tano lošno. Nesave šaj mislinena kaj but pharo tano te keren sa adava so rodela o Jehova. Ama, o Jehova tano milostivo hem haljovela amen. Ov prifatinela sekole manuše so čače mangela le hem so but trudinela pe te kerel leskiri volja (Psalm 147:11; Dela 10:34, 35).
DOZNAJN POVIŠE
Sikljov poviše bašo adava sar šaj te ove e Jehovaskoro amal hem dikh soske ov tano o najšukar amal so šaj te ovel tut.
4. O Avraam sine e Jehovaskoro amal
Taro biblisko izveštaj bašo Avraam (ili Avram) šaj te dikha so značinela te ove e Devleskoro amal. Čitin bašo Avraam ki 1. Mojseeva 12:1-4, a palo adava keren lafi bašo akala pučiba:
-
So vakergja o Jehova e Avraameske te kerel?
-
So vetingja leske o Jehova?
-
So kergja o Avraam?
5. So očekujnela o Jehova taro ple amala?
Obično amen očekujnaja nesave bukja taro amare amala.
-
Sar mangea tle amala te postapinen tuja?
Čitin 1. Jovanovo 5:3, a palo adava keren lafi bašo akava pučibe:
-
So očekujnela o Jehova taro ple amala?
Te šaj te ova poslušna e Jehovaske, amen šaj ka valjani te kera promene ko adava sar ponašinaja amen hem ki amari ličnost. Čitin Isaija 48:17, 18, a palo adava keren lafi bašo akava pučibe:
-
Soske o Jehova očekujnela taro ple amala te keren promene?
Jekh šukar amal ka setinkerel amen ko bukja so ka zaštitinen amen hem ka oven amenge korisna. O isto kerela o Jehova ple amalenge
6. So kerela o Jehova ple amalenge
O Jehova pomožinela ple amalenge te ikljoven ko krajo e problemencar. Dikh o VIDEOKLIPI, a palo adava keren lafi bašo akava pučibe:
-
Sar o Jehova pomožingja e džuvljake taro akava videoklipi te ikljovel ko krajo ple negativna mislencar hem čuvstvoncar?
Čitin Isaija 41:10, 13, a palo adava keren lafi bašo akala pučiba:
-
So vetinela o Jehova kaj ka kerel sa ple amalenge?
-
So mislinea, soske o Jehova tano šukar amal?
O paše amal pomožinela tuke keda valjani tuke pomoš. Isto agjaar, o Jehova ka pomožinel tut
7. Te šaj te ova e Jehovaskere amala, valjani te kera lea lafi hem te šuna le
Duj amala ovena popaše keda kerena lafi jekh jekhea. Čitin Psalm 86:6, 11, a palo adava keren lafi bašo akala pučiba:
-
Sar šaj amen te kera lafi e Jehovaja?
-
Sar o Jehova kerela lafi amencar?
Amen keraja lafi e Jehovaja preku i molitva, ov kerela lafi amencar preku i Biblija
NESAVE ŠAJ VAKERENA: „Našti te ova amala e Devlea“.
-
Kova stiho ka koristine te šaj te sikave kaj šaj te ova e Jehovaskere amala?
SO SIKLILEM
O Jehova mangela te ovel tlo amal, hem ov ka pomožinel tuke te šaj te ove lea paše.
Sar ka odgovorine?
-
Sar o Jehova pomožinela ple amalenge?
-
Soske o Jehova rodela ple amalendar te keren promene?
-
Dali o Jehova očekujnela but taro ple amala? Soske mislinea agjaar?
ISTRAŽIN
Sar šaj o amalipe e Devlea te vlijajnel upro tlo životo?
„Jehova — Bog što vredi da se poznava“ (Stražarska kula taro 15 fevruari 2003)
Sikljov sar šaj te ove e Devleskoro amal.
„Kako da stanam prijatel so Bog?“ (Mladite prašuvaat — delotvorni odgovori (tom 2), poglavje 35)
Dikh soske jekh džuvli vakergja kaj o amalipe e Jehovaja spasingja lakoro životo.
Šun nesave tinejdžerija so vakerena bašo adava so osetinena sprema o Jehova.
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
