LEKCIJA 10
Sar šaj te pomožinen tuke o sostanokija e Jehovaskere svedokongere?
Dali sian sine nekogaš ko jekh sostanok taro e Jehovaskere svedokija? Ako panda na, šaj tuke nezgodno te ave prvo puti. Šaj pučea tut: „So slučinela pe ko adala sostanokija? Soske tane važna? Soske valjani te ovav prisutno ki lende?“ Ki akaja lekcija ka sikljove sar adava so ka khede tut e javerencar ko sostanokija ka kerel tut popaše e Devlea hem ka pomožinel tuke lično.
1. Koja tani i najvažno pričina soske khedaja amen?
Dikh sar jekh biblisko pisateli sikavgja koja tani i najvažno pričina soske khedaja amen e javerencar. Ov vakergja: „Maškar o khedimo narodo ka falinav e Jehova“ (Psalm 26:12). Adaleske e Jehovaskere svedokija tane bahtale so khedena pe zaedno. Ko celo sveto ola khedena pe sekova kurko ko grupe kola so vikinena pe sobranija, te falinen e Devle, te giljaven hem te molinen pe. Isto agjaar, nekobor puti ko berš, ola khedena pe ko pobare grupe te obožavinen e Jehova.
2. So ka sikljove ko amare sostanokija?
O sostanokija pomožinena amenge te haljova e Devleskoro Lafi. (Čitin Neemija 8:8.) Ako sian prisutno ko amare sostanokija tu ka sikljove bašo Jehova hem bašo leskere but šuže osobine. Hem kobor poviše ka sikljove bašo leskoro mangipe sprema tute, doborom popaše ka ove lea. Isto agjaar, ka sikljove sar šaj ov te pomožinel tuke te ovel tut bahtalo životo (Isaija 48:17, 18).
3. Sar šaj te pomožinen tuke o manuša kolen so ka zapoznajne ko amare sostanokija?
O Jehova vakerela amenge „te razmislina jekh jekheske te šaj te pottiknina amen te sikava mangipe hem te kera šukaripe, hem ma te mukha amare sostanokija“ (Evreite 10:24, 25). Ko amare sostanokija ka zapoznajne manušen kola so čače grižinena pe jekh jekheske hem kola so, isto sar tute, mangena te sikljoven poviše bašo Devel. Ka šune lendar ohrabruvačka misle tari Biblija. (Čitin Rimjanite 1:11, 12.) Isto agjaar, ka šaj te zapoznajne e javeren kola soj tane bahtale iako šaj isi len problemija. Akala tane samo nekobor pričine soske o Jehova mangela redovno te kheda amen.
DOZNAJN POVIŠE
Dikh so kerela pe ko sostanokija e Jehovaskere svedokongere hem soske vredinela te trudine tut te ove prisutno ki lende.
4. E Jehovaskere svedokongere sostanokija
Ko prvo veko, o hristijanja redovno khedena pe sine te obožavinen e Jehova (Rimjanite 16:3-5). Čitin Kološanite 3:16, a palo adava keren lafi bašo akava pučibe:
-
Sar o prva hristijanja obožavinena sine e Jehova?
Avdive da, e Jehovaskere svedokija redovno khedena pe ko pumare dvorane. Te šaj te dikhe so kerela pe ko lengere sostanokija, dikh o VIDEOKLIPI. Palo adava, dikh i slika taro jekh sostanok ki dvorana hem keren lafi bašo akala pučiba:
-
Kola slična bukja primetinea, ko adava so kerela pe ki dvorana hem ko adava so čitinea ko Kološanite 3:16?
-
So javer svidžinela pe tuke ko videoklipi ili ki slika bašo sostanokija?
Čitin 2. Korinkjanite 9:7, a palo adava keren lafi bašo akava pučibe:
-
Soske ko e Jehovaskere svedokongere sostanokija na rodela pe pare?
Dikh zaedno adalea so proučinela tuja i Biblija bašo so ka kerel pe lafi ko jekh taro sostanokija akava kurko.
-
Kova delo taro sostanok mislinea ka ovel tuke najinteresno ili najkorisno?
Dali džanljan?
Ki internet-stranica jw.org, šaj te arakhe kote hem keda ikerena pe sostanokija ko celo sveto.
-
(1) Ko amare sostanokija šunaja govorija, dikhaja videoklipija hem sikljovaja sar te propovedina hem sar te sikava e javeren. O sostanokija počminena hem završinena giljaja hem molitvaja
-
(2) Ko nesave delija tari programa o prisutna šaj te komentirinen
-
(3) Sarine šaj te aven — murša, džuvlja, phure, terne
-
(4) O vlezi tano besplatno hem ki lende na rodela pe pare
5. Valjani te trudina amen te ova ko sostanokija
Te dikha o primer tari e Isuseskiri familija. Sekova berš, te šaj te džan ko hrami ko Erusalim, ola valjani sine te phiren okolu 100 kilometre hem te nakhen taro but planine. Čitin Luka 2:39-42, a palo adava keren lafi bašo akala pučiba:
-
So mislinea, dali sine lenge lokho te patujnen dži ko Erusalim?
-
Dali isi nešto so šaj te kerel tuke pharo te dža ko sostanokija?
-
So mislinea, soske vredinela te trudine tut te dža ko sostanokija?
I Biblija sikavela kaj tano but važno te kheda amen zaedno e javerencar te obožavina e Jehova. Čitin Evreite 10:24, 25, a palo adava keren lafi bašo akava pučibe:
-
Soske valjani redovno te ova prisutna ko sostanokija?
NESAVE ŠAJ VAKERENA: „Na valjani te dža ko sekova sostanok“.
-
Kova biblisko stiho ili biblisko primer sikavela so mangela o Jehova?
SO SIKLILEM
Ako sian prisutno ko sostanokija ka sikljove poviše bašo Jehova, ka kere tlo amalipe pozoralo lea hem ka obožavine le zaedno e javerencar.
Sar ka odgovorine?
-
Soske o Jehova pottikninela amen te kheda amen zaedno?
-
So ka sikljove ko e Jehovaskere svedokongere sostanokija?
-
Ko kola javera načinija šaj te pomožinen tuke o sostanokija?
ISTRAŽIN
So ako šaj ladžaja te ave ko sostanokija? Dikh sar jekh manuš, kova so osetinela pe sine isto agjaar, siklilo te mangel o sostanokija.
Dikh sar jekh terno manuš uživinela sine ko sostanokija hem so kergja te šaj ponadari da te ovel prisutno lende.
Dikh so mislinena o javera bašo sostanokija.
„Soske te džav ko sostanokija ki dvorana e Jehovaskere svedokongiri?“ (internet statija)
Dikh sar jekh nasilno manuš, kova so sine členi ki jekh banda, meningja plo životo odkeda sine prisutno ko jekh sostanok taro e Jehovaskere svedokija.
„Nikade ne odev bez pištol“ (Stražarska kula taro 1 juli 2014)
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
