O neve bračna parija nadinena pe kaj o bahtalipe so osetingje le keda lele pe, ka trajnel zasekogaš. Ama, dali akava šaj te ovel čače? Oja, šaj! O hristijanja soj tane but berša ko brako hem kola so trudinena pe te ikeren pe ko sovetija tari Biblija, džanena kaj adava šaj te ovel čače.

1. Savo sovet dela i Biblija e romenge?

O Jehova dengja zadača e romeske te ovel poglavari ki familija. (Čitin Efešanite 5:23.) O Jehova očekujnela lestar te anel odluke bašo šukaripe e familijakoro. I Biblija sovetinela e romen: „Mangen tumare romnjen“ (Efešanite 5:25). Sar šaj te keren adava? Jekh rom kova so mangela ple romnja sekogaš postapinela laja ljubezno, bizi razlika dali tane khere ili javere manušencar. Ov zaštitinela la hem dela plo najšukar te šaj te grižinel pe bašo lakere fizička hem emocionalna potrebe (1. Timotej 5:8). A soj najvažno, ov grižinela pe bašo lakere duhovna potrebe (Matej 4:4). Na primer, ov molinela pe hem čitinela i Biblija zaedno ple romnjaja. Keda jekh rom mangipaja grižinela pe ple romnjake, ov arakhela plo amalipe e Jehovaja. (Čitin 1. Petrovo 3:7.)

2. Savo sovet dela i Biblija e romnjenge?

E Devleskoro Lafi vakerela kaj i romni „valjani hor te poštujnel ple rome“ (Efešanite 5:33). Sar šaj te kerel adava? Oj šaj te razmislinel bašo šukar osobine so isi lakere rome hem bašo adava kobor ov trudinela pe te grižinel pe lake hem lengere čhavenge. Isto agjaar, oj šaj te sikavel kaj poštujnela le agjaar so poddržinela leskere odluke, ljubezno tani lea hem kerela lestar šukar lafi keda tani e javerencar. Adava kerela le čak keda lakoro rom na služinela e Jehovaske.

3. Sar šaj tlo brako te ovel pozoralo?

I Biblija vakerela kaj o bračna parija „ka oven jekh telo“ (Matej 19:5). Adaleske, na valjani te dozvolinen hari po hari te oddalečinen pe jekh jekhestar hem agjaar te šudrol lengoro mangipe. Adaleske but važno tano te nakhaven vreme zaedno hem otvoreno hem ljubezno te keren lafi bašo adava so mislinena hem sar osetinena pe. Ola na smejnena te dozvolinen nešto ili nekoj — osven o Jehova — te ovel lenge považno taro pumaro bračno partneri. Posebno mora te pazinen te na oven previše paše nekasaja so nane lengoro bračno partneri.

 DOZNAJN POVIŠE

4. Tumen o roma — mangen hem grižinen tumen šukar tumare romnjenge

5. Tumen o romnja — mangen hem poštujnen tumare romen

I Biblija pottikninela e romnjen te poštujnen pumare romen, bizi razlika dali ola služinena e Jehovaske ili na. Čitin 1. Petrovo 3:1, 2, a palo adava keren lafi bašo akala pučiba:

• Ako tlo rom na služinela e Jehovaske, tu sigurno mangea ov te počminel te kerel adava. So mislinea, kova tano o najšukar način te pomožine leske — celo vreme te svedočine leske ili te ove šukar hem ljubezno romni koja so sikavela poštovanje? Soske mislinea agjaar?

Šukar tano o rom hem i romni te anen odluke zaedno. Ama, nesavo puti i romni šaj isi la  javer mislenje taro lakoro rom. Tegani, i romni šaj ko jekh ljubezno hem smireno način te vakerel plo mislenje. Ama, na valjani te bistrel kaj o Jehova dengja odgovornost e romeske te anel odluke e familijake. Adaleske, oj valjani te del plo najšukar te poddržinel i odluka so ka anel lakoro rom. Adalea oj kerela te ovel šukar atmosfera ko kher. Čitin 1. Petrovo 3:3-5, a palo adava keren lafi bašo akava pučibe:

• Sar dikhela o Jehova ki romni so poštujnela ple rome?

6. O problemija ko brako šaj te rešinen pe

 SO SIKLILEM

O rom hem i romni ka oven bahtale ko pumaro brako ako mangena pe, poštujnena pe hem ako primeninena o bibliska načelija.

Sar ka odgovorine?

• So šaj o rom te kerel te šaj o brako te ovel bahtalo?

• So šaj i romni te kerel te šaj o brako te ovel bahtalo?

• Ako sian ko brako, kova biblisko načelo mangea te primenine?