LEKCIJA 50
Sar šaj tli familija te ovel bahtali? (dujto delo)
O čhave tane poklon taro Jehova. Ov očekujnela taro roditelija šukar te grižinen pe bašo adava poklon. Te šaj te keren adava, o Jehova dela e roditelenge mudra sovetija. Isto agjaar, o Jehova dela sovetija e čhavenge soske lendar da zavisinela dali i familija ka ovel bahtali.
1. Save sovetija dela o Jehova e roditelenge?
O Jehova očekujnela o roditelija te mangen pumare čhaven hem te nakhaven kobor so šaj poviše vreme lencar. Isto agjaar, ov mangela te zaštitinen len hem te vospitinen len agjaar so ka koristinen leskere načelija (Izreki 1:8). Ov vakerela e dadenge: „Vospitinen [tumare čhaven] agjaar sar so vakerela o Jehova“. (Čitin Efešanite 6:4.) O Jehova tano bahtalo keda o roditelija šunena leskere sovetija džikote bajrarena pumare čhaven hem keda adaja odgovornost na dena la nekaske javereske.
2. Save sovetija dela o Jehova e čhavenge?
O Jehova vakerela e čhavenge: „Šunen tumare roditelen“. (Čitin Kološanite 3:20.) Keda o čhave poštujnena hem šunena e roditelen, ola kerena e Jehova hem pumare roditelen bahtale (Izreki 23:22-25). O čhave šaj but te sikljoven taro Isus. Sar čhavo, iako ov sine sovršeno, ov šunela sine hem poštujnela sine ple nesovršeno roditelen (Luka 2:51, 52).
3. So šaj te pomožinel tle familijake te ovel popaše e Devlea?
Ako sian roditeli, sigurno mangea te čhave te mangen e Jehova doborom kobor so tu mangea le. Sar šaj te uspejne ko akava? Ka pomožinel tuke akava biblisko sovet: „Čhiv [e Devleskere lafija] ko tle čhavengoro vilo hem vaker lenge akala lafija keda bešea khere hem keda phirea ko drumo“ (5. Mojseeva 6:7). Te šaj „te čhive“ e Devleskere lafija ko tle čhavengoro vilo valjani te povtorine len. Verojatno taro iskustvo džanea kaj e čhavenge valjani često te povtorine nesavi buti te šaj te pamtinen la. Adaleske, o stiho istakninela kaj valjani redovno te kere lafi tle čhavencar bašo Jehova. Na primer, jekh šukar ideja tani sekova kurko te odvojnen vreme zaedno sar familija te obožavinen e Jehova. Čak ako nane tumen čhave, ka koristinel tumenge sar bračno pari ako sekova kurko proučinena e Devleskoro Lafi zaedno.
DOZNAJN POVIŠE
Dikh sar šaj sarine ki familija te osetinen pe bahtale hem sigurna.
4. Vospitin tle čhaven mangipaja
Nane lokho te vospitinen pe o čhave. Sar šaj i Biblija te pomožinel? Čitin Jakov 1:19, 20, a palo adava keren lafi bašo akala pučiba:
-
Sar šaj o roditelija te sikaven mangipe keda kerena lafi pumare čhavencar?
-
Soske o roditelija nikogaš na valjani keda tane holjame te kazninen pumare čhaven? a
5. Zaštitin tle čhaven
Te šaj te zaštitine tle čhaven, but tano važno te kere lencar lafi baši tema seks, iako adava šaj ka ovel tuke nezgodno. Dikh o VIDEOKLIPI, a palo adava keren lafi bašo akala pučiba:
-
Soske nesave roditelenge tano pharo te keren lafi pumare čhavencar bašo adava so valjani te džanen bašo seks?
-
Sar nesave roditelija objasningje pumare čhavenge adava so valjani te džanen bašo seks?
Sar so sine prorokujmo, e Satanaskoro sveto ovela sa pološno hem pološno. Čitin 2. Timotej 3:1, 13, a palo adava keren lafi bašo akava pučibe:
-
Nesave lošna manuša soj spomnime ko 13 stiho, seksualno zloupotrebinena čhaven. Adaleske, soske tano važno o roditelija te keren lafi pumare čhavencar baši tema seks hem sar te zaštitinen pe taro adala lošna manuša?
Dali džanljan?
E Jehovaskere svedokija kergje but publikacie kola so pomožinena e roditelenge te keren lafi pumare čhavencar baši tema seks hem sar te zaštitinen len taro seksualno zloupotrebibe. Dikh nekobor primerija:
6. Poštujn tle roditelen
O čhave hem o tinejdžerija šaj te sikaven poštovanje pumare roditelenge preku o način sar kerena lencar lafi. Dikh o VIDEOKLIPI, a palo adava keren lafi bašo akala pučiba:
-
Soske tano šukar o terne te sikaven poštovanje pumare roditelenge keda kerena lencar lafi?
-
Sar šaj te keren adava?
Čitin Izreki 1:8, a palo adava keren lafi bašo akava pučibe:
-
Sar valjani o terne te reagirinen keda o roditelija dena len sovetija?
7. Obožavinen e Jehova sar familija
O familie soj tane e Jehovaskere svedokija, sekova kurko odvojnena vreme zaedno te obožavinen e Jehova. Sar šaj te izgledinel asavki Familijarno rat kote so obožavinela pe e Jehova? Dikh o VIDEOKLIPI, a palo adava keren lafi bašo akala pučiba:
-
So valjani te kerel i familija te šaj redovno te ikerel i Familijarno rat?
-
So šaj te keren o roditelija te šaj i Familijarno rat te ovel interesno hem korisno sarinenge? (Dikh i slika ko početok tari lekcija.)
-
So šaj te kerel tumenge pharo redovno te ikeren i Familijarno rat?
Ko purano Izrael, o Jehova očekujnela sine taro roditelija redovno te sikaven pumare čhaven bašo leskoro Lafi. Čitin 5. Mojseeva 6:6, 7, a palo adava keren lafi bašo akava pučibe:
-
Sar šaj tu te primenine akava načelo?
Idee baši Familijarno rat:
-
Spreminen tumen bašo sostanokija.
-
Čitinen hem keren lafi bašo nesavo interesno biblisko izveštaj.
-
Ako isi tut tikne čhave, perav ili pečatin nesave sodržine taro proektija bašo čhave ki jw.org.
-
Ako isi tut čhave soj tinejdžerija, keren lafi baši nesavi statija bašo tinejdžerija ki jw.org.
-
Gluminen jekh biblisko paramis.
-
Dikhen hem keren lafi bašo nesavo videoklipi ki jw.org.
NESAVE ŠAJ VAKERENA: „I Biblija nane e čhavenge. Ola našti haljovena la“.
-
So ka vakere tu?
SO SIKLILEM
O Jehova mangela o roditelija te mangen, te vospitinen hem te zaštitinen pumare čhaven, a o čhave te poštujnen hem te šunen pumare roditelen. Isto agjaar, mangela ola sar familija zaedno te obožavinen le.
Sar ka odgovorine?
-
Sar šaj o roditelija te vospitinen hem te zaštitinen pumare čhaven?
-
Sar šaj o čhave te poštujnen pumare roditelen?
-
Soske tano šukar zaedno sar familija sekova kurko te obožavinen e Jehova?
ISTRAŽIN
So valjani te sikave tle čhaven panda taro tiknipe?
„6 lekcii za koi treba da gi poučime decata“ (Razbudete se! br. 2, 2019)
Dikh so pomožingja jekhe manušeske te ovel šukar dad, iako na džanela sine sar te vospitinel ple čhaven.
Dikh sar o dada šaj te oven popaše pumare čhavencar.
„Kako tatkovcite da ostanat bliski so svoite sinovi?“ (Stražarska kula taro 1 noemvri 2011)
a Keda i Biblija kerela lafi bašo vospitibe e čhaven, tegani mislinela pe kaj o roditelija valjani te sikaven, te opomeninen hem te ukorinen pumare čhaven, a na ko fizičko ili emocionalno maltretiribe (Izreki 4:1).
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
