LEKCIJA 37

So vakerela i Biblija baši buti hem bašo pare

MUKH

Dali sian sine nekogaš sekirimo baši buti ili bašo pare? Šaj te ovel amenge pharo ko isto vreme te grižina amen bašo amare potrebe hem te služina e Jehovaske agjaar sar so ov mangela. I Biblija dela amen praktična sovetija so šaj te pomožinen amenge.

1. So vakerela i Biblija baši buti?

O Devel mangela te uživina ki buti. I Biblija vakerela kaj „nane ništo pošukar taro adava o manuš... te uživinel ko šukar bukja taro plo trudo“ (Propovednik 2:24). O Jehova da kerela but buti. Keda džaja palo leskoro primer agjaar so siem bukjarne, keraja le bahtalo hem amen da siem zadovolna.

I buti tani važno. Ama, na valjani nikogaš te dozvolina te ovel považno taro amaro služibe e Jehovaske (Jovan 6:27). Keda amenge najvažno ko životo te služina e Jehovaske, ov vetinela kaj ka grižinel pe bašo amare materijalna potrebe.

2. Sar valjani te dikha ko pare?

I Biblija vakerela kaj „o pare tane zaštita“, ama isto agjaar vakerela kaj amaro bahtalipe na zavisinela samo taro pare (Propovednik 7:12). Adaleske i Biblija pottikninela amen te na manga o pare, nego te ova zadovolna adalea so isi amen. (Čitin Evreite 13:5.) Keda siem zadovolna adalea so isi amen, nane te manga te ovel amen sa poviše hem poviše, soske adava ka kerel te osetina amen razočarime hem te khuva ko borčija bizi potreba (Izreki 22:7). Isto agjaar, nane te pera ki zamka te khela komari, nagradna igre hem te prifatina ponude so nane realna kola so vetinena amenge kaj sigate ka barvaljova.

3. Sar šaj te sikava kaj siem darežliva?

O Jehova tano darežlivo Devel. Amen šaj te dža palo leskoro primer keda siem darežliva hem spremno delinaja e javerencar adava so isi amen (1. Timotej 6:18). Amen šaj te koristina amare pare agjaar so ka da dobrovolna prilogija ko sobranie hem agjaar so ka pomožina e javerenge keda valjani lenge pomoš — posebno amare phralenge hem phenjenge. E Jehovaske nane važno kobor daja, nego soske daja. Keda daja darežlivo taro vilo, amen ka ova bahtale hem o Jehova ka ovel zadovolno amendar. (Čitin Dela 20:35.)

DOZNAJN POVIŠE

Dikh soske tano šukar te ovel amen o ispravno stavi baši buti hem te ova zadovolna adalea so isi amen.

4. Falin e Jehova agjaar so ka ove šukar rabotniko

Amaro amalipe e Jehovaja valjani te vlijajnel upro amaro stavi sprema i buti. Dikh o VIDEOKLIPI, a palo adava keren lafi bašo akala pučiba:

VIDEOKLIPI: Ker buti e Jehovaske celo vilea (4:39)

So svidžinela pe tuke najviše ko e Džejsoneskoro stavi baši buti hem ko adava sar ponašinela pe ki buti?
So pomožingja e Džejsoneske te ovel le ispravno stavi sprema i buti?

Čitin Kološanite 3:23, 24, a palo adava keren lafi bašo akava pučibe:

Soske tano važno sar dikhaja ki buti?

I buti tani važno. Ama, na valjani nikogaš te dozvolina te ovel považno taro amaro služibe e Jehovaske

5. Ako siem zadovolna adalea so isi amen ka ova bahtale

But manuša trudinena pe te kheden kobor so šaj poviše pare. Ama, i Biblija pottikninela amen te kera nešto javer. Čitin 1. Timotej 6:6-8, a palo adava keren lafi bašo akava pučibe:

So pottikninela amen i Biblija te kera?

Čak ako isi amen but hari šaj te ova bahtale. Dikh o VIDEOKLIPI, a palo adava keren lafi bašo akava pučibe:

VIDEOKLIPI: Ov zadovolno adalea so isi tut (3:20)

Iako nane len but pare, so pomožinela akale familienge te oven bahtale?

So ako isi amen dovolno, ama mangaja poviše? O Isus vakergja jekh sporedba koja so sikavela kobor akava tano opasno. Čitin Luka 12:15-21, a palo adava keren lafi bašo akava pučibe:

So sikliljan tari e Isuseskiri sporedba? (Dikh o stiho 15.)

Čitin Izreki 10:22 hem 1. Timotej 6:10, a palo adava keren lafi bašo akala pučiba:

So mislinea, soj tano považno: Te ovel tut paše amalipe e Jehovaja ili te ovel tut but pare? Soske mislinea agjaar?
Save problemija ka oven amen ako prastaja palo pare?

6. O Jehova ka grižinel pe bašo amare potrebe

Keda ačhovaja bizi buti hem isi amen finansiska problemija, amari vera ko Jehova šaj te ovel ispitimi. Dikh o VIDEOKLIPI te šaj te doznajne so šaj te kera ako isi amen asavke problemija, a palo adava keren lafi bašo akala pučiba:

VIDEOKLIPI: O Jehova ka grižinel pe bašo amare potrebe (6:21)

Save problemija sine e phrale?
So kergja te šaj te ikljovel ko krajo akale problemencar?

Čitin Matej 6:25-34, a palo adava keren lafi bašo akava pučibe:

So vetinela o Jehova kaj ka kerel okolenge so čhivena le ko prvo than ko plo životo?

NESAVE ŠAJ VAKERENA: „Mora te kerav but buti te šaj te grižinav man mle familijake. Našti te džav ko sekova sostanok ko kurko“.

Kova stiho uverinela tut kaj sekogaš tano najšukar te čhiva e Jehova ko prvo than ko amaro životo?

SO SIKLILEM

I buti hem o pare tane važna hem potrebna. Ama, nikogaš na valjani te dozvolina ola te ciden amen taro Jehova.

Sar ka odgovorine?

So šaj te pomožinel tuke te ovel tut ispravno stavi baši buti?
Soske tano šukar te ove zadovolno adalea so isi tut?
Sar šaj te sikave kaj isi tut doverba ko e Jehovaskoro vetuvanje kaj ka grižinel pe ple slugenge?

I lekcija završingjum la ko:

Cel

Dali ko posledna masekija našti sine redovno te dža ko sostanokija adaleske so mora sine te kere buti? Ako oja, razmislin so šaj te menine.

Javer cel:

Your other goal

ISTRAŽIN

Doznajn dali i Biblija vakerela kaj o pare tane lošna?

„Dali parite se koren na seto zlo?“ (internet statija)

Dikh savo dejbe kerela bahtalo e Jehova.

„So vakerela i Biblija bašo dejbe?“ (internet statija)

Dali tano opasno te khela komari?

„Što veli Biblijata — kockanje“ (Razbudete se! taro mart 2015)

Čitin so pomožingja jekhe komardžia hem kriminalco te meninel plo životo.

„Trkačkite konji mi bea golema strast“ (Stražarska kula taro 1 noemvri 2011)

Šaj isto ka interesinel tut

NAJČESTA PUČIBA

Sar izgledinela o biblisko kursi so nudinena e Jehovaskere svedokija?

Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.

OV BAHTALO ZASEKOGAŠ — BIBLISKO KURSI