LEKCIJA 38
O životo — poklon so valjani te cenine
O životo tano pherdo šuže bukjencar kolende so šaj te uživina. Iako isi amen problemija, sepak isi bukja kola so kerena amen bahtale ko životo. Sar šaj te sikava kaj ceninaja o životo sar poklon taro Jehova? Hem koja tani i najvažno pričina soske valjani te cenina o životo?
1. Soske valjani te cenina o životo?
Amen valjani te cenina o životo adaleske so ov tano poklon taro amaro manglo Dad, o Jehova. Lestar „avela o životo“ soske ov stvoringja sa soj dživdo (Psalm 36:9). „Ov tano adava so dela sarinenge o životo, o dišibe hem sa“ (Dela 17:25, 28). O Jehova dela amen sa adava soj amenge potrebno bašo životo. Ama, ov na mangela samo te živina nego hem te uživina ko životo. (Čitin Dela 14:17.)
2. Sar šaj te sikava e Jehovaske kaj ceninaja o životo?
Panda taro momenti keda ti daj ačhili khamni tuja, o Jehova grižinela pe tuke. Jekh Devleskoro sluga, o David, sine vodimo taro Devel te vakerel: „Tle jakhja dikhle man ko vogi mle dajakoro“ (Psalm 139:16). Tlo životo tano but skapoceno e Jehovaske. (Čitin Matej 10:29-31.) E Jehova ka dukhal but ako nekoj mudarela javere ili čak korkori pes a (2. Mojseeva 20:13). Isto agjaar, e Jehova ka dukhal but ako bizi potreba čhivaja amaro ili e javerengoro životo ki opasnost. Ako arakhaja amaro hem e javerengoro životo, amen sikavaja kaj ceninaja o životo sar skapoceno poklon.
DOZNAJN POVIŠE
Dikh ko kola načinija šaj te sikave kaj ceninea o životo sar poklon taro Devel.
3. Arakh tlo sastipe
Adaleske so vetingjem e Jehovaske kaj sekogaš ka kera adava so ov rodela, amen koristinaja celo amaro životo te služina leske. Agjaar, ko jekh simbolično način daja amaro telo sar žrtva e Devleske. Čitin Rimjanite 12:1, 2, a palo adava keren lafi bašo akala pučiba:
-
Sprema akala stihija, soske valjani te arakhe tlo sastipe?
-
So mislinea, sar šaj tu te arakhe tlo sastipe?
4. Pazin ki tli hem ki javerengiri bezbednost
I Biblija ohrabrinela amen te izbegina bukja soj tane opasna amare životoske. Dikh o VIDEOKLIPI te šaj te dikhe nesave načinija sar te pazine ki bezbednost.
Čitin Izreki 22:3, a palo adava keren lafi bašo akala pučiba. Sar šaj te pazine ki tli hem ki javerengiri bezbednost...
-
keda sian khere?
-
keda sian ki buti?
-
keda sportujnea?
-
keda tu vozinea ili nekoj javer?
5. Cenin o životo e bebeskoro so panda na bijandilo
Ko jekh poetsko način o David vakergja kaj o Jehova grižinela pe bašo bebe kova soj panda e dajake ko vogi hem dikhela sar ov bajrovela. Čitin Psalm 139:13-17, a palo adava keren lafi bašo akava pučibe:
-
Keda počminela o životo ko e Jehovaskere jakhja — keda jekh bebe tano začnimo ili keda bijangjovela?
O Jehova preku o zakoni so dengja e Izraelconge zaštitinela sine e khamne džuvlen hem e čhaven so panda na sine bijame. Čitin 2. Mojseeva 21:22, 23, a palo adava keren lafi bašo akala pučiba:
-
Sar dikhela sine o Jehova ko adava ako nekoj nenamerno mudarela sine jekhe bebe kova so panda na bijandilo?
-
So mislinea, sar bi dikhela o Jehova ki nekaste ako ov namerno kerela adava? b
-
So mislinea tu bašo akava?
Ponekogaš šaj čak jekh džuvli koja so ceninela o životo te mislinel kaj nane la javer izbor osven te kerel abortus. Čitin Isaija 41:10, a palo adava keren lafi bašo akava pučibe:
-
Ako nesave džuvlja isi la pritisok te kerel abortus, kastar valjani te rodel pomoš hem soske?
NESAVE ŠAJ VAKERENA: „Ponekogaš o okolnostija tane asavke so e džuvlja nane la javer izbor osven te kerel abortus“.
-
So uverinela tut kaj o Jehova ceninela hem o životo e dajakoro hem e čhaveskoro so panda nane bijamo?
SO SIKLILEM
I Biblija sikavela amen te manga, te cenina hem te arakha amaro hem e javerengoro životo, soske ov tano poklon taro Jehova.
Sar ka odgovorine?
-
So sikavela kaj o Jehova ceninela o životo e manušengoro?
-
Sar osetinela pe o Jehova keda nekoj mudarela nekas javere ili korkori pes?
-
So najviše ceninea ko životo?
ISTRAŽIN
Sar šaj te sikava e Jehovaske kaj siem blagodarna bašo životo so dengja amen sar poklon?
Dali o Devel ka prostinel jekhe džuvljake koja so kergja abortus? Čitin so vakerela i Biblija bašo akava pučibe.
Dikh sar e Devleskoro stavi bašo životo valjani te vlijajnel ko adava savi rekreacija birinaja.
„’Ekstremni sportovi‘ — dali da se rizikuva?“ (Razbudete se! taro 8 januari 2001)
a O Jehova but grižinela pe okolenge soj tane phage vilea (Psalm 34:18). Ov haljovela i dukh hem o čuvstvija okolengere so mangena te mudaren korkori pes hem mangela te pomožinel lenge.
b Okola so angleder kergje abortus na valjani te osetinen pe preterano kriva. O Jehova šaj te prostinel lenge. Bašo poviše informacie, dikh i statija „Što pišuva vo Biblijata za abortusot?“ koja so arakhljola ko delo „Istražin“ ki akaja lekcija.
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
