LEKCIJA 43
Sar valjani o hristijanja te dikhen ko alkohol?
E manušen ko celo sveto isi len različna stavija bašo alkohol. Nesave uživinena te pien ponekogaš keda tane zaedno ple amalencar. Javera odlučinena te na pien ni najhari. A nesave palem piena džikote na makjovena. So vakerela i Biblija bašo alkohol?
1. Dali tano pogrešno te pien pe alkoholna pijalokija?
I Biblija na vakerela kaj tano pogrešno te piel pe alkohol. Sprotivno taro adava, oj vakerela kaj jekh taro but šuže bukja so dengja amen o Devel tani „i mol koja so kerela e manušeskoro vilo bahtalo“ (Psalm 104:14, 15). Nesave verna murša hem džuvlja soj spomnime ki Biblija piena sine alkoholna pijalokija (1. Timotej 5:23).
2. Savo sovet dela i Biblija bašo pijbe alkohol?
O Jehova osudinela o preterano pijbe hem o makjojbe (Galatite 5:21). Ov ko plo Lafi vakerela: „Ma ov okolencar so previše piena mol“ (Izreki 23:20). Adaleske, ako odlučinaja te pija, čak keda siem korkori, na valjani te pija doborom but so ka našti šukar te razmislina hem te kontrolirina amare lafija hem postapke. Isto agjaar, na valjani te pija doborom but so ka kera šteta amare sastipaske. Ako našti kontrolirinaja kobor ka pija, tegani pošukar ka ovel te na pija.
3. Sar šaj te poštujna e javerengere odluke bašo alkohol?
Sekova jekh amendar valjani korkori peske te odlučinel dali ka piel alkoholna pijalokija. Na valjani te sudina nekas ako odlučingja te piel umereno alkohol hem na valjani te kera pritisok upro nekaste ako odlučingja te na piel (Rimjanite 14:10). Ako adava so ka pija ka vlijajnel lošno upro javera, tegani pošukar ka ovel te na pija. (Čitin Rimjanite 14:21.) Ni jekh amendar „te na rodel pli korist, nego i korist e javereskiri“. (Čitin 1. Korinkjanite 10:23, 24.)
DOZNAJN POVIŠE
Dikh kola bibliska načelija šaj te pomožinen tuke te odlučine dali te pie hem kobor te pie. Isto agjaar, dikh so šaj te kere ako isi tut problemija alkoholea.
4. Alkohol — ka pijav ili na?
Sar dikhela sine o Isus ko pijbe alkohol? Te šaj te doznajne o odgovor, razmislin bašo prvo čudo so kergja o Isus. Čitin Jovan 2:1-11, a palo adava keren lafi bašo akala pučiba:
-
So šaj te sikljova taro akava čudo bašo adava sar dikhela sine o Isus ko alkohol hem ko adala so piena alkohol?
-
O Isus na osudingja o pijbe alkohol. Sprema adava, sar valjani te dikha ko okola so odlučinena te pien?
Ama, samo adaleske so o hristijanja šaj te pien alkohol, na značinela kaj adava tano sekogaš mudro te kerel pe. Čitin Izreki 22:3, a palo adava keren lafi bašo akala pučiba. Sar akava načelo ka pomožinel tuke te odlučine dali te pie alkohol ako...
-
valjani te vozine ili te upravine nesave mašinaja?
-
sian khamni?
-
o doktori vakergja tuke te na pie alkohol?
-
našti te kontrolirine tut kobor ka pie?
-
o zakoni tari država na dozvolinela tuke te pie alkohol?
-
sian nekasaja kova so odlučingja te na piel ni najhari adaleske so angleder sine le problemija alkoholea?
Dali ka ikale alkohol ko tlo bijav ili ko javera prilike? Te šaj te dikhe so šaj te pomožinel tuke te ane odluka, dikh o VIDEOKLIPI.
Čitin Rimjanite 13:13 hem 1. Korinkjanite 10:31, 32. Palo sekova stiho, keren lafi bašo akava pučibe:
-
Sar akava načelo šaj te pomožinel tuke te ane odluka so ka kerel bahtalo e Jehova?
Sekova hristijani korkori odlučinela dali ka piel alkohol ili na. Čak ako nekoj piela alkohol, ponekogaš šaj ka odlučinel te na piel
5. Odlučin kobor ka pie
Ako odlučinea te pie alkoholna pijalokija ma bistre kaj iako o Jehova na zabraninela o pijbe alkohol, sepak ov osudinela o preterano pijbe. Soske? Čitin Osija 4:11, 18, a palo adava keren lafi bašo akava pučibe:
-
So šaj te slučinel pe keda nekoj previše piela?
So ka pomožinel amenge te na pija but? Valjani te ova skromna, javere lafencar valjani te ova svesna bašo amare granice. Čitin Izreki 11:2, a palo adava keren lafi bašo akava pučibe:
-
Soske tano šukar angleder te odredina kobor ka pija?
6. So ka pomožinel nekaske te čhinavel e preterano pijbaja?
Dikh so pomožingja jekhe manušeske te čhinavel e preterano pijbaja? Dikh o VIDEOKLIPI, a palo adava keren lafi bašo akala pučiba:
-
Sar ponašinela pe sine o Dimitri keda sine mato?
-
Dali šaj sine odma te čhinavel e pijbaja?
-
Sar sepak ko krajo uspejngja te čhinavel e preterano pijbaja?
Čitin 1. Korinkjanite 6:10, 11, a palo adava keren lafi bašo akala pučiba:
-
Kobor tano seriozno o makjojbe?
-
Kotar džanaja kaj okola so isi len problemi e alkoholea šaj te meninen pe?
Čitin Matej 5:30, a palo adava keren lafi bašo akava pučibe:
-
Keda o Isus vakergja te čhina amaro vas, ov mislingja ko adava kaj valjani te otkažina amen taro nesave bukja te šaj te ugodina e Jehovaske. So šaj te kere ako tuke pharo te mukhe o alkohol? a
Čitin 1. Korinkjanite 15:33, a palo adava keren lafi bašo akava pučibe:
-
Sar šaj tlo društvo te vlijajnel upro adava kobor ka pie?
NESAVE ŠAJ PUČENA: „Dali tano pogrešno te pie alkohol?“
-
Sar ka odgovorine tu?
SO SIKLILEM
O Jehova dengja o alkohol te šaj te uživina, ama ov osudinela o preterano pijbe hem o makjojbe.
Sar ka odgovorine?
-
So vakerela i Biblija bašo alkohol?
-
Soske tano opasno preterano te piel pe alkohol?
-
Sar šaj te poštujna e javerengere odluke bašo alkohol?
ISTRAŽIN
Dikh kola čekorija ka pomožinen tuke te borine tut protiv o alkohol.
„Ispraven stav kon alkoholot“ (Stražarska kula taro 1 januari 2010)
Dali valjani o hristijanja te keren „živeli“?
„Prašanja od čitatelite“ (Stražarska kula taro 15 fevruari 2007)
Ko iskustvo e naslovea „Bev bure bez dno“, dikh sar jekh manuš čhinavgja e pijbaja.
a Okolenge soj tane alkoholičarija šaj ka valjani stručno pomoš te šaj te mukhen o alkohol. But doktorija sovetinena kaj asavke manuša na valjani ni najhari te pien alkohol.
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
