LEKCIJA 44
Sar dikhela o Devel ko proslave hem ko praznikija?
O Jehova mangela te uživina ko životo hem ko adava vklučimo tano ponekogaš te slavina nešto. Ama, dali sa o proslave hem o praznikija tane ugodna leske? Sar šaj ko asavke da bukja te sikava kaj amenge važno sar dikhela o Jehova?
1. Soske but proslave hem praznikija nane ugodna e Jehovaske?
Šaj ka iznenadine tut ako doznajnea kaj but proslave hem praznikija na temelinena pe ki Biblija ili isi len pagansko poteklo. Nesave taro adala proslave hem praznikija povrzime tane e hovavne religijaja, isi len nešto spiritističko ili temelinena pe ko sikljojbe kaj e manuše isi le besmrtno duša. Nesave proslave hem praznikija kerena pe taro sueverie ili te šaj te anen bahtalipe (Isaija 65:11). Adaleske o Jehova predupredinela ple slugen: „Odvojnen tumen... hem poviše ma pipinen ništo soj melalo“ (2. Korinkjanite 6:17). a
2. So mislinela o Jehova bašo proslave hem praznikija kola so dena preterano čest e manušenge?
O Jehova predupredinela amen te na čhiva amari „doverba ko manuša“. (Čitin Eremija 17:5.) Nesave proslave hem praznikija dena čest e vladetelenge ili e vojnikonge. A ko javera proslave hem praznikija slavinena pe nacionalna simbolija ili o dive keda jekh država uli nezavisno (1. Jovanovo 5:21). A nesave palem, slavinena politička organizacie ili organizacie kola so borinena pe bašo pravija e manušengere. Sar bi osetinela pe o Jehova ako daja preterano čest jekhe manušeske ili organizacijake, posebno okolenge so širinena idee soj tane protiv leskiri volja?
3. Sar ponašinena pe o manuša ko nesave proslave hem praznikija?
I Biblija osudinela o preterano pijbe, o raspuštena zabave hem o natprevarija pijbaske (1. Petrovo 4:3). Ko nesave proslave hem praznikija o manuša ponašinena pe bizi kontrola hem kerena nemoralna bukja. Te šaj te ačhova e Jehovaskere amala amen mora te cida amen taro asavko moralno melalipe.
DOZNAJN POVIŠE
Doznajn sar šaj te kere bahtalo e Jehova agjaar so ka ane mudra odluke bašo proslave hem praznikija.
4. Ma učestvujn ko proslave ili praznikija so na mangela o Jehova
Čitin Efešanite 5:10, a palo adava keren lafi bašo akala pučiba:
-
So mora te ispitina angleder te ana odluka dali ka učestvujna ki nesavi proslava ili prazniko?
-
Save proslave ili praznikija tane popularna ko than kote so živinea?
-
So mislinea, dali ola tane ugodna e Jehovaske?
Na primer, dali nekogaš pučljan tut so mislinela o Devel bašo adava te slavinel pe o bijando dive? Ki Biblija na pišinela kaj nesavo sluga e Jehovaskoro slavingja plo bijando dive. Ama, ki late pišinela kaj duj manuša kola so na služinena sine e Jehovaske slavingje pumaro bijando dive. Čitin 1. Mojseeva 40:20-22 hem Matej 14:6-10, a palo adava keren lafi bašo akala pučiba:
-
So isi len zaedničko akala duj proslave bašo bijando dive?
-
Sprema akala bibliska izveštaija, so mislinea, sar o Jehova dikhela ko adava te slavinel pe o bijando dive?
Sepak, šaj pučea tut: „Dali e Jehovaske čače tano doborom važno dali me ka džav ki jekh proslava bašo bijando dive ili ki jekh javer proslava koja tani protiv leskere načelija?“ Čitin 2. Mojseeva 32:1-8, a palo adava dikh o VIDEOKLIPI hem keren lafi bašo akala pučiba:
-
Soske tano važno te džana kola proslave hem praznikija mangela o Jehova a kola na?
-
So mislinea, sar šaj te doznajna adava?
Sar šaj te doznajna kola proslave ili praznikija na mangela o Devel?
-
Dali temelinena pe ko sikljojba so nane bibliska? Te šaj te doznajne adava ispitin o poteklo.
-
Dali dena čest e manušenge, e organizacienge ili nacionalna simbolenge? Amen sikavaja čest samo e Jehovaske hem isi amen doverba kaj ov ka rešinel o problemija ko sveto.
-
Dali adava so kerela pe ki lende tano protiv e Devleskere načelija? Amen valjani te ačhova moralno čista.
5. Pomožin e javerenge te poštujnen tle veruvanja
Šaj te ovel amenge pharo keda o javera kerena amenge pritisok te učestvujna ko nesave proslave ili praznikija kola so na mangela o Jehova. Ama, ko asavke situacie ov strplivo hem taktično objasnin tle odluke. Te šaj te dikhe jekh primer sar šaj te kere adava dikh o VIDEOKLIPI.
Čitin Matej 7:12, a palo adava keren lafi bašo akala pučiba:
-
Sprema akava stiho, dali valjani te vakere okolenge tari tli familija kola so na služinena e Jehovaske, kaj na valjani te slavinen nesavo prazniko?
-
Sar šaj te sikave tle familijake kaj, iako na slavinea lencar, sepak mangea len hem ceninea len?
6. O Jehova mangela te ova bahtale
O Jehova mangela te uživina ko šuže momentija amare familijaja hem amare amalencar. Čitin Propovednik 8:15, a palo adava keren lafi bašo akava pučibe:
-
Sar akava stiho sikavela kaj o Jehova mangela te ova bahtale?
O Jehova mangela leskoro narodo te ovel bahtalo hem te uživinel keda tano zaedno. Dikh o VIDEOKLIPI kova so sikavela sar adava dikhjola pe ko amare megjunarodna kongresija.
Čitin Galatite 6:10, a palo adava keren lafi bašo akala pučiba:
-
Dali valjani te slavina o popularna praznikija te šaj „te kera šukaripe“ e javerenge?
-
So bi kerela tut pobahtalo, ako pokloninea nekaske nešto adaleske so adava očekujnela pe tutar ko nesavo odredimo dive, ili ako kerea adava spontano adaleske so mangea?
-
But Jehovaskere svedokija ponekogaš organizirinena nesavi zabava pumare čhavenge hem iznenadinena len agjaar so dena len poklonija. Ako isi tut čhave, sar šaj te kere len bahtale?
NESAVE ŠAJ VAKERENA: „Nane važno o poteklo tari nesavi proslava ili prazniko. Važno tano so tegani siem zaedno e familijaja hem e amalencar“.
-
So ka vakere tu?
SO SIKLILEM
O Jehova mangela te uživina keda siem zaedno amare familijaja hem amare amalencar. Ama, ov na mangela te učestvujna ko proslave ili praznikija kola so nane ugodna leske.
Sar ka odgovorine?
-
Kola pučiba ka pomožinen amenge te doznajna dali jekh proslava ili prazniko tano ugodno e Jehovaske?
-
Sar šaj te pomožina e javerenge te haljoven soske na učestvujnaja ko nesave proslave ili praznikija?
-
Kotar džanaja kaj o Jehova mangela te ova bahtale hem te uživina ko životo?
ISTRAŽIN
Dikh sar o tikne čhave kola so mangena e Jehova kerena le radosno džikote isi praznikija.
Milionja hristijanja odlučingje te na slavinen Božiko. Dali žalinena baši adaja odluka?
„Nešto poubavo od Božikj“ (Stražarska kula taro 1 dekemvri 2012)
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
