LEKCIJA 47
Dali sian spremno te krstine tut?
Dži akana ko tlo biblisko kursi sikliljan but bukja bašo Jehova. Verojatno kergjan nesave promene ko tlo životo te šaj te primenine adava so sikliljan. Sepak, šaj isi nešto so čhinavela tut te de lafi e Jehovaske kaj ka služine leske hem te krstine tut. Ki akaja lekcija ka kera lafi bašo nesave predizvikija so šaj te keren tuke pharo te krstine tut hem ka dikha so šaj te pomožinel tuke te nakhave len.
1. Kobor valjani te džane tari Biblija angleder te krstine tut?
Te šaj te krstine tut valjani šukar te džane o čačipe (1. Timotej 2:4). Akava na značinela kaj valjani te džane o odgovor bašo sekova pučibe tari Biblija. Čak o hristijanja kola soj tane krstime angleder but berša, ponadari da sikljovena tari Biblija (Kološanite 1:9, 10). Sepak, isi nešto so valjani te džane — o osnovna bibliska sikljojba. Ako na sian sigurno dali adava so džanea tari Biblija tano dovolno, šaj te puče e starešinen hem ola ka pomožinen tuke.
2. So valjani te kere angleder te krstine tut?
Angleder te krstine tut, mora te kaine tut hem te irane tut ko Devel. (Čitin Dela 3:19.) Akava značinela kaj valjani but te žaline bašo lošna bukja so kergjan len hem te moline e Jehova te prostinel tuke. Isto agjaar, valjani te ove rešimo te cide tut taro sa o bukja kolenge so o Devel vakerela kaj tane lošna hem te ove odlučno te živine agjaar sar so mangela ov. A na samo adava, važno tano te posetine o sostanokija hem te propovedine zaedno e sobraniea.
3. Soske na valjani te dara te krstine tut?
Nesave darana kaj ka našti te ikeren pe ko adava so vetingje e Jehovaske. Čače, ponekogaš tu ka kere greške sar so kergje o verna murša hem džuvlja soj tane spomnime ki Biblija. Ama, ma bistre kaj o Jehova na očekujnela taro ple sluge te oven sovršena. (Čitin Psalm 103:13, 14.) O Jehova tano bahtalo keda dea tlo najšukar! Ov ka pomožinel tuke. Ustvari, o Jehova uverinela amen kaj ništo „našti te odvojnel amen taro [leskoro] mangipe“. (Čitin Rimjanite 8:38, 39.)
DOZNAJN POVIŠE
Dikh sar adava so pošukar ka zapoznajne e Jehova hem ka prifatine leskiri pomoš, ka pomožinel tuke te nakhave bilo kova predizvik so čhinavela tut te krstine tut.
4. Trudin tut te zapoznajne e Jehova pošukar
Kobor šukar valjani te pendžare e Jehova angleder te krstine tut? Valjani te pendžare le dovolno šukar te šaj te mange le hem te mange te ugodine leske. Dikh o VIDEOKLIPI te šaj te dikhe sar nesave interesentija taro celo sveto kergje adava, a palo adava keren lafi bašo akava pučibe:
-
So kergje o manuša taro videoklipi te šaj te oven spremna bašo krstibe?
Čitin Rimjanite 12:2, a palo adava keren lafi bašo akala pučiba:
-
Dali sumninea tut ko adava so sikavela i Biblija, ili ko adava kaj e Jehovaskere svedokija sikavena o čačipe?
-
Ako oja, so šaj te kere?
5. Nakhav o predizvikija so čhinavena tut te krstine tut
Sarine soočinaja amen predizvikoncar keda odlučinaja te da lafi e Jehovaske kaj ka služina leske hem te krstina amen. Te šaj te dikhe jekh primer bašo adava dikh o VIDEOKLIPI, a palo adava keren lafi bašo akala pučiba:
-
Kola predizvikija sine e phenja?
-
Sar o mangipe sprema o Jehova pomožingja lake te nakhavel adala predizvikija?
Čitin Izreki 29:25 hem 2. Timotej 1:7, a palo adava keren lafi bašo akava pučibe:
-
So dela amen hrabrost te nakhava o predizvikija?
6. Neka ovel tut doverba kaj o Jehova ka pomožinel tuke
O Jehova ka pomožinel tuke ako mangea te kere adava soj ugodno leske. Dikh o VIDEOKLIPI, a palo adava keren lafi bašo akala pučiba:
-
Soske sine pharo e interesenteske te krstinel pe?
-
So siklilo bašo Jehova hem sar adava pomožingja leske te ovel le pobari doverba ko Jehova?
Čitin Isaija 41:10, 13, a palo adava keren lafi bašo akava pučibe:
-
Soske šaj te ove sigurno kaj tu šaj te ikere tut ko tlo zavet e Jehovaske?
7. Bajrar tlo cenenje bašo e Jehovaskoro mangipe
Kobor poviše razmislinea bašo e Jehovaskoro mangipe sprema tute, doborom poviše ka ove blagodarno leske hem doborom poviše ka bajrovel tli želba te služine leske zasekogaš. Čitin Psalm 40:5, a palo adava keren lafi bašo akava pučibe:
-
Kola bereketija taro Jehova ceninea najviše?
O proroko o Eremija but mangela sine e Jehova hem leskoro lafi, hem but ceninela sine i čest te ovel e Jehovaskoro sluga. Ov vakergja: „Tlo lafi kergja man bahtalo hem phergja mlo vilo bahtalipaja, soske me phiravava tlo anav“ (Eremija 15:16). Keren lafi bašo akala pučiba:
-
Soske tani bari čest te ove e Jehovaskoro svedoko?
-
Dali mangea te krstine tut hem te ove e Jehovaskoro svedoko?
-
Dali isi tut nesave predizvikija so kerena tuke pharo te kere adava?
-
So mislinea, sar šaj te nakhave adala predizvikija?
NESAVE ŠAJ VAKERENA: „Akaja tani bari odgovornost, darava te na grešinav palo krstibe“.
-
Dali tu da osetinea tut agjaar?
SO SIKLILEM
O Jehova ka pomožinel tuke te nakhave sa o predizvikija so čhinavena tut te krstine tut.
Sar ka odgovorine?
-
Kobor valjani te džane tari Biblija angleder te krstine tut?
-
So valjani te kere angleder te krstine tut?
-
Soske na valjani te dara te krstine tut?
ISTRAŽIN
Čitin koja valjani te ovel i pričina baši tli odluka te krstine tut
„Dali sian spremno te krstine tut?“ (Stražarsko kula taro mart 2020)
Dikh sar šaj te nakhave nesave konkretna predizvikija kola so šaj čhinavena tut te krstine tut.
„So čhinavela man te krstinav man?“ (Stražarsko kula taro mart 2019)
Dikh sar jekh manuš uspešno nakhavgja nesave bare predizvikija te šaj te krstinel pe.
Šaj isto ka interesinel tut
NAJČESTA PUČIBA
Sar izgledinela o biblisko kursi so nudinena e Jehovaskere svedokija?
Džikote ikerela pe o besplatno biblisko kursi, šaj te koristine bilo kova prevod tari Biblija. Ko kursi šaj te kanine nekas tari tli familija ili nesave amale.
