I Reveka sine jekh romni so mangela sine e Jehova. Lakoro rom sine o Isak. Ov isto agjaar mangela sine e Jehova. Sar arakhlja pe i Reveka e Isakoja? Sar sikavgja kaj mangela te radujnel e Jehova? Ajde te dikha.

E Isakoskoro dad sine o Avraam, a leskiri daj i Sara. Ola živinena sine ko Hanaan. Ko adava than, o manuša na mangena sine e Jehova. O Avraam mangela sine leskoro čhavo te lel peske romni so mangela e Jehova. E Avraameskiri familija bešela sine ko Haran. Adaleske ov bičhalgja pe sluga, šaj sine o Eleazar, te lel e Isakoske romni taro adava than.

Agjaar, o Eleazar hem nekobor javera sluge, cidinge te džan ko Haran. Pea lele deš kamile kola so legarena sine o hajbe hem o poklonija. Sar ka džanel o Eleazar kole romnja te birinel e Isakoske? Keda o Eleazar hem o javera sluge resle ko Haran, ačhile uzo jekh bunari. O Eleazar džanlja kaj adari avena o čhaja te pheren pani. Ov molingja pe e Jehovaske hem vakergja: ,Keda ka pučav nesave čhaja te del ma pani, a oj ka del mange hem e kamilenge, togaš ka džanav kaj tu biringjan adale čhaja‘.

Togaš i Reveka ali ko bunari. I Biblija vakerela kaj sine but šuži čhaj. O Eleazar rodingja latar pani, a oj vakergja: ,Oja,  ka dav tut pani, hem ka anav te kamilenge da‘. Zamislin tuke! O kamile piena but pani, hem i Reveka valjani sine but puti te džal dži ko bunari te anel lenge pani. Dikhea li ki slika kobor tani bukjarni?— O Eleazar čudingja pe sar o Jehova odgovoringja ki leskiri molitva.

O Eleazar dengja e Revekake but šuže poklonija. Palo adava, o Eleazar hem o javera sluge gele late khere. Togaš, ov vakergja lakere familijake soske o Avraam bičhalgja le adari, hem sar o Jehova odgovoringja ki leskiri molitva. Lakiri familija sine radosno hem mukhlja la te lel pe e Isakoja.

So mislinea, manglja li i Reveka te lel pe e Isakoja?— I Reveka džanlja kaj o Jehova bičhalgja e Eleazare adari. Keda lakiri familija pučlja la dali mangela te džal ko Hanaan hem te lel pe e Isakoja, oj vakergja: ,Oja, mangava te džav‘. Palo adava, oj geli e Eleazarea. Keda resle ko Hanaan, oj lelja pe e Isakoja.

I Reveka kergja adava so mangela sine o Jehova hem ov nagradingja la. Palo but berša, o Isus alo tari lakiri familija. Ako sian sar i Reveka hem kerea radosno e Jehova, ov ka nagradinel tute da.