Ko 9 oktomvri 2024 berš, i Svetsko fondacija baši zaštita e prirodakiri objavingja jekh izveštaj bašo adava kaj o aktivnostija e manušengere vlijajnena lošno upro životne. Ko izveštaj pišinela kaj „ko posledna 50 berša (1970-2020), o broj e diva životnengoro namalingja pe bašo 73%“. Palo adava sine akava predupreduvanje: „Nane te preterinel pe ako vakerela pe kaj taro adava so ka slučinel pe ko sledna pandž berš ka zavisinel i idnina e životoskiri ki phuv“.

 Normalno tano so but manuša tane šokirime taro asavke izveštaija. Amen mangaja amari but šuži planeta hem pharo amenge keda dikhaja kaj o životne mučinena pe. Osetinaja amen agjaar soske e Devleskiri namera sine amen te grižina amen e životnenge (1. Mojseeva 1:27, 28; Izreki 12:10).

 Adaleske, šaj pučea tut: „Ka uspejna li te zaštitina e životnen ki phuv? So vakerela i Biblija?“

 Kobor hem te trudina amen te kera pošukar o bukja, e životnengiri idnina zavisinela taro Devel. Sprema Otkrovenie 11:18, i Biblija prorokujngja kaj o Devel ka uništinel „okolen so uništinena i phuv“. Taro akava stiho sikljovaja duj bukja:

1.  1. O Devel nane te mukhel o manuša celosno te uništinen i phuv.

2.  2. O Devel panda hari ka kerel nešto. Kotar džanaja adava? Adaleske so avdive i opasnost o manuša te uništinen e životnen tani pobari taro bilo keda angleder.

 So ka kerel o Devel te šaj te rešinel akava problemi? Preku pli nebesno vlada, ili Carstvo, ov ka vladinel upri celi phuv (Matej 6:10). Adaja vlada ka sikavel hem ka obučinel e poslušna manušen te šaj te džanen sar te grižinen pe e životnenge hem te zaštitinen len (Isaija 11:9).