Sarinenge amenge valjani čisto pani te šaj te živina. Ama, o generalno sekretari taro ON, o Antonio Gutereš, vakergja kaj „adaleske so sa poviše valjani pani isi amen seriozno kriza panjeske“. Milijarde manušen ko sveto nane len dovolno pani pijbaske.

 Dali nekogaš ka ovel dovolno pani sarinenge? Ili, sekogaš ka ovel kriza panjeske? So vakerela i Biblija?

So vetinela i Biblija bašo adava kobor pani ka ovel

 Tari Biblija doznajnaja kaj jekh dive nane te ovel problemi e panjea. Ustvari, ka ovel but čisto pani pijbaske.

 „Ki pustina ka pojavinen pe but panja hem ki šuki phuv potokija. I thari phuv ka pretvorinel pe ko ezero, a i žedno phuv — ko izvorija panjea“ (Isaija 35:6, 7).

 Soske šaj te ovel amen doverba ko akava vetuvanje tari Biblija? Te dikha kova detali spomninela i Biblija bašo način sar tani stvorimi amari planeta.

So vakerela i Biblija baši phuv hem bašo kružno tek e panjeskoro

 „[O Devel] na stvoringja i phuv džabe, nego kergja la te živinel pe ki late“ (Isaija 45:18).

 „[O Devel], khedela o kapke pani ko uče thana, hem ola cedinena pe upraldan sar bršim hem sar leskiri magla, hem tegani o oblakija thavdena, perela baro bršim upro manuša“ (Jov 36:27, 28).

 „Ka dav tumen bršim ko pravo vreme hem i phuv ka bijanel plo plodi, hem o kašta ki livadi ka den ple plodija“ (3. Mojseeva 26:4).

 O Devel vetingja e Izraelconge taro purano vreme kola so sine zemjodelcija kaj ko lengere nive ka del len baro plodi agjaar so redovno ka del len pani. Ov džanlja kaj te šaj i phuv te del hajbaske valjani dovolno bršim ko pravo vreme.

 Adava so o Devel kergja e Izraelconge angleder, panda hari ka kerel hem baši celi phuv (Isaija 30:23). Džikote avela adava vreme ko but delija taro sveto i kriza bašo pani sa poviše bajrola, a jekh pričina tani adaja so isi sa pohari bršim. So javer vakerela i Biblija bašo adava sar ka rešinen pe o avdisutne problemija e panjea?

Sar ka čhinavel pe i kriza e panjea

 Tari Biblija otkrinaja kaj o Devel preku plo Carstvo ka rešinel o problemija kola so vlijajnena upri amari planeta, maškar kolende soj hem i kriza e panjea (Matej 6:9, 10). E Devleskoro Carstvo tani vlada ko nebo koja so ka vladinel upri phuv (Daniel 2:44; Otkrovenie 11:15). Osven adava, e Devleskoro Carstvo ka kerel adava so o manušikane vlade nane sposobna te keren — ka cidel o pričine bašo problemija e panjea.

 Problemi: O klimatska problemija kerena te na ovel ramnoteža ko kružno tek e panjeskoro. Adaleske isi bare suše hem bare poplave bizi razlika dali tane adaleske so dela peske but bršim ili adaleske so uštela o pani ko more.

 Rešenie: E Devleskoro Carstvo ka popravinel sa i šteta soj kerdi ki amari okolina te šaj te obnovinel pe amari planeta. O Devel vetingja: „Dikh! Kerava sa o bukja neve!“ (Otkrovenie 21:5). Ki šuki phuv ka ovel but pani pijbaske hem agjaar ka ovel životo adathe kote so avdive našti te ovel (Isaija 41:17-20). Isto agjaar, e Devleskoro Carstvo, kote so o Isus Hristos tano Cari, ka kontrolirinel sa o prirodna sile ki phuv.

 Problemi: O manuša kola so na razmislinena bašo posledice taro ple postapke hem o alčna kompanie zagadinena o reke, o ezerija hem o izvorija teli phuv hem agjaar ola da isi len delo ko adava te na ovel dovolno čisto pani.

 Rešenie: O Devel ka čistinel i phuv hem ka popravinel sa i šteta soj kerdi ko reke, ko ezerija, ko more hem ki phuv. I phuv ka ovel raj. Ko jekh poetsko način ki Biblija tano opišimo akava: „Ka radujnen pe i pustina hem i phuv bizo pani, ka radujnel pe i phuv soj pusto hem ka cvetonel sar šafrani“ (Isaija 35:1).

 Problemi: O manuša koristinena o čisto pani ko pogrešno način hem adaleske posigate trošinela pe o pani a popohari pherela pe.

 Rešenie: Adaleske so ka vladinel e Devleskoro Carstvo, ki phuv ka kerel pe e Devleskiri volja, a na i volja e manušengiri kola soj sebična (Matej 6:9, 10). E Devleskoro Carstvo ka del o najšukar obrazovanie ple slugenge ki phuv. Ko Isaija 11:9 vakerela: „I phuv ka ovel pherdi pendžaribaja bašo Jehova“. a Adaleske so ka ovel len asavko pendžaribe hem taro baro mangipe sprema o Devel hem sprema sa o bukja so kergja len, o manuša sovršeno ka grižinen pe baši amari šuži planeta hem bašo sa adava so avela tari priroda.

•   Te šaj te doznajne nešto poviše bašo adava so ka kerel e Devleskoro Carstvo, čitin i statija „So ka kerel e Devleskoro Carstvo?“

•   Čitin o 35-to poglavje taro biblisko lil Isaija te šaj te doznajne sar i phuv ka ovel raj.

•   Dikh o videoklipi Soske o Devel kergja i phuv? te šaj te doznajne nešto poviše baši e Devleskiri namera e phuvjaja hem e manušencar.