Ko 24 fevruari 2022 berš, i Rusija napadingja e Ukraina. Akava kergja te ovel bari humanitarno kriza hem o manuša mangena sigate te našen tari adaja phuv. a

 „Šunaja sine sar eksplodirinena bombe. Doborom sine strašno so našti te objasninel pe lafencar. Keda šungjem kaj isi vozija kolencar so šaj te naša, odlučingjem te dža. Valjani sine te mukha sa pali amende soske smejnaja sine te la samo po jekh tikno ranco. Šaj sine te la samo amare dokumentija, hapija, pani hem gricke. Sa o javera bukja mukhlem hem džikote perena sine bombe gelem ki železničko stanica.“ (I Natalija taro Harkov, Ukraina.)

 „Dži ko posledno momenti na verujngjem kaj ka ovel vojna. Taro nesave delija tari diz šunava sine eksplozie hem o pendžerke tresinena sine. Odlučingjum te našav hem leljum mancar samo o potrebna bukja. Ikliljum kheraldan ko ofto o saati sabajle hem ukliljum ko vozi so džala sine ko Lavov hem palo adava ukliljum ko avtobusi te džav dži ki Polska.“ (I Nadija taro Harkov, Ukraina.)

Ki akaja statija

•  Kola tane o čačutne pričine baši akaja kriza?

•  Kote šaj o izbeglice te arakhen nadež?

•  Dali šaj i Biblija te pomožinel e izbeglicenge avdive?

 Kola tane o čačutne pričine baši akaja kriza?

 I izbegličko kriza počmingja adaleske so i rusko vojska napadingja e Ukraina. Ama, i Biblija otkrinela amenge javera pohor pričine bašo adava soske isi asavke krize:

•   O manušikane vlade na uspejngje te den adava so valjani e manušenge. O vlade but puti koristinena plo avtoriteti te šaj te kontrolirinen hem te maltretirinen e manušen (Propovednik 4:1; 8:9).

•   O Satana o Beng, „o vladeteli e svetoskoro“, isi le doborom baro vlijanie upro manuša so i Biblija vakerela: „Celo sveto tano ko vasta e Lošnoskere“ (Jovan 14:30; 1. Jovanovo 5:19).

•   Osven o problemija so isi e manušen vekoncar, i Biblija vakerela kaj amen živinaja „ko posledna dive“ hem kaj ka ovel but pharo te ikljol pe ko krajo (2. Timotej 3:1). Isto agjaar, ko akala posledna dive ka oven vojne, prirodna katastrofe, bokhalipe hem zarazna nasvalipa — bukja kola so ka keren o manuša te našen taro pumare khera (Luka 21:10, 11).

 Kote šaj o izbeglice te arakhen nadež?

 I Biblija vakerela kaj amaro Devel, o Jehova, b tano Devel kole so isi mangipe hem sočuvstvo e izbeglicenge hem okolenge so mora te džan peske taro pumare khera (5. Mojseeva 10:18). Ov vetinela kaj ka rešinel e izbeglicengere problemija preku pli nebesno vlada, e Devleskoro Carstvo, koja so ka zameninel e manušikane vladen (Daniel 2:44; Matej 6:10). O Jehova preku plo Carstvo ka cidel e Benge (Rimjanite 16:20). Adava Carstvo ka vladinel ko celo sveto hem nane više te oven granice kola so odvojnena e manušen. O manuša taro celo sveto ka oven sar jekh familija. Nikoj nane više te našel taro plo kher, soske i Biblija vetinela: „Sekova jekh ka bešel teli pli drakh hem teli pli smokva hem nikoj nane te daravkerel len, soske adala tane lafija so avena taro muj e Jehovaskoro upreder o vojske“ (Mihej 4:4).

 Samo e Devleskoro Carstvo ka anel trajno rešenie bašo izbeglička krize so dikhaja len avdive. O Jehova preku plo Carstvo ka cidel o problemija kola so anena o manuša te oven izbeglice. Te dikha nesave primerija.

•   Vojna. „[O Jehova] čhinavela o vojne ki celi phuv“ (Psalm 46:9). Te šaj te dikhe sar o Devel ka čhinavel o vojne, čitin i statija „Kako ke se vospostavi mir na Zemjata?“

•   Maltretiribe hem nasilstvo. „Taro maltretiribe hem nasilstvo [o Jehova] ka spasinel len“ (Psalm 72:14). Te šaj te haljove sar šaj o manuša te meninen pumaro negativno stavi, čitin i serija taro statie „Ked i mržnja više na ka ovel“.

•   Čorolipe. „[O Jehova] ka spasinel e čorole so rodela pomoš“ (Psalm 72:12). Te šaj te dikhe sar o Devel korendan ka rešinel o čorolipe, čitin i statija „Da li je moguće ostvariti pravedan ekonomski sistem?“

•   Bokhalipe. „Ki phuv o giv but ka bijanel“ (Psalm 72:16). Te šaj te dikhe sar o Devel ka kerel nijekh te na ovel više bokhalo, čitin i statija „Svijet bez gladi“.

 Dali šaj i Biblija te pomožinel e izbeglicenge avdive?

 Oja. Osven so dela sigurno nadež baši idnina, i Biblija šaj te pomožinel lenge te ikljoven o krajo e problemencar so isi len akana.

 Načelo tari Biblija: „Ma sekirinen tumen bašo ništo, nego ko sa — molitvaja, molbaja hem blagodaribaja — vakeren e Devleske so rodena. Hem o mir taro Devel, kova soj upreder sekoja misla, ka arakhel tumare vile hem tumare misle preku o Hristos Isus“ (Filipjanite 4:6, 7).

 So značinela akava: Rode mir taro Devel bizi razlika ki savi situacija arakhea tut. Dikh i statija „Filipljanima 4:6, 7: Ne brinite se ni za što“.