I vojna ki Ukraina hem o bare klimatska promene ponadari da uništinena o rezerve tari hrana so isi ko celo sveto. Akava posebno slučinela pe ko počorole phuvja kote so agjaar da nane dovolno hajbaske.

•   „O konfliktija, o klimatska promene, o skupo gorivo hem struja hem javera bukja kergje te ovel pharo te proizvodinel pe hem te anel pe hajbaske“ (Antonio Gutereš, Generalno sekretari taro Obedineta nacie, 17 juli 2023).

•   „I Rusija nane više delo taro dogovor bašo izvoz taro giv soj tano ki Ukraina. O ekspertija mislinena kaj akava ka anel kriza baši hrana ko celo sveto hem kaj o hajbe, posebno ko počorole phuvja sar soj i Severno Afrika hem o Blizok Istok, ka ovel panda poskupo“ (Atalayar.com, 23 juli 2023).

 Doznajn so vakerela i Biblija baši i kriza hajbaske hem baši amari idnina.

•   O Isus vakergja: „Ka borinel pe narodo protiv narodo, hem carstvo protiv carstvo, hem ka ovel bokhalipe“ (Matej 24:7).

•   O biblisko lil Otkrovenie kerela lafi bašo štar simbolična javačija ko grasta. Jekh lendar pretstavinela i vojna. Pali leste avela javer javači kova so pretstavinela o bokhalipe — vreme keda nane te ovel dovolno hajbaske hem i hrana ka ovel but skupo. Ko Otkrovenie 6:5, 6 pišinela: „Dikhljum jekh kalo gras hem leskere javače sine le vaga ko vas. Šungjum jekh glaso sar vakerela: ’Pohari taro jekh kilo giv koštinela celo diveskiri plata. Pohari taro trin kile jačmen koštinela celo diveskiri plata‘“.

 Adava so vakergja i Biblija bašo bokhalipe ispolninela pe ko amaro vreme kova so i Biblija vikinela le „posledna dive“ (2. Timotej 3:1). Ako mangea te doznajne poviše bašo „posledna dive“ hem bašo štar javačija taro Otkrovenie, dikh o videoklipi O sveto meningja pe taro 1914 berš hem čitin i statija „Što pretstavuvaat četirite javači?“

•   Ki Biblija isi praktična sovetija so šaj te pomožinen amenge te ikljova ko krajo phare situaciencar, sar na primer keda bajrona o cene baši hrana hem keda isi kriza baši hrana. Asavke sovetija šaj te arakhe ki statija „Kako da rakovodiš so parite“.

•   I Biblija isto agjaar dela nadež kaj o uslovija ki phuv ka oven pošukar. Oj vetinela kaj ka avel vreme keda „ki phuv o giv but ka bijanel“ hem sarinen ka ovel len but hajbaske (Psalm 72:16). Ako mangea te doznajne poviše bašo adava savi nadež dela i Biblija hem soske šaj te verujne ki late, čitin i statija „Patot do srekjata — nadež“.