Ko 2022 berš, o vlade ko sveto trošingje poviše taro 2,24 bilionija amerikanska dolarija bašo ple vojske, poviše pare taro bilo keda angleder. Jekh taro glavna pričine sine i vojna ki Ukraina. Jekh izveštaj so sine objavimo ko april 2023 berš taro Stokholmsko megjunarodno instituti so istražinela bašo mir (SIPRI), bašo 2022 berš vakerela:

•   O evropska trošakija baši vojska „barile bašo 13 otsto adava berš, a adava sine o najbaro trošako so kergje o evropska vlade otkeda završingja i studeno vojna“.

•   I Rusija... sprema o procenke, bajrargja ple voena trošakija bašo 9,2 otsto, hem agjaar taro pandžto than ali ko trito than ko sveto sprema adava kobor pare dela baši vojska.“

•   O SAD ponadari da ikerena o prvo than „adaleske so trošinena 39 otsto taro sa o pare so trošinena pe ko sveto bašo vojske“.

 „Adava so o vlade ko posledna berša dena sa poviše pare bašo ple vojske sikavela kaj živinaja ko sveto kova so sa poviše hem poviše nane bezbedno“, vakergja o d-r Nan Tijan, jekh taro adala so pišingje o izveštaj taro SIPRI.

 Ki Biblija vakerela kaj ko amaro vreme o bare sile sa poviše hem poviše ka protivinen pe maškar peste, a isto agjaar vakerela kova tano o edinstveno rešenie bašo mir ko sveto.

•   Bašo amaro vreme, i Biblija vakerela kaj tano „o vreme e krajoskoro“ (Daniel 8:19).

•   Ko lil Daniel pišinela kaj ko vreme e krajoskoro o svetska sile ka natprevarinen pe jekh jekhea. Ola ka mangen te dokažinen koj lendar tano najsilno. Jekh način sar kerena adava tano agjaar so trošinena but pare (Daniel 11:40, 42, 43).

 Te šaj te doznajne nešto poviše bašo akava interesno biblisko proroštvo, dikh o videoklipi Ispolnime proroštvija — Daniel 11 poglavje.

•   I Biblija vakerela kaj o Devel ka zameninel e manušikane vladen. Ov „ka vazdel carstvo kova so nikogaš nane te ovel uništimo. Hem adava carstvo nane te del pe javere narodoske. Ov ka uništinel hem ka čhinavel sa o javera carstvija, a korkori ov ka ačhovel zasekogaš“ (Daniel 2:44).

•   Panda hari, o Devel o Jehova a ka kerel adava so o manuša našti te keren — ka anel čačutno hem večno mir. Sar? Leskoro Carstvo, jekh čačutni vlada ko nebo, ka anel krajo bašo oružje hem nasilstvo (Psalm 46:8, 9).

 Te šaj te doznajne poviše bašo adava so ka kerel e Devleskoro Carstvo, čitin i statija „Pod vlasta na Božjeto Carstvo ’kje ima golem mir‘“.