E hristijanenge ko Solun, o apostol Pavle pišingja: „Ako nekoj na šunela adava so vakergjem ko akava pismo, obeležinen le“ (2. Sol. 3:14). Angleder mislinaja sine kaj akala lafija o Pavle vakergja len direktno e starešinenge. Ko nesave slučaija, keda nekoj taro sobranie uporno na šunela sine o bibliska načelija, iako poviše puti dobinela sine sovetija, o starešine ka ikeren sine jekh predupreduvačko govor anglo sobranie. Palo adava, o objavitelija na družinena pe sine adale so sine obeležimo.

Ama akana valjani te kera jekh promena. Jasno tano kaj e Pavleskoro sovet odnesinela pe ko adava kaj sekova hristijani korkori odlučinela sar ka postapinel ko nesave okolnostija. Adaleske, nane potreba o starešine te ikeren jekh govor bašo predupreduvanje. Soske keraja akaja promena? Te dikha bašo so kergja lafi o Pavle keda dengja akava sovet.

O Pavle primetingja kaj nesave taro adava sobranie „na živinena uredno“. Ola na poštujnena sine e Pavleskere sovetija kola so sine temelime ko e Devleskoro Lafi. Keda angleder sine ko lengoro sobranie, o Pavle dengja len akaja zapoved: „Ako nekoj na mangela te kerel buti, tegani ni ma te hal!“ Iako ov vakergja adava, nesave palem na mangena sine te keren buti te šaj te grižinen pe bašo pumare potrebe, iako sine sposobna bašo adava. A sine asavke da so mešinena pe sine ko e javerengere bukja. Sar valjani sine o hristijanja te ponašinen pe adalencar so na živinena sine uredno? (2. Sol. 3:6, 10-12).

Baši nekaste so na živinela sine uredno, o Pavle vakergja: „Obeležinen le“. Akava izraz ki grčko čhib šaj te značinel te primetine keda nekoj na živinela uredno hem te ove svesno kaj šaj te vlijajnel lošno upri tute da. O Pavle dengja akava sovet celo sobranieske, a na samo e starešinenge (2. Sol. 1:1; 3:6). Adaleske, keda jekh hristijani ka primetinel sine kaj nekoj taro sobranie nane poslušno ko sovetija taro e Devleskoro Lafi, korkori odlučinela sine poviše te na družinel pe lea.

Dali adava značinela sine kaj asavkea valjani sine te ponašinen pe sar te phene tano cidimo taro sobranie? Na, soske o Pavle akava da vakergja: „Opomeninen le sar phral“. Znači o hristijanja ponadari da ko sostanokija hem ki služba ka družinen pe sine adalea so sine obeležimo, ama na hem ko slobodno vreme. Soske? „Te šaj te ladžal“, pišingja o Pavle. Okova so na živinela sine uredno šaj ka ladžal sine hem ka popravinel pe ako tano obeležimo (2. Sol. 3:14, 15).

Sar šaj te primenina akava sovet avdive? Prvo, valjani te ova sigurna kaj nekoj čače na živinela uredno hem agjaar ponašinela pe, sar so opišingja o Pavle. O Pavle na kergja lafi bašo manuša so kerena porazlična bukja amendar, a tane mukhle ki sovest ili ko lično vkus. A ni na mislingja ko okola so šaj povredingje amen neštolea. Ov kergja lafi konkretno bašo okola so namerno birinena te na šunen o jasna bibliska sovetija.

Avdive, ako primetinaja kaj nesavo phral ili phen uporno na mangela te šunel o sovetija taro e Devleskoro Lafi, a korkori ka odlučina te na družina amen lea hem te na nakhava lea vreme. Adaleske, so akaja tani lično odluka, na valjani te kera lafi baši late e javerencar, osven amare kherutnencar soj Svedokija. A adale phralea ili phenjaja ponadari da ka družina amen ko sostanokija hem ki služba. Keda ka dikha kaj popravingja pe, ka družina amen lea sar angleder.