O apostol Pavle pišingja e Timoteeske kova isto agjaar sine starešina: „Zapovedinava tuke anglo Devel, anglo Hristos Isus hem anglo birime angelija, te ikere tut ko akala upatstvija bizo te sudinen e manušenge angleder hem bizo te deline e manušen“ (1. Tim. 5:21).

Prvo, te dikha koj našti te oven akala birime angelija. Jasno tano kaj adala nane o 144.000. Keda o Pavle pišingja akava e Timoteeske, panda na počmingja o voskresenie e pomazime hristijanengoro bašo životo ko nebo. O apostolija hem o javera pomazanikija panda na sine duhovna suštestvija hem adaleske našti sine ola te oven o „birime angelija“ (1. Kor. 15:50-54; 1. Sol. 4:13-17; 1. Jov. 3:2).

Isto agjaar, o „birime angelija“ našti te oven o angelija kola so na sine poslušna ko vreme keda sine o Potop. Adala angelija ule tari strana e Satanaskiri hem ule demonija, a adalea ule dušmanja e Isuseskere (1. Moj. 6:2; Luka 8:30, 31; 2. Pet. 2:4). Ki idnina, ola ka oven frdime ki bezdna kote so ka oven 1.000 berša, a palo adava ka oven uništime zaedno e Bengea (Juda 6; Otk. 20:1-3, 10).

Znači o „birime angelija“ kola so o Pavle spomningja len mora te oven o angelija soj ko nebo kola so verno sorabotinena okolencar soj spomnime ko isto stiho, e Devlea hem e Hristos Isusea.

Isi but milje verna angelija (Evr. 12:22, 23). Hem izgleda, nane len sarinen isto zadača ko isto vreme (Otk. 14:17, 18). Na primer, ki jekh situacija jekh angeli dobingja zadača te mudarel 185.000 asirska vojnikija (2. Car. 19:35). Tari javer strana, poviše angelija šaj dobingje i zadača „te ciden taro [e Isuseskoro] Carstvo sa okolen so kerena o javera te grešinen hem so kerena lošna bukja“ (Mat. 13:39-41). Javera šaj „ka kheden okolen so ov biringja“ bašo nebo (Mat. 24:31). A isi hem asavke soj lenge zapovedimo te arakhen amen ko sa amare drumija (Ps. 91:11; Mat. 18:10; sporedin Matej 4:11; Luka 22:43).

O „birime angelija“ kola soj spomnime ko 1. Timotej 5:21, verojatno tane o angelija so isi len posebna zadače povrzime e Devleskere narodoja. Taro kontekst dikhaja kaj o Pavle dengja mudra sovetija e starešinenge, kola so zaslužinena o javera taro sobranie te poštujnen len. A o starešine valjani te keren pumare zadače bizi pristrasnost hem predrasude, hem te na anen odluke bizo šukar te razmislinen. Jekh važno pričina soske valjani te šunen o sovet e Pavleskoro tano adaleske so sa so kerena, kerena „anglo Devel hem anglo Hristos Isus hem anglo o birime angelija“. Taro akava jasno dikhela pe kaj nesave angelija isi len zadače soj tane povrzime e sobraniea, na primer, te zaštitinen e Devleskere slugen, te nadgledinen o propovedibe hem te izvestinen e Jehova bašo adava so dikhena (Mat. 18:10; Otk. 14:6).