DALI primetingjan kaj but manuša ko sveto mislinena kaj o javera valjani te ponašinen pe lencar ko posebno način ili kaj valjani te dobinen posebna pravija? Bizi razlika kobor but dobinena, ola mislinena kaj zaslužinena poviše. Agjaar razmislinena soske isi len sebično stavi hem nane blagodarna, a i Biblija vakerela kaj o manuša ko posledna dive ka oven asavke (2. Tim. 3:2).

Džangjola pe kaj sekogaš sine manuša soj sebična. Na primer, o Adam hem i Eva mangle korkori te odlučinen baši peske soj tano šukar a soj lošno, a adava angja dži ko katastrofalna posledice. Vekoncar palo adava, o Ozija o cari ki Juda, mislingja kaj isi le pravo te tharel temjani ko hrami, ama ov but hovavgja pe (2. Let. 26:18, 19). Slično, o fariseija hem o sadukeija mislinena sine kaj zaslužinena o Devel te postapinel lencar ko posebno način samo adaleske so avena taro Avraam (Mat. 3:9).

Živinaja maškar o manuša soj tane sebična hem lengoro stavi šaj te vlijajnel upri amende (Gal. 5:26). Šaj te počmina te mislina amenge kaj zaslužinaja te dobina nesavi privilegija ili kaj o javera valjani te postapinen amencar ko posebno način. So šaj te pomožinel amen te na razmislina agjaar? Prvo, valjani te haljova sar o Jehova dikhela ki akaja buti. Bašo adava šaj te pomožinen amen duj bibliska načelija.

O Jehova tano adava so odlučinela so valjani te dobina. Te dikha nekobor primerija.

• Ki familija, o rom valjani te osetinel kaj  tano poštujmo tari pli romni, a i romni valjani te osetinel kaj tani mangli taro plo rom (Ef. 5:33). Hem o rom hem i romni isi len pravo te očekujnen lengoro bračno partneri te sikavel romantično mangipe samo leske (1. Kor. 7:3). E roditelen isi len pravo te očekujnen lengere čhave te oven lenge poslušna, a e čhaven isi len pravo te očekujnen lengere roditelija te grižinen pe lenge hem te sikaven lenge mangipe (2. Kor. 12:14; Ef. 6:2).

• Ko sobranie, o starešine zaslužinena te poštujna len adaleske so but trudinena pe (1. Sol. 5:12). Ama, len nane len pravo te gospodarinen upro phralja hem phenja (1. Pet. 5:2, 3).

• O Devel dengja pravo e manušikane vladenge te roden danokija hem te oven poštujme okolendar upro kolende so vladinena (Rim. 13:1, 6, 7).

O Jehova mangipaja dela amen but poviše taro adava so zaslužinaja. Adaleske so nasledingjem o grevo, amen zaslužinaja samo te mera (Rim. 6:23). Sepak, o Jehova dela amen but blagoslovija bašo plo verno mangipe (Ps. 103:10, 11). Sekova blagoslov so dobinaja lestar tano adaleske so sikavela amenge plo šukaripe so na zaslužinaja le (Rim. 12:6-8; Ef. 2:8).

Pazin te na počmine te razmisline sar o manuša ko sveto. Bizo te ova svesna, šaj te počmina te mislina kaj zaslužinaja poviše nego javera. Ki sporedba so vakergja la o Isus bašo rabotnikija kolenge so sine platimo po jekh denarij, sikavela kobor lokheste šaj nekoj te počminel te razmislinel agjaar. Nesave rabotnikija počmingje te keren buti rano sabajle hem kergje celo dive buti ko baro kham, a javera kergje samo jekh saati. O rabotnikija tari prvo grupa mislingje kaj valjani te dobinen pobari plata adaleske so završingje i buti (Mat. 20:1-16). Akaja sporedba e Isuseskiri sikavela kaj leskere sledbenikija valjani te oven zadovolna adalea so o Devel dela len.

Ov blagodarno hem ma adžiker te dobine nešto taro javera (1. Sol. 5:18). Dža palo primer e apostol Pavleskoro kova so na rodingja taro phralja ko Korint finansiski te poddržinen le iako sine le pravo bašo adava  (1. Kor. 9:11-14). Valjani te ova blagodarna bašo sa so dobinaja taro javera namesto te očekujna nešto lendar.

Ov ponizno. Keda nekas isi le but baro mislenje baši peste, ov obično mislinela kaj valjani te dobinel poviše taro adava so isi le. I poniznost tani protiv otrov bašo asavko štetno razmislibe.

O proroko o Daniel tano šukar primer baši poniznost. Ov avela sine tari jekh važno familija, šukar izgledinela sine, sine inteligentno hem sine le but sposobnostija. Adaleske, ov šaj sine te mislinel kaj zaslužinela o privilegie so isi le (Dan. 1:3, 4, 19, 20). Ama, o Daniel ačhilo ponizno hem adaleske sine but skapoceno anglo e Jehovaskere jakhja (Dan. 2:30; 10:11, 12).

Te ova odlučna te borina amen e sebično stavea kova so isi avdive ko sveto hem ponadari da te radujna amen ko sekova blagoslov so o Jehova dela amen adaleske so sikavela amenge plo šukaripe so na zaslužinaja le.