I Meri hem lakoro rom o Džon, a živinena ki phuv kote so o šukar haberi šaj te propovedinel pe bute rabotnikonge kola so avena taro Filipini. Džikote sine i pandemija KOVID-19, i Meri počmingja bibliska kursija na samo ki phuv kote so živinela nego hem ko javera thana ko sveto. Sar uspejngja ko adava?

I Meri pučlja ple interesentken: „Dali džanea nekas javere so bi mangela te proučinel i Biblija?“ Ako vakerena sine oja, oj zamolinela len sine te zapoznajnen la lencar. Akava ednostavno pučibe, but puti anela sine šukar rezultatija. Soske? Adaleske so o manuša kola so ceninena e Devleskoro Lafi obično mangena te vakeren adava so sikljovena pumare familijake ili e paše amalenge. So slučingja pe keda i Meri pučlja akava?

E Merakiri interesentka, i Džasmin, zapoznajngja la štare džuvlencar kola so mangle te proučinen i Biblija. Jekh lendar, i Kristin, doborom uživinela sine ko kursi so zamolingja e Mera te proučinen duj puti ko kurko. Keda i Meri pučlja la dali pendžarela nekas javere so bi mangela te proučinel i Biblija, i Kristin vakergja: „Oja, ka zapoznajnav tut mle amalinkencar“. Bašo nekobor kurke, i Kristin zapoznajngja e Mera štare amalinkencar kola so mangle biblisko kursi. Pokasno, i Kristin zapoznajngja la hem javere amalinkencar, a nesave lendar vakergje kaj isi panda nekobor džene so bi šaj te oven zainteresirime.

I Kristin manglja lakiri familija da ko Filipini te sikljol tari Biblija. Adaleske, kergja lafi ple čhajaja e Andreaja. Ko početok, i Andrea mislinela peske sine: „O Svedokija tane sekta, ola na verujnena ko Isus hem koristinena samo o purano zavet“. Ama otkeda samo jekh puti proučingja, halili kaj adava so mislinela sine bašo Svedokija, nane točno. Džikote trajnela sine o kursi, but puti vakerela sine: „Ako i Biblija vakerela agjaar, adava mora te ovel čače!“

Palo nesavo vreme i Andrea zapoznajngja e Mera duje amalinkencar hem jekhe koleškaja, kola so počmingje te proučinen. Isto agjaar, e Andreakiri tetka, i Andžela, koja so sine koroli, sekogaš šunela sine džikote ola proučinena sine, a i Meri na džanela sine adava. Jekh dive, i Andžela zamolingja e Andrea te zapoznajnel la e Meraja hem rodingja biblisko kursi. I Andžela uživinela sine ko adava so sikljola. Jekhe masekoske, oj pamtingja but stihija hem manglja te proučinen štar puti ko kurko. Adaleske so i Andrea pomožinela la sine, počmingja  isto agjaar te ovel redovno ko sostanokija preku videokonferencija.

Keda i Meri doznajngja kaj e Kristinakoro rom, o Džošua, sekogaš sine athe hem šunela sine džikote ola proučinena, pučlja le dali mangela ov da te vklučinel pe. O Džošua vakergja: „Samo ka šunav, ama ma puč man pučiba. Ako pučea man nešto, ka cidav man“. Na nakhle ni pandž minutija taro kursi, a ov pučlja poviše pučiba nego i Kristin, a manglja ponadari da te kerel lafi baši Biblija.

O ednostavno pučibe e Merakoro angja dži ko adava te oven la but bibliska kursija. Nesave lendar dengja len javere phralenge hem phenjenge. Sa vkupno, i Meri počmingja 28 bibliska kursija ko štar phuvja.

I Džasmin, i prvo interesentka so sine spomnimi ko akava iskustvo, krstingja pe ko april 2021 berš. I Kristin krstingja pe ko maj 2022 berš hem irangja pe ko Filipini te šaj te ovel ple familijaja. O duj javera interesentke kola so i Meri zapoznajngja len preku i Kristin, isto agjaar krstingje pe. Nekobor masekija pokasno, otkeda i Kristin krstingja pe, krstingja pe i Andžela da, a akana služinela sar opšto pioneri. E Kristinakoro rom o Džošua, lengiri čhaj i Andrea, a hem nekobor javera interesentija šukar napredujnena ko duhovno pogled.

Ko prvo veko, but manuša vakerena sine pumare familijake hem amalenge adava so siklile bašo Isus (Jovan 1:41, 42a; Apostolija 10:24, 27, 48; 16:25-33). Soske na pučea okolen kasaja so proučinea i Biblija hem javere manušen kola so sikavena interes: „Dali džanea nekas javere so bi mangela te proučinel i Biblija?“ Kotar džanea kobor bibliska kursija šaj te počmine ako pučea akava ednostavno pučibe kova so sekoj šaj te pučel le.