1. Ko so tane koncentririme but manuša avdive?

 DALI primetingjan kaj but džene avdive tane koncentririme samo ki peste? Na primer, nesave koristinena o socijalna mreže te šaj te falinen korkori pes hem te falinen pe adalea so kergje. Sepak, hari džene avdive dena slava e Jehovaske. Ki akaja statija ka dikha so značinela te de slava e Jehovaske hem so valjani te pottikninel amen te kera adava. Isto agjaar, ka dikha sar šaj te da i slava e Devleske so zaslužinela la hem sar ov ka slavinel plo anav panda hari.

SO ZNAČINELA TE DEL PE SLAVA E JEHOVASKE?

2. Sar o Jehova sikavgja pli slava ki planina Sinaj? (Dikh hem i slika tari.)

² So značinela o lafi slava? Ki Biblija, e lafea „slava“ šaj te mislinel pe ko sa o bukja so anena dži ko adava nekoj te ovel posebno baro anglo javera. O Jehova ko jekh mokjno način sikavgja pli slava kratko otkeda o Izraelcija sine oslobodime taro ropstvo ko Egipet. Zamislin tuke akaja situacija: Milionja Izraelcija khedingje pe tele ki planina Sinaj te šaj te šunen adava so ka vakerel lenge o Devel. Jekh kalo oblako učhargja i planina. Taro jekh puti jekh silno zemjotres, verojatno ko isto momenti sine hem vulkansko aktivnost, tresingja i phuv telo lengere pre džikote ko isto vreme sine šemšekija, grmingja hem šundilo but glasno zvuko tari šing (2. Moj. 19:16-18; 24:17; Ps. 68:8). Zamislin kobor but sine vooduševime akala Izraelcija keda dikhle sar o Jehova sikavela pli slava ko asavko mokjno način.

3. Sar šaj te da slava e Jehovaske?

 ³ Ama sar tano amencar e manušencar? Dali amen da šaj te da slava e Jehovaske? Normalno kaj šaj. Jekh način sar daja slava e Jehovaske tano agjaar so vakeraja e javerenge baši leskiri bari mokj hem bašo leskere šuže osobine. Isto agjaar, slavinaja e Devle agjaar so priznajnaja kaj ov pomožinela amen te kera sa o bukja (Isa. 26:12). O cari o David tano but šukar primer bašo adava so značinela te del pe slava e Jehovaske. Ki jekh molitva so vakergja la anglo celo izraelsko narodo, o David vakergja e Devleske: „Tuke Jehova pripadinela o baripe, i mokj, o šužipe, i vozvišenost hem i slava, soske sa soj ko nebo hem ki phuv tano tlo“. Otkeda o David završingja pli molitva, celo narodo falingja e Jehova (1. Let. 29:11, 20).

4. Sar o Isus dengja slava e Jehovaske?

⁴ Keda sine ki phuv, o Isus slavingja ple Dade agjaar so vakerela sine e javerenge kaj ov dela le i mokj te šaj te kerel čudija (Mar. 5:18-20). Isto agjaar, o Isus dengja slava e Jehovaske agjaar so vakerela sine e javerenge bašo plo Dad hem adalea sar postapinela sine e javerencar. Ki jekh prilika, o Isus sikavela sine e manušen ki jekh sinagoga. Maškar adala so šunena sine, sine hem jekh džuvli kola so 18 berš sine la demoni. Adaleske, oj sine grbavimi hem našti sine nisar te isprajnel pe. Kobor žalno! O sočuvstvo pottikningja e Isuse te vikinel e džuvlja hem ko ljubezno način te vakerel lake: „Oslobodimi sian taro tlo nasvalipe“. Palo adava čhivgja ple vasta upri late, a oj odma isprajngja pe hem počmingja te falinel e Devle adaleske so sastili (Luka 13:10-13). La sine la šukar pričina te del slava e Jehovaske, a amen da isi amen.

SO POTTIKNINELA AMEN TE DA SLAVA E JEHOVASKE?

5. Kola pričine isi amen te poštujna e Jehova?

⁵ Slavinaja e Jehova adaleske so hor poštujnaja le. Isi amen but pričine te poštujna e Devle. O Jehova tano Semokjno, leskiri mokj nane la granice (Ps. 96:4-7). Leskiri bari mudrost jasno dikhjola taro adava so stvoringja. Ov dengja amen životo hem dela amen sa so valjani amenge te šaj te živina (Otk. 4:11). Ov tano verno (Otk. 15:4). Uspešno tano ko sa so kerela hem sekogaš ačhola ko plo lafi (Is. Nav. 23:14). Baš adaleske o proroko o Eremija bašo Jehova vakergja: „Maškar sa o mudra manuša ko narodija hem ko sa lengere carstvija nijekh nane sar tute“ (Erem. 10:6, 7). Čače, isi amen šukar pričine te poštujna amare nebesno Dade. Ama leskere but šuže osobine na pottiknine amen samo te poštujna le nego hem te manga le.

6. Soske mangaja e Jehova?

⁶ Slavinaja e Jehova adaleske so but mangaja le. Razmislin bašo nesave taro e Jehovaskere osobine kola so pottikninena amen te manga le. Ov tano milostivo hem sočuvstvitelno (Ps. 103:13; Isa. 49:15). Keda amen osetinaja dukh, ov da osetinela dukh (Zah. 2:8). O Jehova pomožinela amen te ova paše amala lea (Ps. 25:14; Apo. 17:27). Hem, o Jehova tano ponizno. Ki Biblija pišinela: „Ov teljola te šaj te dikhel o nebo hem i phuv, taro pravo vazdela e čorole“ (Ps. 113:6, 7). Sa akala bukja pottikninena amen te manga te slavina amare but šukar Devle (Ps. 86:12).

7. Savi posebno prilika isi amen?

⁷ Slavinaja e Jehova adaleske so mangaja o javera te zapoznajnen le. But džene na džanena o čačipe bašo Jehova. Soske? Adaleske so o Satana širingja but hovajba bašo  Devel hem o manuša verujnena ki lende (2. Kor. 4:4). O Satana ubedinela e manušen kaj o Jehova mangela samo te kazninel, kaj na grižinela pe lenge hem kaj ov tano krivo bašo but muke so isi ko sveto. Ama amen džanaja o čačipe bašo amaro Devel. Isi amen prilika te sikava kaj o Satana hovavela hem agjaar te da slava e Jehovaske (Isa. 43:10). Pobaro delo taro 96 Psalm kerela lafi bašo dejbe slava e Jehovaske. Džikote dikhaja nesave delija taro akava Psalm, razmislin ko save načinija šaj te de slava e Jehovaske koja so ov zaslužinela la.

SAR ŠAJ TE DA E JEHOVASKE I SLAVA SO ZASLUŽINELA LA?

8. Kova tano jekh način sar slavinaja e Jehova? (Psalm 96:1-3).

⁸ Čitin Psalm 96:1-3. Šaj te slavina e Jehova adalea so vakeraja baši leste. Ko akala stihija siem pottiknime te giljava e Jehovaske, te falina leskoro anav, te vakera o šukar haberi bašo spasenie so dela le ov hem te vakera maškar o narodija baši leskiri slava. Akala tane nekobor načinija sar šaj te slavina amare nebesno Dade amare lafencar. O verna Evreija, a palo adava hem o hristijanja ko prvo veko, revno vakergje e javerenge bašo sa o šukar bukja so o Jehova kergja lenge hem braningje leskoro anav (Dan. 3:16-18; Apo. 4:29). Sar šaj amen da te kera adava?

9-10. So sikljovea taro iskustvo e Andželinakoro? (Dikh hem i slika.)

⁹ Razmislin bašo iskustvo e Andželinakoro, a jekh phen koja so živinela ki Amerika. Oj hrabro braningja e Jehovaskoro anav ki buti. Keda počmingja te kerel buti athe, i Andželina sine vikimi ko jekh sostanok kote so sa e neve rabotnikon sine len prilika te vakeren nešto anglo kolege baši peste. I Andželina spremingja prezentacija slikencar te šaj te sikavel kaj sar e Jehovaskoro svedoko isi la srekjno životo. Ama, angleder oj te avel ko redo, jekh lakoro kolega vakergja kaj barilo roditelencar so sine e Jehovaskere svedokija. Ov počmingja te lel ki hajgara amare veruvanja. I Andželina vakerela. „Mlo srce počmingja silno te khuvel. Ama mislingjum mange: ’Dali ka dozvolinav nekoj te vakerel hovajba bašo Jehova, ili ka braninav leskoro anav?‘“

 ¹⁰ Keda lakoro kolega završingja, i Andželina kratko molingja pe ki peste. Palo adava, ljubezno vakergja leske akala lafija: „Isi amen nesave sličnostija. Me da bariljum sar Svedoko hem panda sium“. Iako dikhjola sine kaj i situacija tani napnato, i Andželina ačhili smirimi džikote sikavela sine o šuže slike taro teokratska nastanija kolende so prisustvujngja hem džikote taktično braninela sine ple veruvanja (1. Pet. 3:15). Savo sine o rezultati taro adava? Keda i Andželina završingja ple prezentacijaja, akava manuš kovlilo. Ov čak priznajngja kaj sine le šukar momentija taro vreme keda barilo sar e Jehovaskoro svedoko. I Andželina vakerela: „O Jehova zaslužinela te branina le. Čest tano te branina leskoro anav“. Amen da šaj te falina hem te slavina e Jehova keda o javera na poštujnena le. A adaja tani bari čest.

11. Sar o sluge e Jehovaskere primeningje o načelo taro Psalm 96:8 ko purano vreme?

¹¹ Čitin Psalm 96:8. Šaj te slavina e Jehova e bukjencar so isi amen. E Jehovaskere sluge otsekogaš dena le sine čest ko asavko način (Izr. 3:9). Na primer, o Izraelcija dengje pare hem vredna bukja te šaj te gradinel pe hem te održinel pe o hrami (2. Car. 12:4, 5; 1. Let. 29:3-9). Nesave učenikija e Isuseskere poddržingje le hem leskere apostolen e bukjencar so sine len (Luka 8:1-3). Nesave hristijanja ko prvo veko isto agjaar bičhalgje pomoš pumare phralenge hem phenjenge kola so sine ko thana kote so sine bokhalipe (Apo. 11:27-29). Amen da avdive šaj te slavina e Jehova amare dobrovolna prilogoncar.

12. Sar šaj amare prilogija te anen slava e Jehovaske? (Dikh hem i slika.)

¹² Te dikha samo jekh primer kova so sikavela sar amare prilogija anena slava e Jehovaske. Jekh izveštaj ko 2020 berš, kerela sine lafi baši jekh bari suša koja so sine ko Zimbabve. Milionja manuša sine ki opasnost te meren bokhatar, a maškar lende sine jekh amari phen so vikinela pe Priska. Iako sine suša, i Priska na čhinavgja te džal ki služba sekoja sreda hem petok, čak ki sezona keda randena pe sine o nive. Lakere komšie asana sine lake adaleske so džala ki služba namesto te kerel buti ko ple nive hem vakerena sine lake: „Ka mere bokhatar“. I Priska sine sigurno kaj o Jehova ka grižinel pe lake hem adaleske vakerela sine:  „O Jehova nikogaš nane te mukhel ple slugen“. Kratko palo adava, oj dobingja pomoš tari amari organizacija — hajbe hem javera bukja so valjanena sine lake, a adava šaj sine te dobinel adaleske so sarine amen daja prilogija. O komšie e Priskakere sine vooduševime hem vakergje: „O Devel nikogaš na mukhlja tut. Adaleske, amen da mangaja te sikljova nešto poviše baši leste“. Efta taro lakere komšie počmingje te aven ko sostanokija.

13. Sar amare ponašibaja šaj te slavina e Jehova? (Psalm 96:9).

¹³ Čitin Psalm 96:9. Šaj te slavina e Jehova amare ponašibaja. O sveštenikija kola so služinena sine ko sveto šatori valjani sine te oven čista ko fizičko pogled (2. Moj. 40:30-32). Amen da valjani te ova čista ko fizičko pogled, ama panda považno taro adava tano te ačhova čista ko amare misle, lafija hem postapke (Ps. 24:3, 4; 1. Pet. 1:15, 16). I Biblija vakerela kaj valjani te huljava „i purani ličnost“, a te urava „i nevi ličnost“. Adava značinela kaj valjani te trudina amen te na razmislina hem te na postapina ko način sar so na mangela o Jehova. Namesto adava, te razmislina hem te postapina ko način kolea so ka sikavel e Jehovaskere but šuže osobine (Kol. 3:9, 10). Adaleske so o Jehova pomožinela amen, čak hem nesave manuša kola so živinena but nemoralno hem tane but nasilna, šaj te meninen pe hem te uraven i nevi ličnost.

14. So šaj te sikljova taro Džek? (Dikh hem i slika.)

¹⁴ Te dikha o iskustvo jekhe nasilno hem opasno manušeskoro kova so vikinela pe sine Džek, a kole so dengje nadimak, o Demoni. Adaleske so kergja pharo kriminal, ov sine osudimo ki smrtno kazna. Sepak, džikote adžikerela sine te ovel mudardo, ov složingja pe te proučinel jekhe phralea kova so posetinela sine o zatvor koleste so sine phanlo ov. Iako o Džek sine opasno hem nasilno manuš, ov huljavgja i purani ličnost hem sar so nakhela sine o vreme phergja o uslovija te krstinel pe. Ov doborom promeningja pe, so ko dive keda valjani sine te mudaren le, nesave čuvarengere jakhja pherdile asva džikote pozdravinena pe sine lea. Jekh vojniko so kerela sine buti ko zatvor, vakergja: „Angleder, o Džek sine jekh taro najlošna zatvorenikija akate, ama akana tano jekh taro najšukar“. Jekh  kurko otkeda sine mudardo o Džek, o phralja so gele ko zatvor te šaj te ikeren o sostanok bašo adava kurko dikhle jekhe zatvoreniko kova so prvo puti alo. So pottikningja le te avel ko sostanok? Ov sine vooduševimo taro promene so kergja o Džek hem manglja te doznajnel so valjani te kerel te šaj te služinel e Jehovaske. Dikhjola kaj o način sar ponašinaja amen, šaj te slavinel amare nebesno Dade (1. Pet. 2:12).

SAR O JEHOVA KA SLAVINEL PLO ANAV PANDA HARI

15. Sar o Jehova celosno ka slavinel plo anav panda hari? (Psalm 96:10-13).

¹⁵ Čitin Psalm 96:10-13. Akala posledna stihija taro 96 Psalm, opišinena e Jehova sar pravedno Sudija hem Cari. Sar o Jehova ka slavinel plo anav panda hari? Agjaar so ka anel pravda. Panda hari ov ka uništinel o Baro Vavilon adaleske so anela ladž leskere sveto anaveske (Otk. 17:5, 16; 19:1, 2). Nesave, keda ka dikhen kaj tano uništimo o Baro Vavilon, šaj ka počminen te služinen e Jehovaske zaedno amencar. Ko krajo, ko Armagedon, o Jehova ka uništinel celo sveto e Satanaskoro agjaar so ka uništinel sa okolen so protivinena pe leske hem so anena ladž leskere anaveske. A ka spasinel sa okolen so mangena le, soj leske poslušna hem so anena leske slava (Mar. 8:38; 2. Sol. 1:6-10). Palo posledno ispit, otkeda ka završinen o milja berša kote so ka vladinel o Hristos, o Jehova celosno ka slavinel plo sveto anav (Otk. 20:7-10). Tegani, „i phuv ka ovel pherdi pendžaribaja baši e Jehovaskiri slava sar soj o more pherdo panjea“ (Avak. 2:14).

16. So sian odlučno te kere? (Dikh hem i slika.)

¹⁶ Kobor šukar ka ovel keda sekoj ka del e Jehovaske i slava koja so pripadinela leskere anaveske. Ama, džikote avela adava dive, šaj te da amendar sa te slavina e Jehova ki sekoja prilika. Te šaj te istakninel kobor tano važno akava, o Vodečko telo odlučingja o Psalm 96:8 te ovel e beršeskoro stiho bašo 2025 berš: „Den e Jehovaske i slava koja so pripadinela leskere anaveske“.