STATIJA PROUČIBASKE 5
GILI 108 E Devleskoro verno mangipe
Save blagoslovija isi amen taro e Jehovaskoro mangipe?
O Hristos Isus alo ko sveto te spasinel e grešnikon (1. TIM. 1:15)
SO KA SIKLJOVA
Ka dikha savi korist isi amen tari otkupnina hem sar šaj te sikava e Jehovaske kaj siem blagodarna.
1. So šaj te kera te šaj te radujna e Jehova?
ZAMISLIN kaj nekaske so mangea le dea posebno poklon soj tano šužo hem praktično. Kobor ka ove razočarimo ako ov samo čhivela le ki nesavi fioka hem nikogaš poviše na setinela pe ki leste! Tari javer strana, sigurno ka ovel tuke but milo ako ov koristinela o poklon hem sikavela kaj tano blagodarno baši leste. Sar akava primer šaj te povrzina le e otkupninaja? O Jehova dengja ple Čhave te merel amenge. Kobor srekjno mora te ovel o Jehova keda sikavaja kaj siem blagodarna bašo adava skapoceno poklon hem bašo leskoro mangipe kova so teringja le te del i otkupnina! (Jovan 3:16; Rim. 5:7, 8).
2. So ka dikha ki akaja statija?
2 Sepak, sar so nakhela o vreme, šaj te našava amaro cenenje baši otkupnina hem te na dikha ki late sar skapoceno poklon. Adava bi ovela sar te phene čhivaja o poklon taro Devel ki fioka. Srekjna siem so isi amen, ama bešela amenge ki strana. Te šaj te na našava amari blagodarnost mora redovno te razmislina bašo sa adava so kergje o Devel hem o Hristos amenge. Akaja statija ka pomožinel amen ko adava. Ka dikha sar koristinela amenge i otkupnina avdive hem sar šaj te koristinel amenge ki idnina. Isto agjaar, ka dikha sar šaj te sikava blagodarnost bašo e Jehovaskoro mangipe, posebno angleder hem pali Spomen-svečenost akava berš.
SAR KORISTINELA AMENGE AVDIVE
3. Kova tano jekh način sar koristinela amenge i otkupnina avdive?
3 Amen više isi amen korist tari otkupno žrtva e Hristoseskiri. Na primer, adaleske so sine dendi i otkupnina, o Jehova prostinela amare grevija. Ov nane dužno te prostinel amenge, ama mangela te kerel adava. Tari blagodarnost o psalmisti vakergja: „Tu, Jehova, sian šukar hem spremno sian te prostine“ (Ps. 86:5; 103:3, 10-13).
4. Kaske o Jehova dengja i otkupnina? (Luka 5:32; 1. Timotej 1:15).
4 Nesave šaj mislinena kaj na zaslužinena o Jehova te prostinel lenge. Ustvari, nikoj amendar na zaslužinela. O apostol Pavle halilo kaj nane dostojno te ovel vikimo apostoli, sepak vakergja: „Adaleske so o Devel sikavgja mange plo šukaripe so na zaslužinaja le, me sium apostoli“ (1. Kor. 15:9, 10). Keda kainaja amen bašo amare grevija, o Jehova prostinela amenge. Soske? Na adaleske so zaslužinaja, nego adaleske so mangela amen. Ako tu da mislinea kaj na zaslužinea o Jehova te prostinel tuke, ma bistre kaj o Jehova na dengja i otkupnina sovršena manušenge, nego adalenge so kainena pe bašo pumare grevija. (Čitin Luka 5:32; 1. Timotej 1:15.)
5. Dali nekas amendar isi le pravo te mislinel kaj o Jehova mora te prostinel leske? Objasnin.
5 Nikoj amendar na valjani te mislinel kaj isi le pravo o Jehova te sikavel leske milost, čak ako beršencar služinela leske. Normalno, o Jehova ceninela sa adava so kergjem leske (Evr. 6:10). Ov dengja ple Čhave amenge sar besplatno poklon, a na sar plata baši služba so keraja leske. Ka ovel pogrešno ako mislinaja kaj zaslužinaja o Jehova te prostinel amenge samo adaleske so kergjem but bukja baši leste. Adava bi ovela sar te phene vakeraja kaj na sine potrebno o Isus te merel. (Sporedin Galatjanja 2:21.)
6. Soske o Pavle trudingja pe but ki služba bašo Jehova?
6 O Pavle džanlja kaj našti te zarabotinel e Devleskiri milost. Tegani soske doborom but trudingja pe ki služba bašo Jehova? Na te šaj te dokažinel kaj zaslužinela e Jehovaskoro šukaripe, nego te sikavel blagodarnost baši otkupnina (Ef. 3:7). Isto sar o Pavle, amen da ponadari služinaja revno, na te šaj te zarabotina e Jehovaskiri milost, nego te sikava blagodarnost baši late.
7. Ko savo javer način koristinela amenge i otkupnina avdive? (Rimjanja 5:1; Jakov 2:23).
7 Javer način sar koristinela amenge i otkupnina avdive tano agjaar so sekoj amendar šaj te ovel paše amal e Jehovaja. a Sar so dikhlem ki angluni statija, keda bijandilem, na siem sine amala e Devlea. Ama adaleske so sine dendi i otkupnina, šaj te ova ko „mir e Devlea“, a adava pomožinela amen te ova lea paše. (Čitin Rimjanja 5:1; Jakov 2:23.)
8. Soske valjani te ova blagodarna e Jehovaske baši čest te molina amen leske?
8 Razmislin baši panda jekh buti so šaj te kera adaleske so siem amala e Jehovaja — isi amen čest te molina amen leske. O Jehova na šunela samo o javna molitve ple slugengere keda khedena pe zaedno, nego hem o lična molitve sekole jekheskere amendar. I molitva šaj te smirinel amaro vilo hem te del amen andruno mir. Ama, oj tani but poviše nego šukar terapija. Oj šaj te kerel te ova panda popaše e Devlea (Ps. 65:2; Jak. 4:8; 1. Jov. 5:14). Džikote sine ki phuv, o Isus često molinela pe sine adaleske so džanlja kaj o Jehova šunela le hem kaj i molitva ka pomožinel leske te ačhol paše amal ple Dadea (Luka 5:16). But siem blagodarna so e Isuseskiri otkupno žrtva pomožinela amen te ova amala e Jehovaja, pa čak hem te kera lea lafi ki molitva!
SAR ŠAJ TE KORISTINEL AMENGE KI IDNINA
9. Sar ka koristinel i otkupnina e Jehovaskere verna slugenge ki idnina?
9 Savi korist tari otkupnina ka ovel e Jehovaskere verna slugen ki idnina? Ka dobinen večno životo. But manuša mislinena kaj adava našti te ovel adaleske so o manuša merena više nekobor milja berša. Ama, e Jehovaskiri namera ko početok sine o manuša te živinen večno. Te na grešinel sine o Adam, nikoj nane te mislinel sine kaj o večno životo tano previše šukar te šaj te ovel čače. Hem iako akana pharo amenge te zamislina kaj ka živina večno, šaj te verujna ko adava. Soske? Adaleske so o Jehova platingja i najskupo cena — o životo ple mangle Čhaveskoro (Rim. 8:32).
10. So edvaj adžikerena o pomazanikija, a so o javera bakhre?
10 Iako o večno životo ka dobina le ki idnina, o Jehova mangela te razmislina baši leste panda akana. O pomazanikija edvaj adžikerena o vreme keda ka vladinen zaedno e Isusea taro nebo upri phuv (Otk. 20:6). O javera bakhre nadinena pe kaj ka živinen ko raj ki phuv, kote so nane te oven len dukha, muke hem nane te oven tažna (Otk. 21:3, 4). Dali tu da sian delo taro javera bakhre kolen so isi len nadež bašo večno životo ki phuv? Asavko životo nane samo utešno nagrada. O Jehova kergja e manušen baši adaja cel hem adaleske o životo ki phuv ka kerel amen but srekjna.
11-12. Kola tane nesave blagoslovija ko raj so edvaj adžikeraja len? (Dikh hem o slike.)
11 Zamislin savo ka ovel tlo životo ko raj ki phuv. Nane te sekirine tut dali ka nasvaljove ili ka mere (Isa. 25:8; 33:24). O Jehova celosno ka zadovolinel sekoja ispravno želba so isi tut. So bi mangea te sikljove? Dali bi mangea te sikljove nešto poviše bašo životne hem o ptice? Dali mangea te bašale ko nesavo instrumenti ili te crtine? Sigurno ka ovel potreba taro arhitektija, gradežnikija hem zemjodelcija. A ka ovel potreba hem taro nekoj so ka spreminel hajbaske, ka kerel alatija hem ka grižinel pe baši i but šuži priroda (Isa. 35:1; 65:21). Keda ka živine večno ka ovel tut vreme te razvine sekoja veština so ka mange.
12 Kobor ka ova radosna keda ka adžikera adalen so ka voskresninen! (Apo. 24:15). Zamislin hem kobor ka uživine te sikljove bašo Jehova agjaar so ka istražine sa o bukja so ov stvoringja len (Ps. 104:24; Isa. 11:9). A najšukar taro sa ka ovel adava so ka šaj te obožavine e Jehova bizo te osetine tut krivo kaj kergjan nesavo grevo. Dali bi otkažinea tut taro akala blagoslovija so ka oven ki idnina te šaj te uživine „ko grešna zadovolstvija so nakhena“? (Evr. 11:25). Normalno kaj na! Bašo akala blagoslovija vredinela sekoja žrtva so ka kera la avdive. Ma bistre, kaj o raj ki phuv nane večno te adžikera le. Jekh dive ka živina ki leste. Ko ništo taro akava na bi šaj sine te nadina amen ako o Jehova na manglja amen doborom but te šaj te del ple Čhave te merel amenge.
Save blagoslovija ko raj edvaj adžikerea len? (Dikh ko pasusija 11-12)
SIKAV BLAGODARNOST BAŠO E JEHOVASKORO MANGIPE
13. Sar šaj te sikava blagodarnost bašo e Jehovaskoro mangipe? (2. Korinkjanja 6:1).
13 Sar šaj te sikava blagodarnost e Jehovaske bašo adava so dengja i otkupnina? Agjaar so ka čhiva i služba baši leste ko prvo than ko amaro životo (Mat. 6:33). I Biblija vakerela: „[O Isus] mulo sarinenge, te šaj okola so živinena te na živinen više peske, nego leske, kova so mulo lenge hem sine voskresnimo“ (2. Kor. 5:15). Amen sigurno na mangaja te promašina i cel soske amenge sikavdo e Jehovaskoro šukaripe so na zaslužinaja le. (Čitin 2. Korinkjanja 6:1.)
14. Sar šaj te sikava kaj isi amen doverba ko e Jehovaskoro vodstvo?
14 Šaj isto agjaar te sikava blagodarnost bašo e Jehovaskoro mangipe adalea so ka ovel amen doverba ko vodstvo so ov dela amen. Sar? Keda anaja odluke, na primer povrzimo adalea kobor bari škola ka završina ili savi buti ka prifatina, na valjani te bistra so o Jehova mangela te kera (1. Kor. 10:31; 2. Kor. 5:7). Keda amari vera sikavaja la postapkencar, slučinela pe nešto but šukar — amari vera ko Jehova hem amaro amalipe lea ovena pocvrsta, a amari nadež ovela pobari (Rim. 5:3-5; Jak. 2:21, 22).
15. Sar šaj te sikava amaro cenenje angleder hem pali Spomen-svečenost?
15 Isi panda jekh način sar šaj te sikava blagodarnost bašo e Jehovaskoro mangipe. Šaj šukar te koristina o periodi angleder hem pali Spomen-svečenost akava berš te šaj te sikava e Jehovaske kobor siem blagodarna baši otkupnina. Osven so ka planirina te ova prisutna ki Spomen-svečenost, šaj te kanina e javeren da te aven (1. Tim. 2:4). Okolenge so ka kanine len objasnin so ka slučinel pe ki Spomen-svečenost. Šaj te pomožinel tut ako sikavea o videoklipija Soske mulo o Isus? hem Setin tut ko e Isuseskoro meribe? ki jw.org. O starešine valjani te trudinen pe te kaninen adalen soj neaktivna. Kobor bari radost ka ovel hem ko nebo hem ki phuv ako nekoj taro e Jehovaskere bakhre so našavdilo ka ovel pottiknimo te iranel pe ko stado! (Luka 15:4-7). Te čhiva amenge cel te pozdravina amen adalencar so ka aven ki Spomen-svečenost, a posebno okolencar soj neve ili kola so na ale but vreme. Mangaja šukar te dodžakera len! (Rim. 12:13).
16. Soske valjani te trudina amen poviše te dža ki služba ko periodi keda tani i Spomen-svečenost?
16 Šaj li poviše te učestvujne ko duhovna aktivnostija angleder hem pali Spomen-svečenost? Adava tano jekh šukar način te sikave tli blagodarnost bašo sa adava so o Devel hem o Hristos kergje amenge. Kobor poviše učestvujnaja ki služba bašo Jehova, doborom poviše ka osetina leskiri poddrška hem agjaar amari doverba ki leste ka ovel pobari (1. Kor. 3:9). Isto agjaar, čitin o izveštaija tari Biblija baši Spomen-svečenost soj dende ko Diveskoro stiho ili ki tabela soj ko listija spremibaske. Ki tli lično studija šaj pohor te istražine adala bibliska izveštaija.
17. Solea tano zadovolno o Jehova? (Dikh hem i ramka „ Sar te sikave blagodarnost bašo e Jehovaskoro mangipe“.)
17 Normalno, tle okolnostija šaj nane te mukhen tut te kere sa o predlogija tari akaja statija. Ama ma bistre kaj o Jehova na sporedinela adava so kerea tu adala so kerena o javera. Ov dikhela so isi tut andre ko vilo. Ov tano zadovolno keda dikhela kobor sian blagodarno bašo leskoro skapoceno poklon, i otkupnina (1. Sam. 16:7; Mar. 12:41-44).
18. Soske siem blagodarna e Jehovaske hem e Isuseske?
18 Samo adaleske so sine dendi i otkupnina, šaj te oven amenge prostime amare grevija, te ova amala e Jehovaja hem te ovel amen nadež bašo večno životo. Sekogaš te sikava blagodarnost bašo mangipe e Jehovaskoro, kova so pottikningja le te del amen akala blagoslovija (1. Jov. 4:19). Isto agjaar, te sikava blagodarnost e Isuseske, kova so doborom but manglja amen so dengja plo životo amenge! (Jovan 15:13).
GILI 154 Mangipe so na čhinavgjola
a O Jehova prostinela sine ple slugenge ko purano vreme panda angleder o Hristos te platinel i otkupnina. O Jehova šaj sine te kerel adava adaleske so sine sigurno kaj leskoro Čhavo ka ačhol leske verno dži ko meribe. Znači, e Devleske ko jakhja, i otkupnina sar te phene više sine platimi (Rim. 3:25).
