STATIJA PROUČIBASKE 4
GILI 18 Blagodarna siem baši otkupnina
So sikljovaja tari otkupnina?
E Devleskoro mangipe baši amende sikavgja pe agjaar so: o Devel bičhalgja ple edinstveno bijame Čhave (1. JOV. 4:9)
SO KA SIKLJOVA
Ka dikha sar i otkupnina sikavela amenge o but šuže osobine e Jehovaskere hem e Isus Hristoseskere.
1. Sar koristinela amenge adava so sekova berš siem prisutna ki Spomen-svečenost bašo e Hristoseskoro meribe?
SIGURNO ka složine tut kaj i otkupnina tani jekh but skapoceno poklon (2. Kor. 9:15). Adaleske so o Isus mulo amenge, tu šaj te ove paše amal e Jehovaja, e Devlea. A šaj hem te ovel tut nadež bašo večno životo. Isi amen but pričine te ova blagodarna e Jehovaske, kova so spremingja i otkupnina adaleske so but mangela amen! (Rim. 5:8). Te šaj te pomožinel amenge te ačhova blagodarna hem nikogaš te na mislina kaj amen zaslužingjem i otkupnina, o Isus dengja zapoved jekh puti ko berš te setina amen ko leskoro meribe (Luka 22:19, 20).
2. Bašo so ka kera lafi ki akaja statija?
2 Akava berš i Spomen-svečenost ka ikerel pe sabota 12 april 2025 berš. Sigurno sarine amen planirinaja te prisustvujna ki late. But ka koristinel amenge ako ko kurke angleder i Spomen-svečenost hem palo adava odvojnaja amenge vreme hor te razmislina bašo adava so o Jehova hem leskoro Čhavo kergje amenge. Ki akaja statija ka dikha so sikljovaja bašo Jehova hem bašo leskoro Čhavo. A i javer statija ka pomožinel amenge te haljova sar šaj te koristinel amenge i otkupnina hem sar šaj te sikava blagodarnost baši late.
SO SIKLJOVAJA TARI OTKUPNINA BAŠO JEHOVA
3. Sar šaj o meribe jekhe manušeskoro te oslobodinel milionja manušen? (Dikh hem i slika.)
3 Tari otkupnina sikljovaja baši e Jehovaskiri pravda (5. Moj. 32:4). Adaleske so o Adam na sine poslušno, sarine amen nasledingjem grevo kova so ingarela ko meribe (Rim. 5:12). Te šaj te oslobodinel amen taro grevo hem taro meribe, o Jehova bičhalgja ple Čhave te šaj te del amen i otkupnina. Ama sar šaj i žrtva jekhe sovršeno manušeskiri te oslobodinel milionja manušen? O apostol Pavle objasningja: „Sar so preku jekhe manušeskiri neposlušnost [o Adam] but džene ule grešna, agjaar preku jekhe manušeskiri poslušnost [o Isus] but džene ka oven pravedna“ (Rim. 5:19; 1. Tim. 2:6). Javere lafencar, i neposlušnost jekhe sovršeno manušeskiri sine dovolno te šaj sarine amen te ova robija e grevoskere hem e meribaskere. Sprema adava, i poslušnost jekhe sovršeno manušeskiri tani dovolno te šaj te ova oslobodime.
Sebepi jekh manuš ulem robija e grevoskere hem e meribaskere. Adaleske, jekh manuš tano dovolno te šaj te oslobodinel amen (Dikh ko pasus 3)
4. Soske o Jehova na mukhlja e Adameskere poslušna čhavenge te živinen večno?
4 Dali o Isus čače mora sine te merel te šaj te ova spasime? Našti li sine o Jehova te mukhel e Adameskere poslušna čhaven te živinen večno? Sar nesovršena manuša, šaj dikhjola amenge kaj adava ka ovel sine milostivo hem razumno rešenie. Ama adava nane ko sklad e Jehovaskere sovršeno pravdaja. Adaleske so o Jehova tano pravedno, ov nikogaš na bi odlučinela sine te ignoririnel adava so o Adam sine neposlušno.
5. Soske šaj te ova sigurna kaj o Jehova sekogaš ka kerel adava soj ispravno?
5 Ama so ako o Jehova na bi dela sine otkupnina, nego ignoririnela sine i pravda, agjaar so ka dozvolinel sine e Adameskere nesovršena čhavenge hem čhaenge te živinen večno? Tegani o manuša verojatno ka pučen pe sine dali o Devel bi postapinela sine pravedno hem ko javera bukja. Na primer, šaj ka pučen pe sine dali ov ka ispolninel sa ple vetuvanja. Ama na valjani te sekirina amen bašo asavko nešto. Adava so o Jehova kergja adava soj pravedno, iako platingja bari cena bašo adava — žrtvujngja ple mangle Čhave — uverinela amen kaj ov sekogaš ka kerel adava soj ispravno.
6. Sar i otkupnina sikavela amenge e Jehovaskoro mangipe? (1. Jovaneskoro 4:9, 10).
6 I otkupnina pomožinela amenge te haljova kaj o Jehova tano pravedno, ama posebno pomožinela amenge te haljova kobor tano baro leskoro mangipe (Jovan 3:16; čitin 1. Jovaneskoro 4:9, 10). Tari otkupnina dikhaja kaj o Jehova mangela na samo te ovel amen večno životo, nego hem te ova delo tari leskiri familija. Razmislin bašo akava: Keda o Adam grešingja, o Jehova brkingja le tari pli familija kolate so isi verna sluge. Adaleske nikoj amendar na bijangjovela sar delo taro e Devleskiri familija. Ama adaleske so sine dendi i otkupnina, sa o manuša so isi len vera ko Devel hem tane leske poslušna, jekh dive ka oven delo tari leskiri familija. Panda avdive šaj te ova paše e Jehovaja hem amare phralencar hem phenjencar. O Jehova čače mangela amen! (Rim. 5:10, 11).
7. Sar adava so o Isus cidingja muke pomožinela amenge te haljova kobor but o Jehova mangela amen?
7 Ka haljova panda pošukar kobor but o Jehova mangela amen ako razmislinaja kobor skupo platingja i otkupnina. O Satana vakerela kaj nijekh sluga e Devleskoro nane te ačhovel leske verno keda ka ovel ko phare situacie. Te šaj te sikavel kaj o Satana hovavela, o Jehova dozvolingja o Isus te cidel muke angleder te merel (Jov 2:1-5; 1. Pet. 2:21). O Jehova dikhlja džikote o manuša asana sine e Isuseske, sine kamšikujmo taro vojnikija hem sine kovimo ko stubo. Hem tegani, anglo leskere jakhja, leskoro manglo Čhavo mulo ko bare muke (Mat. 27:28-31, 39). O Jehova šaj sine ko sekova momenti te čhinavel adava. Na primer, keda o manuša vakergje: „Ako o Devel mangela le, neka spasinel le akana“, o Jehova šaj sine te kerel baš adava (Mat. 27:42, 43). Ama ako o Devel mešinela pe sine, nane sine te ovel platimi i otkupnina hem nane te ovel amen sine nisavi nadež. Adaleske, o Jehova dozvolingja leskoro Čhavo te cidel muke sa džikote na mulo.
8. Dali o Jehova osetingja dukh džikote dikhela sine sar leskoro Čhavo cidela muke? Objasnin. (Dikh hem i slika.)
8 Na valjani te mislina kaj adaleske soj tano Semokjno, e Devle nane le čuvstvija. Amen siem kerde sprema leskoro liko, javere lafencar te oven amen čuvstvija. A adava sikavela kaj e Jehova da isi le čuvstvija. Ki Biblija pišinela kaj ov osetinela žal hem dukh (Ps. 78:40, 41). Razmislin isto agjaar bašo izveštaj bašo Avraam hem leskoro čhavo o Isak. O Jehova vakergja e Avraameske te del ple edinstveno čhave sar žrtva (1. Moj. 22:9-12; Evr. 11:17-19). Šaj samo te zamislina amenge so sa osetingja o Avraam džikote spreminela pe sine te mudarel ple čhave. A kobor potažno sine o Jehova džikote dikhela sine sar manuša so na služinena leske mučingje leskere Čhave hem mudargje le! (Ki jw.org dikh o videoklipi Ugledajte se na nivnata vera — Avraam [del 2].)
O Jehova osetingja bari dukh džikote dikhlja sar leskoro Čhavo cidela muke (Dikh ko pasus 8)
9. So sikljovaja bašo e Jehovaskoro mangipe taro Rimjanja 8:32, 38, 39?
9 Tari otkupnina sikljovaja kaj nikoj na mangela amen doborom but sar o Jehova — čak ni adava soj amenge najpaše ki familija, a ni palem o najšukar amal. (Čitin Rimjanja 8:32, 38, 39.) A ni hari na sumninaja amen kaj o Jehova mangela amen poviše taro amen so mangaja amen korkori. Dali mangea te živine večno? O Jehova mangela adava panda poviše. Dali mangea te oven prostime tle grevija? O Jehova mangela adava panda poviše. Sa so rodela amendar tano te sikava blagodarnost baši otkupnina, te sikava vera ki leste hem te ova leske poslušna. I otkupnina tano jekh but vredno poklon kova soj dokaz bašo e Jehovaskoro mangipe sprema amende. A ko nevo sveto ka doznajna panda poviše bašo e Jehovaskoro mangipe (Prop. 3:11).
SO SIKLJOVAJA TARI OTKUPNINA BAŠO ISUS
10. a) So kerela sine posebno pharo e Isuseske bašo leskoro meribe? b) Sar o Isus braningja e Jehovaskoro anav? (Dikh hem i ramka „ I vernost e Isuseskiri braningja e Jehovaskoro anav“.)
10 E Isuseske sine but važno o anav leskere Dadeskoro (Jovan 14:31). E Isuseske sine but pharo so sine krivimo kaj kerela lafi protiv o Devel hem buntujnela pe, a adava šaj sine te kaljarel leskere Dadeskoro anav. Adaleske molingja pe: „Mo Dad, ako šaj, neka nakhel akaja čaša bizo te pijav latar“ (Mat. 26:39). Adalea so ačhilo e Jehovaske verno dži ko plo meribe, o Isus braningja ple Dadeskoro anav.
11. Sar o Isus sikavgja plo baro mangipe sprema o manuša? (Jovan 13:1).
11 Isto agjaar, tari otkupnina sikljovaja kaj e Isuseske tane but važna o manuša, posebno leskere učenikija (Izr. 8:31; čitin Jovan 13:1). Na primer, ov džanlja kaj nesave bukja ka oven phare džikote kerela pli služba ki phuv, posebno leskoro meribe kova so sine but mučno. Sepak, ple zadače ki phuv na kerela len sine samo adaleske so valjani sine. Namesto adava, o Isus celo ple vilea propovedinela sine, sikavela sine hem služinela sine e javerenge. Čak i rat angleder te merel, odvojngja vreme te thovel ple apostolengere pre, te utešinel len hem te sikavel len bašo but bukja (Jovan 13:12-15). A džikote sine ko stubo mučibaske, khedingja sila te del nadež e kriminalcoske kova so merela sine uzi leste hem te grižinel pe ple dajake (Luka 23:42, 43; Jovan 19:26, 27). Ko asavko način, o Isus sikavgja plo baro mangipe na samo preku plo meribe nego hem ple celo životoja ki phuv.
12. Sar o Isus ponadari da kerela žrtve baši amenge?
12 Iako mulo „jekh puti zasekogaš“, o Hristos panda kerela žrtve amenge (Rim. 6:10). Sar? Ov ponadari da trošinela vreme hem but trudinela pe te šaj te del amen šuže bukja kola so šaj te dobina len panda akana adaleske so dengja i otkupnina. Razmislin so sa kerela. Služinela sar amaro Cari, Prvosvešteniko hem poglavari ko sobranie (1. Kor. 15:25; Ef. 5:23; Evr. 2:17). Ov tano odgovorno te šaj te kheden pe o pomazanikija hem o baro mnoštvo, zadača koja so ka ovel završimi angleder te završinel i bari nevolja a (Mat. 25:32; Mar. 13:27). Ov isto agjaar grižinela pe leskere verna slugen te ovel len dovolno duhovno hajbe džikote trajnena akala posledna dive (Mat. 24:45). A džikote trajnena o milja berša, ov ponadari da ka služinel ki amari korist. O Jehova dengja ple Čhave na samo te merel amenge, nego hem te kerel but javera bukja!
MA ČHINAV TE SIKLJOVE
13. Sar o hor razmislibe ka pomožinel tuke ponadari da te sikljove bašo e Devleskoro hem e Hristoseskoro mangipe so isi len sprema amende?
13 Šaj ponadari da te sikljove bašo e Jehovaskoro hem e Isuseskoro mangipe sprema amende ako na čhinavea hor te razmisline bašo sa adava so kergje. Ko kurke angleder i Spomen-svečenost hem pali late akava berš, šaj šukar te čitine jekh ili nekobor evangelija. Ma probin te čitine but materijali taro jekh puti. Namesto adava čitin popohari hem rode javera da pričine soske valjani te manga e Jehova hem e Isuse. Hem adava so sikljovea vaker le e javerenge.
14. Sar adava so ka istražine šaj te pomožinel tuke te doznajne neve bukja baši otkupnina hem bašo javera sikljojba? (Psalm 119:97; dikh hem i slika.)
14 Ako but berša sian ko čačipe, šaj pučea tut dali panda isi neve bukja kola so šaj te doznajne len bašo pendžarde teme, sar na primer baši e Devleskiri pravda, bašo e Devleskoro mangipe hem i otkupnina. Džangjola pe kaj sekogaš ka ovel nešto nevo so šaj te sikljova bašo akala hem javera teme. Tegani so šaj te kere? Ko amare publikacie isi but informacie kola so šaj te čitine len hem te proučine len. Keda ka čitine nešto ki Biblija so na haljovea le celosno, istražin. Palo adava, ko teko e diveskoro hor razmislin bašo adava so doznajngjan hem so sikljovea taro adava bašo Jehova, leskoro Čhavo hem lengoro mangipe sprema tute. (Čitin Psalm 119:97.)
Čak ako siem but berša ko čačipe, šaj panda pošukar te haljova hem te cenina i otkupnina (Dikh ko pasus 14)
15. Soske valjani ponadari da te roda vredna bukja tari Biblija?
15 Ma obeshrabrin tut ako na arakhea nešto nevo ili nešto interesno sekova puti keda ka čitine i Biblija ili ka istražine. Šaj te vakerel pe kaj tu sian sar nekoj so rodela zlato. Asavke manuša strplivo nakhena saatija ili dive te šaj te arakhen čak o najtikno zrno zlato. Sepak, ola tane uporna adaleske so sekova zrno vredinela lenge. Kobor poviše vredinela sekoja nevi buti so sikljovaja la tari Biblija! (Ps. 119:127; Izr. 8:10). Adaleske, ov strplivo hem redovno čitin i Biblija (Ps. 1:2).
16. Sar šaj te dža palo e Jehovaskoro hem e Isuseskoro primer?
16 Džikote proučinea, razmislin sar šaj te primenine adava so sikljovea. Na primer, neka ovel tuke primer e Jehovaskiri pravda agjaar so ka postapine e javerencar nepristrasno. Neka ovel tuke primer e Isuseskoro mangipe so isi le sprema plo Dad hem sprema o manuša agjaar so spremno ka kere adava so rodela o Jehova hem ka pomožine javere phralenge hem phenjenge čak keda adava nane te ovel lokho. Hem dža palo e Isuseskoro primer agjaar so ka svedočine javerenge te šaj len da te ovel len prilika te prifatinen e Jehovaskoro skapoceno poklon.
17. So ka dikha ki javer statija?
17 Kobor poviše haljovaja hem ceninaja i otkupnina doborom poviše ka manga e Jehova hem leskere Čhave. Ako keraja adava, ola panda poviše ka mangen amen (Jovan 14:21; Jak. 4:8). Adaleske, te koristina adava so o Jehova dengja amen te šaj ponadari da te sikljova baši otkupnina. Ki javer statija ka dikha sar koristinela amenge i otkupnina hem sar šaj te sikava blagodarnost bašo e Jehovaskoro mangipe.
GILI 107 Te sikava mangipe sar o Devel
a Keda ka ovel khedimo „adava soj ko nebo“ kova so spomningja le o Pavle, a pišimo tano ko Efešanja 1:10, tano različno taro adava so vakergja o Isus bašo khedibe okolen soj birime, a tano pišimo ko Matej 24:31 hem Marko 13:27. O Pavle kergja lafi bašo vreme keda o Jehova birinela ple duhovna čhaven agjaar so pomazinela len ple silaja. O Isus kerela lafi bašo vreme keda ka oven khedime ko nebo o pomazanikija so panda ka oven ki phuv džikote trajnela i bari nevolja.
