1. Sar dikhea ko čačipe?

 E JEHOVASKORO narodo mangela o čačipe kova so arakhljovela ko e Devleskoro Lafi. Amari vera temelinela pe ko adava čačipe (Rim. 10:17). Amen siem uverime kaj o Jehova čhivgja o hristijansko sobranie sar „stubo hem poddrška e čačipaske“ (1. Tim. 3:15). Amen celo vilea siem poslušna adalenge so vodinena amen soske ola objasninena o čačipe tari Biblija hem dena amen upatstvija kola soj sprema e Devleskiri volja (Evr. 13:17).

2. Sprema Jakov 5:19, so šaj te slučinel pe amenge iako prifatingjem o čačipe?

² Ama, iako prifatingjem o čačipe hem prifatingjem te sledina o vodstvo tari e Devleskiri organizacija, sepak šaj te slučinel pe hari po hari te cida amen taro čačipe. (Čitin Jakov 5:19.) O Satana but bi mangela te našava amari doverba ki Biblija hem ko vodstvo so dobinaja le tari e Devleskiri organizacija (Ef. 4:14).

3. Soske valjani cvrsto te ikera amen ko čačipe? (Efešanja 6:13, 14).

³ Čitin Efešanja 6:13, 14. Panda hari o Beng ka koristinel silno propaganda te šaj te čhivel sa e narodon te oven protiv o Jehova (Otk. 16:13, 14). Isto agjaar, šaj te očekujna kaj o Satana ka probinel panda poviše te hovavel e Jehovaskere narodo (Otk. 12:9). Adaleske, važno tano te sikljova te kera razlika maškar o čačipe hem o hovajba, hem te ova poslušna e čačipaske (Rim. 6:17; 1. Pet. 1:22). Taro adava ka zavisinel dali ka preživina i bari nevolja!

4. So ka dikha ki akaja statija?

⁴ Ki akaja statija ka dikha duj osobine so valjani te oven amen te šaj te pendžara o čačipe so avela tari Biblija hem te prifatina o vodstvo so avela tari e Devleskiri organizacija.  Palo adava, ka dikha trin bukja kola so mora te kera len te šaj ponadari da cvrsto te ikera amen ko čačipe.

OSOBINE SO VALJANENA AMENGE TE ŠAJ TE PENDŽARA O ČAČIPE

5. Sar i dar taro Jehova pomožinela amen te pendžara o čačipe?

⁵ Dar taro Jehova. Ako isi amen ispravno dar taro Jehova, doborom but ka manga le so nikogaš nane te kera nešto so ka dukhavel le. Ka ovel amen but bari želba te sikljova soj ispravno, a soj pogrešno, soj čačipe, a soj hovajbe te šaj te ovel amen e Jehovaskoro odobruvanje (Izr. 2:3-6; Evr. 5:14). Nikogaš na smejnaja te mukha amari dar taro manuš te ovel pobari taro amaro mangipe sprema o Jehova, soske adava so svidžinela pe e manušenge but puti na svidžinela pe e Jehovaske.

6. Sar i dar taro manuš kergja o 10 izraelska poglavarija te prevrtinen o čačipe?

⁶ Ako poviše daraja taro manuš nego taro Devel, adava šaj te kerel te počmina te cida amen taro čačipe. Razmislin bašo primer e 12 poglavarengoro kola so sine bičhalde te dikhen i phuv koja so o Jehova vetingja la e Izraelconge. 10 taro adala špionja so gele te dikhen i phuv, sikavgje kaj lengiri dar taro Hanaancija sine pobari taro lengoro mangipe sprema o Jehova. Ola vakergje e Izraelconge: „Našti te dža protiv adava narodo, soske ov tano posilno amendar“ (4. Moj. 13:27-31). Dikhindor manušikane, o Hanaancija čače sine posilna taro Izraelcija. Ama, sekoj so vakergja kaj o Izraelcija našti te pobedinen ple dušmanen cidingja e Jehova ki strana. Adala 10 špionja valjani sine te koncentririnen pe ko adava so o Jehova mangela o Izraelcija te keren. Isto agjaar, ola valjani sine te razmislinen so kergja lenge o Jehova kratko angleder adava. Agjaar ka haljoven sine kaj i sila e Hanaancongiri sine ništo ki sporedba e Jehovaskere  silaja koja so nane la krajo. Različno taro adala 10 špionja so na sine len vera, o Isus Navin hem o Halev mangle te ovel len e Jehovaskoro odobruvanje. Ola vakergje e narodoske: „Ako o Jehova tano zadovolno amendar, ov ka ingarel amen ki adaja phuv hem ka del la amenge“ (4. Moj. 14:6-9).

7. Sar šaj te bajrara amari dar sprema o Jehova? (Dikh hem i slika.)

⁷ Te šaj te bajrara amari dar sprema o Jehova, valjani te razmislina so svidžinela pe leske sekogaš keda valjani te ana nesavi odluka (Ps. 16:8). Džikote čitinea nesavo izveštaj tari Biblija puč tut: „Te ovav sine me ki adaja situacija savi odluka ka anav sine?“ Na primer, zamislin tuke kaj šunea sar o 10 izraelska poglavarija vakerena kaj o Izraelcija ka našti te pobedinen e Hanaancon. Dali ka verujne len sine hem ka mukhe sine te pobedinel tut i dar taro manuš? Ili, ka mukhe sine te pobedinel tlo mangipe sprema o Jehova hem tli želba te radujne le? Jekh celo generacija taro Izraelcija na pendžargje o čačipe kova so vakergje le o Isus Navin hem o Halev. Adaleske, o Jehova na mukhlja te khuven ki Vetimi Phuv (4. Moj. 14:10, 22, 23).

8. Koja osobina mora but te trudina amen te razvina la, hem soske?

⁸ Poniznost. O Jehova otkrinela o čačipe okolenge soj ponizna (Mat. 11:25). Amen ponizno prifatingjem pomoš te šaj te doznajna o čačipe (Apo. 8:30, 31). Sepak, mora te pazina te na ova gorda. Ako siem gorda, šaj te počmina te mislina amenge kaj amaro mislenje tano isto doborom mudro sar o bibliska načelija hem o vodstvo so dobinaja le tari e Jehovaskiri organizacija.

9. Sar šaj te ačhova ponizna?

⁹ Te šaj te ačhova ponizna, na valjani te bistra kobor siem tikne ki sporedba e Jehovaja (Ps. 8:3, 4). Isto agjaar, valjani te molina e Jehova te pomožinel amen te ova panda poponizna hem te ova spremna te sikljova. Tegani, o Jehova ka pomožinel amen leskere misle, kola so doznajnaja len taro leskoro Lafi hem leskiri organizacija, te oven amenge považna taro amare. Džikote čitinea i Biblija, rode dokazija kaj o Jehova mangela i poniznost, a mrzinela i gordost, i arogantnost hem i voobrazenost. A posebno trudin tut te ačhove ponizno ako dobinea nesavi zadača koja so dela tut nesavo avtoriteti ili kerela tut te ove pendžardo anglo javera.

SAR ŠAJ TE IKERA AMEN CVRSTO KO ČAČIPE

10. Kas koristingja o Jehova te šaj te del vodstvo hem upatstvija ple narodoske?

¹⁰ Ponadari da neka ovel tut doverba ki e Jehovaskiri organizacija. Ko purano Izrael, o Jehova dela sine upatstvija ple narodoske preku o Mojsej, a palo adava preku o Isus Navin (Is. Nav. 1:16, 17). O Izraelcija sine blagoslovime keda ko akala vodačija dikhena sine sar manuša kola so pretstavinena e Jehova. Vekoncar pokasno, keda kergja pe o hristijansko sobranie, upatstvija dena sine o 12 apostolija (Apo. 8:14, 15). Pokasno ki adaja grupa sine vklučime javera da starešine taro Erusalim. Adaleske so sledinena sine o vodstvo taro akala verna murša, „o sobranija ponadari da ovena sine zorale ki vera hem bajrona sine taro dive ko dive“ (Apo. 16:4, 5). Ko amaro da vreme, o Jehova blagoslovinela amen keda sledinaja o upatstvija tari leskiri organizacija. Ama, sar ka osetinel pe o Jehova ako na mangaja te šuna o upatstvija taro okola so ov čhivgja len te predvodinen? Te šaj te odgovorina ko akava  pučibe, te dikha so slučingja pe džikote o Izraelcija džana sine ki Vetimi phuv.

11. So slučingja pe okole Izraelconcar so buningje pe protiv e Jehovaskiri odluka o Mojsej te ovel lengoro vodači? (Dikh hem i slika.)

¹¹ Džikote o Izraelcija patujnena sine dži ki Vetimi phuv, nesave murša so sine len nesavo avtoriteti buningje pe protiv o Mojsej hem leskiri uloga koja so dengja le o Jehova. Ola vakergje: „Celo narodo tano sveto [a na samo o Mojsej], sarine, hem o Jehova tano maškar lende“ (4. Moj. 16:1-3). Iako sine točno kaj anglo e Devleskere jakhja „celo narodo“ sine sveto, o Jehova biringja e Mojsee te vodinel leskere narodo (4. Moj. 16:28). Adalea so kritikujngje e Mojsee, adala buntovnikija ustvari kritikujngje e Jehova. Ola na koncentriringje pe ko adava so o Jehova manglja, nego ko adava so ola mangle — te ovel len pobari mokj hem te oven istaknime anglo javera. O Devel mudargja adalen so počmingje te buninen pe hem bute javeren so gele lengiri strana (4. Moj. 16:30-35, 41, 49). Avdive da šaj te ova sigurna kaj o Jehova na odobrinela okolen so na šunena o upatstvija tari leskiri organizacija.

12. Soske šaj ponadari da te ovel amen doverba ki e Jehovaskiri organizacija?

¹² Šaj ponadari da te ovel amen doverba ki e Jehovaskiri organizacija. Keda ovela jasno kaj valjani te ovel nesavi promena ko amaro haljojbe bašo nesavo biblisko čačipe ili bašo adava sar te kera amari služba bašo Jehova, o phralja taro Vodečko telo na mislinena pe dali te keren o potrebna promene (Izr. 4:18). Ola kerena adava adaleske so lenge najvažno taro sa tano te keren i volja e Jehovaskiri. Ola dena pestar sa te šaj lengere odluke te oven temelime ko e Devleskoro Lafi, koleste so arakhljona o bibliska sikljojba kolende so mora te ikeren pe sa e Jehovaskere sluge.

13. Soj tane „o saste lafija“, hem so mora te kera?

 ¹³ „Sar primer neka oven tuke o saste lafija“ (2. Tim. 1:13). „O saste lafija“ tane o hristijanska sikljojba kola so arakhljona ki Biblija (Jovan 17:17). Adala sikljojba temelinena pe ko sa adava ko so verujnaja. E Jehovaskiri organizacija sikavela amen te ikera amen cvrsto ko akala čačipa. Sa džikote ikeraja amen ki lende ka ova blagoslovime.

14. Sar nesave hristijanja čhinavgje te ikeren pe ko „saste lafija“?

¹⁴ So šaj te slučinel pe ako čhinavaja te ikera amen ko „saste lafija“? Razmislin bašo akava primer. Ko prvo veko, nesave hristijanja širinena sine informacie kaj o dive e Jehovaskoro više reslja. Šaj sine nesavo pismo — koleske so o manuša mislingje kaj tano taro Pavle — kote so sine pišimo adava. Bizo te odvojnen peske vreme te proverinen o faktija, nesave hristijanja taro Solun verujngje ko akala informacie, pa čak širingje len e javerenge. Ola nane sine te oven hovavde ako sine len ki godi o bukja so sikavgja len o Pavle keda sine lencar (2. Sol. 2:1-5). O Pavle sovetingja e phralen te na verujnen ko sa so šunena. Hem, te šaj te pomožinel len ki idnina, o Pavle završingja plo dujto pismo dži ko Solunjanja akale lafencar: „Me, o Pavle, pišinava tumenge akava pozdrav mle vastea. Adava tano mlo znako ko sekova pismo — agjaar pišinava me“ (2. Sol. 3:17).

15. Sar šaj te zaštitina amen taro hovajba kola so izgledinena sar čače? Vaker primer. (Dikh hem o slike.)

¹⁵ So sikljovaja taro lafija so pišingja len o Pavle e phralenge taro Solun? Keda ka šuna nešto so nane ko sklad adalea so siklilem tari Biblija ili keda ka šuna nesave šokantna informacie kola so nane točna, valjani te ova pronikliva. Ko purano Sovetsko Sojuz, amare dušmanja ki jekh prilika dengje jekh pismo amare phralenge kova so izgledinela sine sar te phene tano taro glavno sedište. Adava pismo pottikningja nesave phralen te keren jekh posebno nezavisno organizacija. Adava so pišinela  sine ko pismo izgledinela sine sar te phene tano čače. Ama, o verna phralja na dozvolingje te oven hovavde. Ola halile kaj adava so pišinela ko pismo na sine sprema adava so sine sikavde. Avdive, o dušmanja e čačipaskere ponekogaš koristinena i sovremeno tehnologija te šaj te buninen amen hem te keren podelbe maškar amende. Namesto te dozvolina asavke bukja lokheste te buninen amen hem te keren te na razmislina ispravno, šaj te zaštitina amen agjaar so šukar ka razmislina dali adava so šunaja ili čitinaja tano ko sklad e čačipencar so siklilem len (2. Sol. 2:2; 1. Jov 4:1).

16. Sprema Rimjanja 16:17, 18, so valjani te kera ako nekoj širinela informacie kola so nane ko sklad e čačipaja?

¹⁶ Te ačhova ko jekhipe okolencar soj verna e Jehovaske. O Devel mangela te obožavina le ko jekhipe amare phralencar hem phenjencar. Ka ačhova ko jekhipe sa džikote ikeraja amen ko čačipe. Sa adala so širinena informacie so nane ko sklad e čačipaja, kerena podelbe ko sobranie. Adaleske, o Devel predupredinela amen te cida amen asavkendar. Ako na keraja adava šaj te cida amen taro čačipe. (Čitin Rimjanja 16:17, 18.)

17. Sar koristinela amenge adava so pendžaraja o čačipe hem cvrsto ikeraja amen ki leste?

¹⁷ Ako pendžaraja o čačipe hem cvrsto ikeraja amen ki leste, ka ačhova paše e Jehovaja hem amari vera ka ovel zorali (Ef. 4:15, 16). Nane te ova iznenadime tari propaganda hem taro hovavne sikljojba e Satanaskere, hem ka ova bezbedna džikote trajnela i bari nevolja, soske o Jehova ka grižinel pe amenge. Ponadari da iker tut cvrsto ko čačipe hem tegani „o Devel so dela mir ka ovel [tuja]“ (Fil. 4:8, 9).