Pol: Siem sine but srekjna! Noemvri, 1985 berš, cidingjem te dža ki amari prvo misionersko zadača, ki Liberija (Zapadno Afrika). Ko džajbe ačhilem ko Senegal. I En vakergja: „Otprilika jekhe saateske ka ova ki Liberija“. Ama, palo adava reslja jekh izvestuvanje: „O patnikija baši Liberija, mora te hulen taro avioni. Isi maribe baši vlast“. Adaleske, deš dive ačhilem ko misionerija ko Senegal. Sekova dive ko vesti šunaja sine kaj ki Liberija sine mudarde but manuša, kaj isi policiski čas hem kaj o vojnikija mudarena sekas so na poštujnela o policiski čas.

En: Obično, amen siem but pretpazliva. Ustvari, panda sar tikni vikinena man sine i darutni Eni. Dar uklela man čak keda valjani te nakhav i ulica! Ama, siem sine odlučna te dža ki amari zadača.

Pol: Me hem i Eni siem bijame ko zapadno delo tari Anglija hem adava samo ofto kilometrija dur jekh jekhestar. O solduj džene počmingjem e pionersko službaja odma otkeda završingjem e sredno školaja. Man ko adava pottikningje man mle roditelija, a e Eni lakiri daj. Ola but radujngje pe so odlučingjem te ova ki polnovremeno služba hem but poddržinena amen sine. Keda sine man 19 berš, sine man čest te počminav te služinav ko Betel, a i En počmingja te služinel ko Betel otkeda ženingjem amen ko 1982 berš.

En: But mangaja sine o Betel, ama sine amen želba te služina adari kote so sine pobari potreba. Džikote sorabotinaja sine hem družinaja amen sine phralencar hem phenjencar ko Betel kola so angleder sine misionerija, adava panda poviše bajrargja amari želba. Trin berš sekoja rat molinaja amen sine bašo adava. Hem but siem sine radosna so ko 1985 berš, dobingjem pokana te ova ko 79 klasi ko Gilead! Siem sine bičhalde te služina ki Liberija (Zapadno Afrika).

Pol: Keda šaj sine palem te letinel pe ki Liberija, uklilem odma ko prvo avioni so džala sine adari. Adari i situacija panda na sine šukar hem panda sine policiski čas. Setinava man jekh dive ko pazari jekh vrda mukhlja hari poglasno zvuko hem tari dar o manuša počmingje te vikinen hem te našen. Te šaj te ačhova smirime sekoja rat čitinaja  sine nešto taro Psalmija. Ama but mangaja sine amari zadača. I En sine misionerka ko podračje, a me sium sine ko Betel hem kerava sine buti e phralea Džon Čaruk. Le sine le baro iskustvo hem but šukar haljola sine e phralen hem e phenjen. Šaj sine but te sikljovav lestar.

En: Soske doborom sigate zamanglem i Liberija? Sebepi amare phralja hem phenja. Ola sikavena sine amenge baro mangipe, sine iskrena hem verna. Ulem paše lencar, ulem lencar familija. Lengere sovetija kergje te ova pozorale ko duhovno pogled. I služba sine merakoske. O manuša na mangena sine te dža amenge sigate. Ki sekoja strana o manuša kerena sine lafi bašo bibliska teme. Ednostavno šaj sine te ačhove hem te vklučine tut ko razgovor. Adaleske so sine amen but bibliska kursija sine predizvik te resa ko sa. Ama adava sine jekh taro šuže problemija!

Pol: Palo štar berš otkeda dži negde sine mir, ko 1989 berš sa meningja pe — počmingja gragjansko vojna. Ko 2 juli, 1990 berš o buntovnička grupe zarobingje i okolina uzo Betel. Trin masek našti sine nikasaja te kontaktirina so sine avrijal tari država, maškar kolende so sine amari familija hem o glavno sedište. Sine baro nasilstvo, sine haos segde, sine but hari hajbaske hem but džuvlja sine silujme. Adaja situacija trajngja 14 berš hem vlijajngja upri celi phuv.

En: Manuša taro nesave plemija marena pe sine hem mudarena pe sine manušencar taro javera plemija. Segde ko ulice sine buntovnikija kolen so sine len but oružje. Sine čudno uravde hem khuvena sine ko khera hem lena sine so mangena. Nesave vakerena sine kaj te mudaren manušen tano lenge sar „te čhinen khajna“. Ko kontrolna punktija sine but mudarde manuša, a nekobor asavke punktija sine paše uzo Betel. Sine mudarde hem nesave phralja hem phenja, maškar kolende so sine amare duj mangle misionerija.

O phralja hem o phenja rizikujnena sine pumaro životo te šaj te garaven javeren, kola so sine taro plemija kolen so progoninena sine hem mudarena sine. Adava isto kerena sine o misionerija hem o betelitija. Ko teluno sprati taro Betel, sovena sine nesave phralja hem phenja so našle, a nesave sovena sine ko amare sobe ko upruno sprati. Ki amari soba sovela sine amencar jekh familija hem ola sine efta džene.

Pol: O buntovnikija sekova dive probinena sine te khuven ko Betel te šaj te dikhen dali garavaja nekas. Izmislingjem jekh način sar te predupredina amen. Duj džene tergjovena sine ko džami hem dikhena sine, a javera duj džene džana sine ki porta hem kerena sine lafi e vojnikoncar. Ako adala duj džene so sine ki porta ikerena pumare vasta  anglal, adava značinela sine kaj nane nisavo problemi. Ama, ako čhivena sine ple vasta palal adava značinela sine kaj o vojnikija tane agresivna hem tegani adala so sine ko džami džana sine sigate te garaven e phralen hem e phenjen.

En: Palo but kurke, jekh grupa holjame buntovnikija khuvgje silaja andre ko Betel. Me hem jekh phen phanlem amen ko kupatilo, sine amen jekh škafi hem teli leste sine jekh tikno than garajbaske. I phen uspejngja te khuvel andre hem garavgja pe. O vojnikija ale upre puškencar ko vas. Počmingje sa ple silaja te khuven ko udar. O Pol molinela len sine: „Molinava tumen adžikeren mi romni tani ko vece“. Džanava kaj kerava sine galama džikote phandava sine o kapako taro garavdo than hem džikote iranava sine o bukja ko škafi, hem but darandiljum celo tresinava sine. So ka ovel keda ka phravav o udar? Molingjum man ki mande hem dušaja rodingjum taro Jehova te pomožinel man. Tegani phravgjum o udar hem uspejngjum nesar smireno te pozdravinav e vojnikon. Jekh lendar guringja man, odma gelo ko škafi hem počmingja te rodel ko raftija. Našti te verujnel sine kaj ništo na arakhlja. Palo adava, ov hem sa o vojnikija rodingje ko sa o sobe hem ko tavani. Ama palem na arakhle ništo.

Pol: Masekoncar na sine amen skoro ništo so te ha. Ikerela amen sine o duhovno hajba. O edinstveno „sabaluko“ sine i sabalutni biblisko programa, hem osetingjem kobor sila dela amen.

Džanlem kaj ako ikljovaja taro Betel te roda hajbe hem pani ka našti sine te zaštitina adalen so garavaja len sine. Hem verojatno ka oven sine mudarde. But puti o Jehova dengja amen adava so valjangja amenge ko pravo vreme, hem adava kerela sine ko način so sine amenge sar čudo. O Jehova grižinela pe sine amenge hem pomožinela amen sine te kontrolirina amari dar.

Kobor i situacija ko sveto ovela sine pološno, doborom poviše o čačipe dela amen sine nadež. But taro amare phralja hem phenja mora sine te našen te šaj te spasinen pumaro životo, ama uspejngje te ačhoven smirime hem te ovel len zorali vera. Nesave čak vakerena sine kaj i vojna „spreminela len baši bari nevolja“. Sine hrabra starešine hem terne phralja kola so kerena sine sa te šaj te pomožinen e phralenge. Keda valjani sine te našen ko javer than o phralja hem o phenja poddržinena pe sine, počminena sine te propovedinen ko neve podračja. Ola koristinena sine sa so ka arakhen ki šuma te šaj te keren ednostavna dvorane hem te ikeren o sostanokija. Ko adala phare vremija o sostanokija hem o propovedibe but ohrabrinena sine e phralen hem dena len sine nadež. Keda anaja sine hajbaske, šeja hem javera bukja, but taro amare phralja rodena sine tašne službake namesto šeja. Adava but pogodingja amen. But manuša so dikhle hem so doživingje lošna bukja ki vojna mangena sine te šunen bašo šukar haberi. Našti sine te verujnen kobor radosna hem pozitivna sine o Svedokija. Lengiri svetlina silno svetinela sine  ki temnica! (Mat. 5:14-16). Keda dikhle kobor revna tane amare phralja hem phenja, čak nesave taro adala lošna buntovnikija ule amare phralja.

Pol: Džikote trajnela sine i vojna, nekobor puti valjani sine te ikljova tari phuv, trin puti kratko vreme hem duj puti po celo berš. Jekh misionerka but šukar objasningja sar osetinaja amen sine. Oj vakergja: „Ko Gilead sikavgje amen te kera amari zadača celo amare vilea, hem adava kergjem da“. Hem akana keda valjani te mukha amare phralen ko asavke okolnostija adava kergja amen but tažna. Ama šukar tano so šaj sine te poddržina o aktivnostija ki Liberija taro phuvja so sine paše uzi late.

En: Ko maj 1996 berš, štar džene amendar cidingjem te dža e betelsko vrdaja kova so sine pherdo važna dokumentencar. Valjani sine te patujna 16 kilometrija ko jekh pobezbedno than, ki javer strana tari diz. Ama baš tegani adava than sine napadimo. O holjame buntovnikija počmingje te pukajnen ko vozduh. Ačhavkergje amen hem amen e trinen ikalgje amen avri, lele amaro vrda hem prodolžingje te vozinen, a o Pol sine panda andre. Ačhilem ki ulica šokirime. Tegani taro jekh puti dikhlem sar o Pol tari gužva avela ki amende, leskoro čekat sine ratvalo. Ki celi adaja buna mislingjem kaj tano ranimo, ama halilem kaj ako tano ranimo ka našti te phirel. Jekh taro buntovnikija khuvgja le keda ikalgja le taro vrda. Srekjake sine samo hari povredimo.

Paše sine jekh voeno kamioni kova so sine pherdo manušencar so darana sine. Adaleske so andre na sine than tlo pro kaj te čhive, valjani sine te ikera amen tari avruni strana ki prikolka. O šoferi doborom sigate vozinela sine so edvaj ikeraja amen sine. Molinaja le sine te ačhovel ama darala sine. Nesar izdržingjem, ama keda ačhilo o kamioni celo tresinaja sine, hem tari dar hem taro umor.

Pol: Tegani dikhlem amen hem sa siem sine melale, amare šeja sine pharavde hem našti sine te verujna kaj panda siem dživde. Sukjem avrijal ki jekh niva uzo jekh helikopteri, kova so sa sine khuvdo hem pogodimo taro kuršumija hem kolea so o tajsutno dive gelem ki Siera Leone. Siem sine blagodarna so ačhilem dživde, ama isto agjaar siem sine but sekirime bašo amare phralja ki Liberija.

En: Keda reslem ko Betel ko Fritaun (Siera Leone), siem sine bezbedna hem o phralja but šukar grižingje pe amenge. Ama, počmingje te iranen pe mange sa o lošna bukja so slučingje pe ki Liberija. Diveskoro sa darava sine kaj ka slučinel pe nešto lošno hem našti sine šukar te razmislinav. A rakjate but puti uštava sine hem sium sine žrka pani, celo tresinava sine hem sa mislinava sine kaj nešto lošno ka ovel amenge, našti sine te dišinav. Tegani o Pol gušinela man sine hem molinela pe sine zaedno mancar. Giljavaja sine teokratska gilja sa džikote na čhinavava sine te tresinav. Mislinava sine kaj našavava mli godi hem kaj našti više te služinav sar misionerka.

Nikogaš nane te bistrav so slučingja pe tegani. Ko isto adava kurko dobingjem duj spisanija. Jekh lendar sine Džangavgjoven! 8 septemvri 1996 berš. Ki leste sine jekh statija e naslovea: „Soočuvanje so napadite na panika“. Tegani haliljum so značinena mle simptomija. A o dujto sine Stražarsko kula taro 15 maj 1996 berš, kote so sine i statija „Otkade ja dobivaat svojata sila?“ Ki kula sine jekh slika tari jekh povredimi peperutka. Ki statija sine objasnimo kaj isto sar so jekh peperutka šaj ponadari da te hraninel pe hem te letinel iako isi la povredime paka, amen da e Jehovaskere silaja šaj ponadari da te pomožina e javerenge iako amen da korkori siem emocionalno dukhavde. O Jehova dengja amen sila preku i duhovno hrana ko pravo vreme (Mat. 24:45). But istražinava sine hem kergjum mange jekh papka kote so kerela pe sine lafi baši adaja tema. Adava but pomožingja man hem sar nakhela sine o vreme o simptomija so sine man adaleske so doživingjum traume hem stres pohari nakhena sine.

Pol: Keda hem te irana amen sine ki Liberija siem sine but radosna. Ko krajo taro 2004 berš, ki Liberija služinaja sine više okolu 20 berš. I vojna više završingja. Ko Betel kerena pe sine planija bašo jekh gradežno proekti. Ama bizo te očekujna pučle amen dali ka prifatina nevi zadača.

 Adava sine baro ispit amenge. Pharo sine amenge te mukha amare duhovno familija adaleske so siem sine but paše. Ama, keda mukhlem amare familija te šaj te dža ko Gilead, dikhlem kaj ako mukhaja amen e Jehovaske ko vasta ov blagoslovinela amen hem adaleske prifatingjem i nevi zadača. Adava značinela sine kaj valjani te dža ki Gana.

En: But rungjem keda gelem amenge tari Liberija. Iznenadingjem amen keda o Frenk, jekh mudro hem pophuro phral, vakergja amenge: „Mora te bistren amen!“ Ama tegani objasningja: „Džanaja kaj nikogaš nane te bistren amen, ama akana celo vilea mora te koncentririnen tumen ki tumari nevi zadača. Akaja zadača tumenge taro Jehova adaleske koncentririnen tumen ko phralja hem ko phenja adari“. Adava dengja amen sila te trudina amen te kera amenge neve amala ko than kote so skoro na džanaja sine nikas hem kote so sa sine amenge nevo.

Pol: Ama na valjangja amenge but vreme te šaj te zamanga amare neve duhovno familija ki Gana. Adathe isi but Svedokija! But siklilem tari bari vera so sine amare amalen. Ki Gana služingjem 13 berš, hem tegani alo jekh nevo iznenaduvanje. Siem sine zamolime te služina ko Betel ki Istočno Afrika, Kenija. Falinena amenge sine amare amala taro phuvja kote so angleder služinaja sine, ama odma osetingjem amen paše amare verna phralencar hem phenjencar ki Kenija. Hem panda služinaja akate ko jekh baro podračje kote so isi bari potreba.

En: Ko berša so nakhle but puti slučingja pe mange te tresinav tari dar. O opasna hem o stresna situacie ko životo, šaj te mukhen belegija hem ko fizičko hem ko emocionalno pogled. O Jehova na zaštitinela amen čudoja taro adava. Čak avdive da, keda šunava pukajbe, počminela te čhadel pe mange hem trnonena mle vasta. Ama sikliljum te ovel man doverba ko Jehova hem te koristinav sa adava so ov kerela te šaj te del amen sila, sar na primer preku amare phralja hem phenja. Hem haliljum kaj ako isi amen šukar hem redovno duhovno rutina, o Jehova šaj te pomožinel amenge te izdržina ki amari zadača.

Pol: Ponekogaš, nekoj ka pučel: „Mangena li tumari zadača?“ Oja, isi but šuže phuvja, ama i situacija ki lende šaj but lokhe te meninel pe hem te ovel opasno. Tegani soj tano adava so mangaja poviše nego i phuv kote so služinaja? Amare mangle phralen hem phenjen, amare familija. Šaj siem taro različno poteklo, ama sarine isto razmislinaja. Mislingjem kaj siem bičhalde amen te ohrabrina len, ama ustvari ola ohrabringje amen.

Sekova puti keda džaja javerthe te služina, dikhaja čačutno čudo, amaro phralipe. Sa džikote siem delo taro nesavo sobranie, amen isi amen familija, isi amen kher. Uverime siem kaj ako ponadari da isi amen doverba ko Jehova, ov ka del amen sila te izdržina bizi razlika so ka slučinel pe (Fil. 4:13).