DALI tuke pharo redovno te proučine i Biblija hem te uživine ko proučibe? Verojatno ponekogaš adava tano predizvik sarinenge. Ama razmislin bašo javera bukja so redovno keraja len, sar na primer o nangjojbe. Bašo adava valjani vreme hem trud, ama kobor osetinaja amen osvežime palo adava. O proučibe e Biblijakoro da šaj te ovel osvežuvačko „nangjojbe“ panjea ko e Devleskoro Lafi (Ef. 5:26). Ake so šaj te pomožinel tut:

• Ker tuke raspored. O proučibe i Biblija tano jekh taro považna bukja so mora te kera len (Fil. 1:10). Te šaj te ikere tut ko raspored so kergjan le, čhiv le ko than so šaj lokheste te dikhe le, sar na primer ko frižideri. Ili šaj te kere tuke alarma ko telefoni te šaj te setinel tut keda te proučine.

• Birin keda tano najšukar vreme te proučine. Dali šaj te ačhove koncentririmo poviše vreme, ili polokho tuke te proučine poviše puti ama pokratko? Tu najšukar džanea keda tuke najlokho te koncentririne tut. Adaleske ker tuke plani bašo proučibe agjaar so ka ovel tut akala bukja ki godi. Ako nane tut želba te proučine keda ka avel o vreme so biringjan le, soske na probinea te proučine samo 10 minutija? Čak ako doborom hari proučinea, adava šaj but te koristinel tuke. Štom počminea, adava šaj te motivirinel tut te proučine poviše (Fil. 2:13).

• Angleder birin tuke teme. Ako adžikerea te avel o vreme proučibaske hem tegani birinea so ka proučine, šaj o vreme so isi tut nane te koristine le najšukar (Ef. 5:16). Soske na kerea tuke spisako statiencar ili temencar kola so bi mangea te proučine? Keda ka pojavinel pe tuke nesavo pučibe, pišin le tuke. A ko krajo taro sekova proučibe šaj ka oven tut javera da idee bašo proučibe so šaj te čhive len ko tlo spisako.

• Ov fleksibilno. Keda kerea tlo raspored ov fleksibilno, na primer e vremea hem e temencar proučibaske. Nane najvažno keda, kobor vreme ili so proučinea, nego kobor redovno proučinea.

But koristinela amenge i navika redovno te proučina. Agjaar ovaja popaše e Jehovaja, sikljovaja te postapina mudro hem osetinaja amen ohrabrime (Is. Nav. 1:8).