Dali nekogaš tuke pharo te pamtine adava so čitingjan ko momenti? Ponekogaš akava slučinela pe sarinenge. So šaj te pomožinel tuke? Razmislin palem bašo glavna misle.

Džikote proučinea, ačhov nekobor puti hem dikh kola tane o glavna misle. O apostol Pavle pottikningja e phralen hem e phenjen te keren baš adava džikote proučinena leskoro pismo. Ov pišingja: „Akaja tani glavno misla“ (Evr. 8:1). Akale lafencar o Pavle pomožingja len te haljoven so manglja te vakerel lenge hem sar tane povrzime maškar peste o bukja so vakergja len.

Šaj te odvojne tuke vreme, na primer 10 minutija ko krajo taro tlo proučibe te šaj te razmisline bašo glavna misle. Ako našti te setine tut ko glavna misle, dikh o podnaslovija ili o prva rečenice taro sekova pasus te šaj te pomožinen tuke te setine tut. Ako sikliljan nešto nevo, trudin tut te objasnine le tle lafencar. Adava so palem ka irane tut ko glavna misle, ka pomožinel tuke polokhe te pamtine hem pošukar te haljove sar šaj te primenine len ko tlo životo.