Na valjani te mislina kaj o Isus na prifatingja adale 70 učenikon ili kaj ola mukhle le, samo adaleske so ola na sine prisutna keda ov vospostavingja e Gospodareskiri večera. Ednostavno, ki adaja prilika o Isus manglja te ovel ple apostolencar.

Sar ple učenikija, o Isus prifatingja hem adale 70 dženen hem e 12 apostolen. Iako e Isuse sine le but učenikija, ov najangle biringja 12 muršen kolen so vikingja len apostolija (Luka 6:12-16). Ov sine ki Galileja keda „vikingja e 12 apostolen... hem bičhalgja len te propovedinen e Devleskoro Carstvo hem te sasljaren e nasvalen“ (Luka 9:1-6). Palo adava, keda alo ki Judeja, o Isus „biringja javere 70 dženen hem bičhalgja len duj po duj“ (Luka 9:51; 10:1). Adaleske, e Isuse sine le učenikija ko različna thana kola so propovedinena sine o šukar haberi baši leste.

O Evreija kola so ule e Isuseskere učenikija, panda slavinena sine i Pasha jekh puti ko berš, najverojatno adava kerena le sine zaedno pumare familiencar (2. Moj. 12:6-11, 17-20). Kratko angleder te merel, o Isus gelo ko Erusalim zaedno ple apostolencar. Ama, ov na vikingja sa ple učenikon tari Judeja, tari Galileja hem tari Pereja te aven ko Erusalim hem zaedno te slavinen i Pasha. Jasno tano kaj o Isus ki adaja prilika manglja te ovel samo ple apostolencar. Ov vakergja lenge: „Edvaj adžikergjum te hav tumencar akaja pashalno večera angleder te ovav mučimo“ (Luka 22:15).

E Isuse sine le šukar pričina bašo adava. Panda hari, ov valjani sine te merel „sar e Devleskoro Bakhro kova so cidela o grevo taro sveto!“ (Jovan 1:29). Adava valjani sine te slučinel pe ko Erusalim kote so but vreme dena pe sine žrtve e Devleske. O bakhro so dela pe sine ki Pasha, setinkerela sine e Izraelcon kaj o Jehova ikalgja len taro Egipet. Ama ple žrtvaja, o Isus ka kerel sine nešto but poviše. Ov ka spasinel sine sa e manušen taro grevo hem taro meribe (1. Kor. 5:7, 8). Adaleske so sine dendi e Isuseskiri žrtva, o 12 apostolija ka oven sine delo taro temeli e hristijansko sobranieskoro (Ef. 2:20-22). Interesno tano so ki sveto diz Erusalim isi „dešuduj bara ko temeli“ upro kolende soj pišime o „dešuduj anava taro dešuduj apostolija e Bakhreskere“ (Otk. 21:10-14). Znači, e verna apostolen ka ovel len sine važno uloga džikote ispolninela pe e Devleskiri namera. Haljovaja soske o Isus manglja te ovel lencar ki posledno Pasha hem ki e Gospodareskiri večera koja so sine vospostavimi odma pali Pasha.

Ki adaja večera, o 70 učenikija hem o javera na sine zaedno e Isusea. Sepak, sa e verna učenikon sine len korist tari e Gospodareskiri večera koja so vospostavingja la o Isus. Sa o učenikija kola soj pomazime hristijanja ka oven vklučime ko sojuz bašo Carstvo, kova so o Isus spomningja le e apostolenge adaja rat (Luka 22:29, 30).