Soj šukar a soj lošno: Tu mora te birine
O moralna merilija sprema kola ka birina te živina but ka vlijajnen upro adava dali ka ova srekjna. O Jehova o Devel džanela adava. Adaleske ov mangela te živina sprema leskere merilija.
O Jehova mangela te ovel amen mirno hem srekjno životo.
„Me, o Jehova, sium tlo Devel, kova so sikavela tut bašo tlo šukaripe, okova so vodinela tut ko drumo koleste so valjani te dža. Te pazine sine ko mle zapovedija! Tlo mir ka ovel sine sar reka hem tli pravednost sar morska branija“ (Isaija 48:17, 18).
Adaleske so stvoringja amen, o Devel džanela najšukar sar te živina. Ov mangela te šuna le soske adava tano bašo amaro šukaripe. Ako ikeraja leskere zapovedija, na valjani te puča amen dali amare odluke ka oven šukar. Sekogaš ka ana šukar odluke kola so ka anen amenge mir hem srekja.
O Jehova na rodela amendar te kera nešto so našti te kera.
„Akaja zapoved so dava tut avdive nane but phari tuke hem nane but dur tutar“ (5. Mojseeva 30:11).
Te šaj te živina sprema e Devleskere moralna merilija šaj ka valjani te menina amaro razmislibe hem ponašibe. Ama, o Jehova na rodela but amendar. Sar amaro Stvoriteli, ov džanela amare sposobnostija. Hem, keda pošukar ka pendžara e Jehova ka dikha kaj „leskere zapovedija nane phare“ (1. Jovaneskoro 5:3).
O Jehova vetinela kaj ka pomožinel okolenge so birinena te živinen sprema leskere merilija.
„Me, o Jehova, tlo Devel, ikerava tut taro tlo desno vas hem vakerava tuke: ’Ma dara! Me ka pomožinav tuke‘“ (Isaija 41:13).
Amen šaj te živina agjaar sar so mangela o Devel soske ov ka pomožinel amen. Adava kerela preku plo Lafi, i Biblija, kova so ohrabrinela hem dela amen nadež.
Milionja manuša ko celo sveto halile kaj lengoro životo tano pošukar adaleske so živinena sprema o bibliska merilija. Adaleske šukar ka ovel te doznajne nešto poviše bašo šukar sovetija kola soj pišime ki Biblija. Šaj te počmine agjaar so ka čitine i brošura Ov bahtalo zasekogaš, koja so temelinela pe ki Biblija hem tani besplatno dostapno ki jw.org. Ki late isi akala lekcie:
-
Sar šaj te pomožinel tuke i Biblija?
-
I Biblija dela nadež
-
Dali šaj te ovel tut doverba ki Biblija?
Džikoto istražinea e Devleskoro Lafi, i Biblija, ka dikhe kaj lakere sovetija nane purane, šaj te ovel amen late doverba akana hem zasekogaš (Psalm 111:8). Te živina sprema o moralna načelija soj pišime ki Biblija tano najšukar način sar te živinel pe. Ama o Devel nane silaja te čhivel amen te kera adava (5. Mojseeva 30:19, 20; Isus Navin 24:15). Sekoj korkori mora te birinel dali ka kerel adava.
