1. Soj tano o duhovno raj, hem ko so valjani te ova odlučna?

 AVDIVE ki phuv isi jekh raj koleste so isi manuša soj zafatime keribaja šukar bukja. Ki leste isi milionja manuša kolen so isi len čačutno mir. Okola so arakhljona ko akava raj tane odlučna nikogaš te na mukhen le. Ola isto agjaar, mangena kobor so šaj poviše manuša te aven ko adava raj. Ko savo raj mislinela pe? Ko duhovno raj! a

2. Soj tano posebno bašo duhovno raj?

² Čače tano posebno so o Jehova kergja jekh simbolično than kote so leskoro narodo tano ko mir hem ko jekhipe, iako živinela ko e Satanaskoro lošno hem opasno sveto koleste so o manuša mrzinena pe jekh jekhea (1. Jov. 5:19; Otk. 12:12). Amaro Devel kova soj pherdo mangipaja dikhela sar akava sveto kerela šteta e manušenge. Adaleske ov pomožinela ple slugenge te osetinen pe bezbedna te šaj te služinen leske radosno. Ko leskoro Lafi o duhovno raj tano opišimo sar bezbedno „than garajbaske“ hem sar „gradina kolate so isi dovolno pani“ (Isa. 4:6; 58:11). Adaleske so o Jehova blagoslovinela len, adala so živinena ko akava raj tane bezbedna hem radosna ko akala posledna dive (Isa. 54:14; 2. Tim. 3:1).

3. Keda prvo puti ispolningje pe o lafija taro Isaija 65-to poglavje?

³ O Jehova vodingja e proroko e Isaija te pišinel savo ka ovel o životo adalengoro so ka živinen ko duhovno raj. Akala lafija šaj te arakha len ko 65-to poglavje taro lil  Isaija hem ola prvo ispolningje pe ko 537 berš a.a.e. Ko adava vreme, o Evreija kola so kaingje pe sine oslobodime taro ropstvo ko Vavilon hem irangje pe ki pumari phuv. O Jehova blagoslovingja ple narodo hem pomožingja le te kerel o Erusalim palem te ovel šužo hem te obnovinel o hrami — o glavno than kote so obožavinena le sine (Isa. 51:11; Zah. 8:3).

4. Sar avdive ispolninena pe o lafija taro Isaija 65-to poglavje?

⁴ Ko 1919 berš a.e., e Isaijaskoro proroštvo dujto puti počmingja te ispolninel pe keda o sluge e Jehovaskere taro amaro vreme sine oslobodime taro Baro Vavilon. Palo adava, o duhovno raj počmingja hari po hari te širinel pe ki celi phuv. O revnosna hristijanja pomožingje te keren pe but sobranija hem sikavena sine hristijanska osobine. Murša hem džuvlja, kola so angleder živinena sine nemoralno hem sine nasilna, uravgje „i nevi ličnost koja soj kerdi sprema e Devleskiri volja“ (Ef. 4:24). Džangjola pe, but taro blagoslovija so vakergja len o Isaija, doslovno ka ispolninen pe ko nevo sveto so ka ovel ki idnina. Ama, panda avdive isi amen but blagoslovija adaleske so živinaja ko duhovno raj. Te dikha sar akava duhovno raj vlijajnela upri amende hem soske na valjani nikogaš te mukha le.

SAR OSETINENA PE OKOLA SOJ TANE KO DUHOVNO RAJ

5. Sprema o proroštvo taro Isaija 65:13, kola amare potrebe tane zadovolime adaleske so živinaja ko duhovno raj?

⁵ Čale hem osvežime. O proroštvo e Isaijaskoro sikavela kobor bari razlika isi maškar adala so živinena ko duhovno raj hem adala so na živinena ki leste. (Čitin Isaija 65:13.) O Jehova darežlivo dela ple slugenge sa adava so valjani lenge te šaj te zadovolinel lengere duhovna potrebe. O Devel dela amen pli sila, i Biblija hem but duhovno hrana te šaj te „ha“, te „pija“ hem te „radujna amen“. (Sporedin Otkrovenie 22:17.) Različno amendar, okola so nane ko duhovno raj tane „bokhale“, „žedna“ hem „ladžana“. Lengere duhovna potrebe nane zadovolime (Amos 8:11).

6. Sprema Joil 2:21-24, solea tane sporedime o poklonija so dela amen o Jehova hem savi korist šaj te ovel amen lendar?

⁶ Ko plo proroštvo o Joil koristingja nesave osnovna bukja, sar soj giv, mol hem maslinovo maslo te šaj te sikavel kaj o Jehova darežlivo dela ple slugenge adava so valjani lenge, maškar kote soj hem i duhovno hrana (Joil 2:21-24). Ov kerela adava preku i Biblija hem preku amare publikacie kola so temelinena pe ki late, preku amari internet-stranica, hem isto agjaar preku amare sostanokija hem kongresija. Amen šaj sekova dive te koristina akala poklonija hem tegani ka šaj te ova duhovno čale hem osvežime.

7. So pomožinela amenge te ovel amen „radost ko vilo“? (Isaija 65:14).

⁷ Srekjna hem zadovolna. E Devleskere sluge šaj te oven „but radosna“ adaleske soj tane but blagodarna e Jehovaske. (Čitin Isaija 65:14.) O čačipa so bajrarena amari vera, o utešna vetuvanja taro e Devleskoro Lafi hem amari sigurno nadež baši idnina, koja so temelinela pe ki e Hristoseskiri otkupno žrtva, pomožinena amenge te ovel amen „radost ko vilo“. Keda keraja lafi bašo akala bukja amare phralencar hem phenjencar, adava kerela amen te ova čače srekjna (Ps. 34:8; 133:1-3).

8. Kola duj važna bukja isi ko duhovno raj?

⁸ O mangipe hem o jekhipe so isi maškar e Jehovaskoro narodo tane duj važna bukja ko  duhovno raj (Kol. 3:14). Akava pomožinela amen te zamislina amenge savo ka ovel o životo ko nevo sveto keda maškar e Jehovaskere sluge ka ovel panda pobaro mangipe hem panda pobaro jekhipe taro avdive. Jekh phen vakerela so primetingja ko e Jehovaskoro narodo keda prvo puti zapoznajngja le. Oj vakerela: „Na osetinava man sine nigde srekjno, ni maškar mi familija. Ama maškar e Jehovaskoro narodo prvo puti dikhljum sar o manuša sikavena čačutno mangipe jekh jekheske“. Sekova jekh so mangela te ovel čače srekjno hem zadovolno valjani te ovel ko amaro duhovno raj. Bizi razlika so mislinela akava sveto bašo e Jehovaskere sluge, len isi len šukar anav anglo Jehova hem anglo sa o javera so obožavinena le (Isa. 65:15).

9. Savo vetuvanje isi amen ko Isaija 65:16, 17 bašo bukja so anena amenge dukh hem muke avdive?

⁹ Smirime. Ko Isaija 65:14 vakerela kaj okola so odlučinena te ačhoven avrijal taro duhovno raj „ka vikinen tari dukh ko vilo hem but ka roven soske [lengoro] duho tano phago“. Ama, so ka ovel sa okole bukjencar so anena dukh hem muke e Devleskere narodoske? Ko krajo, adala bukja ka oven bisterde hem „ka oven garavde taro e [Devleskere] jakhja“. (Čitin Isaija 65:16, 17.) O Jehova ka cidel amare problemija hem sar so ka nakhel o vreme nane ni te setina amen ki dukh so angje amenge adala problemija.

10. Soske sian blagodarno bašo adava so šaj te ove zaedno tle phralencar hem phenjencar? (Dikh hem i slika.)

¹⁰ Panda avdive osetinaja amen posmirime keda siem prisutna ko amare sostanokija hem ola pomožinena amen te na koncentririna amen ko bukja kola so kerena amenge stres. Amen isto agjaar keraja te ovel šukar atmosfera maškar amende agjaar so sikavaja o osobine so avena tari e Devleskiri sila, sar soj mangipe, radost, mir, ljubeznost hem krotkost (Gal. 5:22, 23). Amen siem but blagodarna so siem delo tari e Devleskiri organizacija. Okola so ka ačhoven ko duhovno raj ka dikhen sar celosno ispolninela pe e Devleskoro vetuvanje bašo „nevo nebo hem nevi phuv“.

11. Sprema Isaija 65:18, 19, sar valjani te vlijajnel upri amende o duhovno raj so kergja le o Jehova?

¹¹ Blagodarna hem radosna. O Isaija isto agjaar vakerela soske valjani but te radujna amen ko duhovno raj. O Stvoriteli kova so kergja akava simbolično raj tano o Jehova. (Čitin Isaija 65:18, 19.) Adaleske, na čudinela amen so o Jehova koristinela amen  te šaj te pomožinel e manušenge te ikljon taro svetska organizacie kola so na sikavena o čačipe bašo Devel hem te pomožinel len te khuven ko amaro but šužo duhovno raj. Adaleske so siem ko čačipe isi amen but blagoslovija kola so anena amenge bari radost, a adava pottikninela amen te vakera e javerenge da baši lende (Erem. 31:12).

12. Keda čitinea o vetuvanja soj pišime ko Isaija 65:20-24, sar osetinea tut hem soske?

¹² Adaleske so siem ko duhovno raj isi amen nadež. Akaja tani panda jekh pričina so kerela te ova blagodarna hem radosna. Razmislin samo ko sa adava so ka dikha hem ka kera ko e Devleskoro nevo sveto! I Biblija vetinela: „Nane te ovel bebe so ka živinel samo nekobor dive... ni phuro kova so nane te živinel sa ple berša“. Amen ka gradina khera hem ka živina ki lende. Ka sadina drakha hem ka ha lengoro plodi. Nane amen te trudina amen džabe soske ka ova „potomstvo blagoslovimo taro Jehova“. O Jehova vetinela kaj ko amaro životo ka ova bezbedna hem zadovolna hem kaj ka ovel amen čačutni smisla soske živinaja. Panda angleder te roda le o Jehova ka džanel savi potreba isi sekole amendar hem ka del „sa e manušenge hem e životnenge adava so mangena“ (Isa. 65:20-24: Ps. 145:16).

13. Sar o lafija taro Isaija 65:25, opišinena o promene so o manuša kergje len keda počmingje te služinen e Jehovaske?

¹³ Ka mangen o mir hem ka oven bezbedna. E Devleskiri sila pomožingja buten kola so sine but nasilna, agresivna hem kola so na postapinena sine česno te keren bare promene ko plo životo. (Čitin Isaija 65:25.) Ola trudingje pe but te šaj te promeninen ple lošna osobine (Rim. 12:2; Ef. 4:22-24). Normalno, iako siem e Devleskere sluge amen panda siem nesovršena hem adaleske ponadari da ka grešina. Ama o Jehova kergja te oven ko jekhipe različna manuša kolen so isi len mangipe hem mir kova so na čhinavgjola (Tit 2:11). Akava tano čudo hem samo o semokjno Devel šaj te kerel le!

14. Sar o lafija taro Isaija 65:25 ispolningje pe upro jekh phral?

¹⁴ Dali o manuša čače šaj te meninen pe? Razmislin bašo akava iskustvo. Jekh terno džikote phergja 20 berš, poviše puti sine ko zatvor. Sine but nasilno hem živinela sine nemoralno. Ov sine ko zatvor adaleske so čorela sine vrdija, khuvela sine ko objektija te čorel hem kerela sine javera seriozna kriminalna bukja. Sekogaš sine spremno maribaske. Keda prvo puti doznajngja o čačipe tari Biblija hem počmingja te džal ko e Jehovaskere svedokongere sostanokija ov sine uverimo kaj arakhlja nešto koleske so vredinela te živinel — o duhovno raj. Otkeda krstingja pe but puti razmislingja sar upri leste ispolningje pe o lafija taro Isaija 65:25. Taro jekh nasilno manuš — sar ruv, ov ulo jekh manuš kova so mangela o mir — sar bakhro.

15. Soske mangaja te kanina e javeren da ko duhovno raj hem sar šaj te kera adava?

¹⁵ O stiho taro Isaija 65:13 počminela e lafencar: „Agjaar vakerela o Najbaro gospodari, o Jehova“. O 25-to stiho završinela e lafencar: „vakerela o Jehova“. Adava so vetinela o Jehova sekogaš ispolninela pe (Isa. 55:10, 11). O duhovno raj više postojnela. O Jehova kergja jekh phralipe kova soj čače but posebno. Adaleske so siem delo taro akava phralipe, šaj te ovel amen dži negde mir hem te osetina amen bezbedno ko akava nasilno sveto (Ps. 72:7). Adaleske mangaja te pomožina so šaj poviše manušenge te oven delo taro amaro hristijansko phralipe. Akava šaj te kera le ako  koncentririnaja amen ko adava te sikava e manušen bašo Devel (Mat. 28:19, 20).

SAR ŠAJ TE POMOŽINA E JAVERENGE TE MANGEN TE AVEN KO DUHOVNO RAJ?

16. So šaj te pomožinel e manušenge te mangen te aven ko duhovno raj?

¹⁶ Sekova jekh amendar šaj te kerel nešto te šaj o javera te mangen te aven ko duhovno raj. Amen šaj te kera adava agjaar so ka dža palo primer e Jehovaskoro. Ov na čhivela silaja e manušen te oven delo tari leskiri organizacija. Namesto adava, ov ljubezno anela e manušen ki peste (Jovan 6:44; Erem. 31:3). Keda o iskrena manuša ka doznajnen bašo e Jehovaskoro mangipe hem bašo leskere but šuže osobine, našti a ma te mangen te aven ki leste. Sar šaj amen da amare šukar osobinencar hem adalea so ka ponašina amen šukar te pomožina e manušenge te mangen te aven ko duhovno raj?

17. So valjani te kera te šaj o javera te mangen te aven ko duhovno raj?

¹⁷ Jekh način sar šaj te kera o javera te mangen te aven ko duhovno raj tano agjaar so ko amare sostanokija ka postapina ljubezno hem ka sikava mangipe. Keda nesavo nevo ka avel ko amare sostanokija mangaja te vakerel o isto so vakergje o nevernikija kola so šaj sine ko sostanokija ko purano Korint. Ola vakergje: „Čače o Devel tano maškar tumende!“ (1. Kor. 14:24, 25; Zah. 8:23). Adaleske mora ponadari da te šuna o sovet te ova ko mir jekh jekhea (1. Sol. 5:13).

18. Sar šaj te pomožina e manušenge te mangen te aven ki amari organizacija?

¹⁸ Amen valjani te trudina amen sekogaš te dikha ko amare phralja hem phenja sar so dikhela o Jehova, a na ki lengiri nesovršenost, koja so jekh dive ka našavgjovel. Amen šaj te rešina sekova nesoglasuvanje maškar amende ko ljubezno način  ako sekogaš sikavaja „milost jekh jekheske hem spremno prostinaja jekh jekheske“ (Ef. 4:32). Agjaar o manuša so mangena te postapinel pe lencar ko slično način ka mangen te oven delo taro duhovno raj. b

AČHOV KO DUHOVNO RAJ

19. a) Sprema i ramka „ Ola mukhle le hem irangje pe“, so vakergje nesave otkeda irangje pe ko duhovno raj? b) Ko so valjani te ova odlučna? (Dikh hem i slika.)

¹⁹ But siem blagodarna bašo amaro duhovno raj. Ov avdive tano pošužo taro bilo keda angleder hem ki leste isi sa poviše manuša kola so falinena e Jehova. Nikogaš ma te čhinava te ova blagodarna bašo duhovno raj so o Jehova kergja le amenge. Sekoj so mangela te ovel osvežimo, zadovolno, smirimo hem bezbedno mora te avel ko duhovno raj hem nikogaš te na mukhel le. Ama valjani but te pazina soske o Satana kerela sa so šaj te hovavel amen te šaj te mukha o duhovno raj (1. Pet. 5:8; Otk. 12:9). Na smejnaja te mukha te uspejnel ko adava. Te da amendar sa te šaj te ikera o duhovno raj te ovel šužo, čisto hem ponadari da te ovel mir ki leste.