1. Sar osetinena pe nesave keda valjani te propovedinen e javerenge? (Dikh hem i slika.)

 SAR e Jehovaskoro narodo, amen propovedinaja e javerenge adaleske so mangaja amare nebesno Dade hem adaleske so mangaja te pomožina e javerenge te zapoznajnen le. But objavitelija čače uživinena džikote tane ki služba, ama e javerenge tano pharo te uživinen ko adava. Soske? Nesave šaj tane ladžutne hem mislinena kaj nane šukar učitelija. Nesave na osetinena pe šukar te džan ko e manušengere khera ako nane kanime. Nesave šaj darana kaj o manuša nane te mangen te šunen len. A nesave šaj sine vospitime te izbeginen te aven ko konflikt e javerencar. Iako but mangena e Jehova, akale phralenge hem phenjenge but tano pharo te počminen te keren lafi okolencar so na pendžarena len. Sepak, ola haljovena kobor tano važno te propovedinel pe hem adaleske redovno učestvujnena ki služba. O Jehova sigurno but radujnela pe bašo adava!

2. Ako tuke pharo te ove radosno ki služba, soske na valjani te obeshrabrine tut?

² Dali nekogaš tuke pharo te ove radosno ki služba adaleske so osetinea tut agjaar? Ako tano agjaar, ma obeshrabrin tut. Adava so nane tut samodoverba šaj te ovel znako kaj sian ponizno hem kaj na mangea te privlečine vnimanie ki tute. Isto agjaar, adava sikavela kaj na mangea te rasprajne tut e javerencar. Hem nikoj na mangela te nervirinel e javeren, posebno ako mangela te kerel lenge šukaripe. Tlo nebesno Dad svesno tano save predizvikija isi tut hem mangela te del tut i pomoš so valjani tuke (Isa. 41:13). Ki akaja statija, ka dikha pandž predlogija bašo adava sar te ikljova ko krajo asavke čuvstvoncar hem sar te ovel amen radost ki služba.

 MUKH E DEVLESKORO LAFI TE KEREL TUT ZORALO

3. So pomožingja e prorokoske e Eremijaske te propovedinel e javerenge?

³ Čak ko purano vreme, o haberi taro Devel dela sine sila leskere slugenge keda valjani sine te keren nesavi phari zadača. Razmislin bašo e Eremijaskoro primer. Ov sine but sekirimo keda o Jehova dengja le zadača te propovedinel. O Eremija vakergja: „Me na džanava te kerav lafi, soske panda sium čhavo“ (Erem. 1:6). So pomožingja leske hrabro te propovedinel? Ov dobingja sila taro adava so o Devel vakergja leske. O Eremija vakergja: „Leskoro lafi sine sar jekh jag so thabljola, phanli ko mle kokala, hem našti sine više te kjutinav“ (Erem. 20:8, 9). Iako e Eremija sine le pharo podračje, ama o haberi so valjani sine te vakerel le dengja le sila koja so valjangja leske te šaj te kerel pli zadača.

4. So slučinela pe keda čitinaja e Devleskoro Lafi hem keda razmislinaja bašo adava so čitinaja? (Kološanja 1:9, 10).

⁴ O hristijanja dobinena sila taro o haberi so arakhljovela ko e Devleskoro Lafi. O apostol Pavle pottikningja e phralen taro Kolosi te trudinen pe sa pošukar te zapoznajnen e Devle. Adava ka pomožinel lenge sine te živinen agjaar sar so mangela o Jehova džikote ponadari da anena plodi ki sekoja šukar buti. (Čitin Kološanja 1:9, 10.) Ki akaja šukar buti sine vklučimo te propovedinel pe o šukar haberi. Adaleske, keda čitinaja e Devleskoro Lafi hem keda razmislinaja bašo adava so čitinaja, amari vera ko Jehova ovela panda pozorali hem panda pošukar haljovaja kobor tano važno te propovedina o haberi bašo Carstvo.

5. Sar šaj te ovel amen najbari korist taro čitibe hem proučibe i Biblija?

⁵ Keda čitinaja, proučinaja hem razmislinaja bašo e Devleskoro Lafi, na valjani te kera le adava sigate ako mangaja te ovel amen celosno korist lestar. Adaleske, odvojn tuke vreme. Ako arakhea stiho kova so na haljovea le, ma nakhav le samo. Namesto adava, koristin o Indeks bašo Publikacie taro e Jehovaskere svedokija ili nesavi javer publikacija istražibaske te šaj te arakhe objasnuvanje bašo adava stiho. Ako odvojnea tuke vreme keda proučinea, ka ove panda pouverimo kaj adava so vakerela i Biblija tano točno (1. Sol. 5:21). Kobor pouverimo ka ove, doborom poviše ka uživine te vakere e javerenge bašo adava so sikliljan.

 SPREMIN TUT ŠUKAR BAŠI SLUŽBA

6. Soske valjani šukar te spremina amen baši služba?

⁶ Ako šukar spreminea tut baši služba, verojatno nane te ovel tut doborom trema keda ka kere e javerencar lafi. O Isus pomožingja ple učenikonge te spreminen pe angleder te bičhalel len te džan ki služba (Luka 10:11-11). Adaleske so primeningje e Isuseskere sovetija, ola šaj sine te keren but šukar bukja ki služba hem adaleske sine but radosna (Luka 10:17).

7. Sar šaj te spremina amen baši služba? (Dikh hem i slika.)

⁷ Sar šaj te spremina amen baši služba? Valjani te razmislina so mangaja te vakera hem sar šaj te vakera adava ko jekh prirodno način, amare lafencar. Isto agjaar, šaj te razmislina ko kola trin voobičaena načinija šaj te reagirinen o manuša hem sar šaj te odgovorina ki sekoja situacija posebno. Tegani, keda ka kera e manušencar lafi, šaj te probina te opuština amen, te asa hem te ova prirodna.

8. Ki savi smisla o hristijanja tane sar o phuvjale čare kola so spomningja len o apostol Pavle?

⁸ O apostol Pavle jekhe sporedbaja sikavgja savi uloga isi amen ki propovedničko zadača keda vakergja: „Adava barvalipe isi amen ko phuvjale čare“ (2. Kor. 4:7). Kova tano adava barvalipe? Adava tano o propovedibe bašo Carstvo kova so spasinela životija (2. Kor. 4:1). Soj tane o phuvjale čare? Ola pretstavinena e Devleskere slugen kola so ingarena o šukar haberi e javerenge. Ko vreme e Pavleskoro, o trgovcija koristinena sine čare tari glina te šaj ki lende te ingaren vredna bukja, sar na primer hajbe, mol hem pare. Slično, o Jehova dengja amen i najskapoceno buti — o šukar haberi. Adaleske so o Jehova pomožinela amen, šaj te dobina i sila so valjani amenge te šaj ponadari da verno te propovedina.

MOLIN TUT BAŠI HRABROST

9. Sar šaj te pobedina i dar taro manuš ili i dar kaj nane te mangen te šunen amen? (Dikh hem i slika.)

⁹ Ponekogaš, šaj te ovel amen dar taro manuš, ili dara kaj o manuša nane te mangen te šunen amen. Sar šaj te pobedina i dar? Razmislin baši e apostolengiri molitva keda naredingje lenge te na propovedinen. Ola na darandile hem na čhinavgje te propovedinen. Namesto adava, molingje e Jehova  te pomožinel lenge ponadari da hrabro te vakeren leskoro lafi. O Jehova odma odgovoringja ki lengiri molitva (Apo 4:18, 29, 31). Ako ponekogaš isi amen dar taro manuš, amen da valjani te molina e Jehova te pomožinel amenge. Molin e Jehova te pomožinel tuke te mange e manušen te šaj te pobedine i dar.

10. Sar pomožinela amen o Jehova te šaj te kera amari zadača sar leskere svedokija? (Isaija 43:10-12).

¹⁰ O Jehova biringja amen te ova leskere svedokija hem ov vetinela amenge kaj ka pomožinel amen te ova hrabra. (Čitin Isaija 43:10-12.) Razmislin samo bašo štar načinija sar kerela adava. Prvo, o Isus tano amencar sekogaš keda propovedinaja o šukar haberi (Matej 28:18-20). Dujto, o Jehova pomožinela amen preku o angelija (Otk. 14:6). Trito, o Jehova dela amen pli sila sar pomošniko, te šaj te setina amen ko bukja so siklilem len (Jovan 14:25, 26). Štarto, o Jehova dengja amen phralja hem phenja te šaj zaedno lencar te dža ki služba. Adaleske so isi amen e Jehovaskiri pomoš hem i poddrška e phralengiri hem e phenjengiri, isi amen sa so valjani amenge te šaj te ova uspešna ki služba.

OV PRILAGODLIVO HEM AČHOV POZITIVNO

11. Džikote sian ki služba, sar šaj te arakhe poviše manušen? (Dikh hem i slika.)

¹¹ Dali sian obeshrabrimo keda na arakhea poviše manušen khere? Šaj te puče tut: „Kote tane ko momenti o manuša taro mlo podračje so isi man?“ (Apo. 16:13). „Dali tane ki buti ili iklile te pazarinen?“ Ako adava tano agjaar, šaj li te arakhe poviše manušen ako svedočinea ki ulica? Jekh phral so vikinela pe Džošua vakerela: „Sine man prilika te kerav lafi e manušencar ko trgovska centrija hem ko javera prometna thana kote so isi manuša“. Isto agjaar, ov hem leskiri romni i Bridžit arakhle poviše manušen khere samo so počminela te rakjol hem nedela paloručko (Ef. 5:15, 16).

12. Sar šaj te džana ko so verujnena o manuša ili bašo so sekirinena pe?

¹² Ako o manuša kaske so propovedinea na sikavena baro interes, probin te doznajne ko so verujnena ili bašo so sekirinena pe.  O Džošua hem i Bridžit sar uvod koristinena o pučibe so arakhljola ki prvo strana taro traktatija. Na primer, keda koristinena o traktati Sar dikhea ki Biblija?, ola vakerena: „Nesave manuša verujnena kaj i Biblija tani taro Devel, ama javera na verujnena ko adava. So mislinena tumen?“ But puti agjaar počminena razgovor.

13. Soske šaj te vakera kaj isi amen uspeh ki služba, čak keda o manuša na mangena te šunen amen? (Izreki 27:11).

¹³ Amaro uspeh ki služba na zavisinela taro rezultatija. Soske? Adaleske so kergjem adava so o Jehova hem leskoro čhavo očekujnena amendar — svedočingjem e javerenge (Apo. 10:42). Čak ako na arakhaja nekas kasaja so šaj te kera lafi, ili čak ako nekoj na mangela te šunel o haberi so propovedinaja le, amen šaj te ova radosna adaleske so džanaja kaj radujnaja amare nebesno Dade. (Čitin Izreki 27:11.)

14. Soske šaj te radujna amen keda o javera ka arakhen ko podračje nekas so interesinela pe bašo čačipe?

¹⁴ Amen isto agjaar radujnaja amen keda o javera ka arakhen ko podračje nekoj so interesinela pe bašo čačipe. Ki Stražarsko kula o propovedibe sine sporedimo rodibaja čhave so našavdilo. But džene tane vklučime ko rodibe hem proverinena ko različna thana. Keda ka arakhen e tikne, sarine radujnena pe, na samo okova so arakhlja le. Slično, sarine taro sobranie tane vklučime te keren pe neve učenikija e Isuseskere. Sarine taro sobranie tane potrebna te šaj te obrabotinel pe o podračje hem sarine radujnena pe keda nesavo nevo ka počminel te avel ko sostanokija.

KONCENTRIRIN TUT KO TLO MANGIPE SPREMA O JEHOVA HEM SPREMA TLO PAŠUTNO

15. Sar adava so ka primenina o lafija taro Matej 22:37-39 šaj te pomožinel amenge te ova panda poradosna ki služba? (Dikh hem i slika tari naslovno strana.)

¹⁵ Šaj te bajrara amari radost ki služba agjaar so nikogaš nane te bistra kaj o propovedibe tano o najšukar način te sikava amaro mangipe sprema o Jehova hem sprema amare pašutne. (Čitin Matej 22:37-39.) Zamislin samo kobor radujnela pe o Jehova keda dikhela kaj propovedinaja hem kobor tane radosna o manuša keda počminena te proučinen i Biblija. Ma te bistra isto agjaar kaj okola so šunena o haberi hem odlučinena  te služinen e Jehovaske, isi len prilika večno te živinen (Jovan 6:40; 1. Tim. 4:16).

16. Sar šaj te ova radosna ki služba keda našti te ikljova kheraldan? Vaker primerija.

¹⁶ Dali tari nesavi pričina našti te ikljove taro tlo kher? Ako adava tano agjaar, tegani koncentririn tut ko adava so šaj te kere te šaj te sikave mangipe sprema o Jehova hem sprema tlo pašutno. Džikote trajnela sine i pandemija KOVID-19, o Semjuel hem i Danija našti sine te ikljoven taro plo kher. Ko adava pharo vreme, ola redovno svedočinena sine preku telefoni, pišinena sine pismija hem vodinena sine bibliska kursija preku Zum. O Semjuel svedočinela sine e manušenge ki bolnica kote so priminela sine terapija bašo rako. Ov vakerela: „O pharipa lena amari emocionalno, fizičko hem duhovno sila. Valjani te arakha radost ki amari služba bašo Jehova“. Panda popharo sine adava so i Danija peli hem našti sine trin masek te uštel taro kreveti. Palo adava, valjani sine te ovel ki invalidsko količka šov masek. Oj vakerela: „Probinava sine te kerav sa so šaj ko mle okolnostija. Šaj sine te svedočinav e medicinsko sestrake so posetinela man sine hem kerava sine lafi okolencar so anena mange sine bukja khere. Isto agjaar, preku telefoni sine man šuže razgovorija jekhe džuvljaja koja so kerela sine buti ki jekh medicinsko firma“. Iako o Semjuel hem i Danija našti sine više te keren sar so kerena sine angleder, ola kerena sine adava so šaj hem adaleske sine radosna.

17. Sar šaj te ovel tut najbari korist taro predlogija so dikhlem len ki akaja statija?

¹⁷ Te šaj te ovel tut celosno korist taro akala pandž predlogija so dikhlem len ki akaja statija, probin te primenine sekova jekh lendar. Sekova predlog tano sar jekh sostojka ki jekh recepta. Keda sa o sostojke tari jekh recepta ka čhiven pe zaedno tegani ka oven tut vkusna rezultatija. Ako primeninaja sa o predlogija, tegani polokhe ka šaj te ikljova ko krajo e negativno čuvstvoncar hem ka ova poradosna ki služba.