Dali vnimatelno čitingjan o broja tari Stražarsko kula akale beršeske? Dikh dali šaj te odgovorine ko akala pučiba.

So značinela te menina amaro način sar razmislinaja? (Rim. 12:2).

Valjani te kera nešto poviše nego samo nekobor šukar bukja. Mora te ispitina save manuša siem čače hem te kera o potrebna promene te šaj panda poviše te živina sprema e Jehovaskere merilija(w23.01, str. 8-9).

Sar šaj te ova uramnotežena džikote dikhaja so slučinela pe ko sveto?

Šukar tano te interesina amen sar o svetska nastanija ispolninena o proroštvija. Ama na širinaja amaro lično mislenje bašo adaleske so na mangaja te kera podelbe ko sobranie. Namesto adava, vakeraja informacie so temelinena pe ko amare publikacie (1. Kor. 1:10; w23.02, str. 16).

Sar o krstibe e Isuseskoro razlikujnela pe taro krstibe leskere sledbenikongoro?

Ov na valjangja te del zavet e Jehovaske soske sine bijamo ki nacija kolaja so o Devel kergja zavet. Ov na valjani sine te kainel pe bašo nesavo grevo soske sine sovršeno, bizo grevo (w23.03, str. 4).

Sar šaj te pomožina e javerenge te komentirinen ko sostanokija?

Valjani te trudina amen amare komentarija te oven kratka te šaj te ovel vreme poviše džene te komentirinen. Isto agjaar, na valjani te vakera sa o misle taro pasus. Agjaar ka da prilika e javerenge te ovel len so te komentirinen (w23.04, str. 23).

So pretstavinela o simbolično „Sveto Drumo“, kova soj spomnimo ko Isaija 35:8?

Akale simbolično drumoja prvo mislinela pe sine ko drumo taro Vavilon dži ko Erusalim, kova so o Evreija mora sine te phiren le. A so pretstavinela akava drumo ko sovremeno vreme? Vekoncar angleder 1919 berš, sine kerde o potrebna podgotovke bašo akava drumo, maškar kola so sine o prevedibe hem o pečatibe e Biblijakoro. E Devleskoro narodo avdive patujnela ko akava „Sveto Drumo“ hem ov pomožinela amen te ova ko duhovno raj akana hem te dobina o blagoslovija so ka anel len e Devleskoro Carstvo (w23.05, str. 15-19).

Bašo kola duj simbolična džuvlja kerela pe lafi ko 9 poglavje taro lil Izreki?

Jekh simbolično džuvli kolake so pišinela ko Izreki tani „i glupavo džuvli“ kolakiri so pokana ingarela ko „grobo“. I javer simbolično džuvli tani „i čačutni mudrost“ kolakiri so pokana ingarela „ko drumo e haljojbaskoro“ hem ko životo (Izr. 9:1, 6, 13, 18; w23.06, str. 22-24).

Sar taro način sar o Jehova postapingja e Jovea dikhela pe leskiri poniznost hem razumnost?

O Jehova vakergja e Loteske te našel taro Sodom ko planine. Keda o Lot molingja e Jehova te mukhel le te našel ko Zigor, ov dozvolingja leske adava (w23.07, str. 21).

So šaj te kerel jekh romni ako lakoro rom dikhela pornografija?

Na valjani te mislinel kaj oj tani krivo. Valjani te koncentririnel pe ko plo amalipe e Devlea hem te razmislinel bašo nesave bibliska izveštaija bašo džuvlja so sine len problemija hem kola so rodingje uteha taro Jehova. Šaj te pomožinel ple romeske te izbeginel rizična situacie (w23.08, str. 14-17).

Sar šaj o haljojbe, javere lafencar i proniklivost te pomožinel amenge keda nekoj mangela te rasprajnel pe amencar bašo amare veruvanja?

Keda nekoj ka pučel amen nešto, ko adava valjani te dikha sar prilika te doznajna soj leske važno. Adava ka pomožinel amenge te odgovorina leske ljubezno hem krotko (w23.09, str. 16-17).

So šaj te sikljova tari Marija bašo adava sar te dobina i sila so valjani amenge?

Keda doznajngja kaj ka ovel i daj e Mesijaskir, oj rodingja pomoš taro javera. O Gabriel hem i Elisaveta ohrabringje la preku o proroštvija so arakhljona ko e Devleskoro Lafi. Amen da šaj te dobina sila taro amare phralja hem phenja (w23.10, str. 15).

Sar šaj o Jehova te odgovorinel ko amare molitve?

O Jehova vetinela kaj ka šunel amare molitve hem na bistrela pli namera (Erem. 29:12). O Jehova šaj te odgovorinel ko slična molitve ko različna načinija, ama šaj te ova sigurna kaj sekogaš ka pomožinel amen (w23.11, str. 21-22).

Soske ko Rimjanja 5:4 palem spomninela pe „i nadež“ keda tani više spomnimi ko 2-to stiho?

Keda nekoj šunela o šukar haberi, šaj te dobinel nadež bašo večno životo ko raj ki phuv. Ama keda isi le nevolje, keda istrajnela ki lende hem keda dikhela kaj o Jehova tano zadovolno lea, leskiri nadež ovela sa pozorali hem poviše ceninela la (w23.12, str. 12-13).