SREDA, ko 18 januari 2023 berš, ki amari internet strana jw.org sine objavimo jekh posebno izvestuvanje kote so pišinela sine kaj o phral o Gejdž Fligl hem o phral Džefri Vinder tane imenujme te služinen sar členija ko Vodečko telo e Jehovaskere svedokongoro. O solduj džene but vreme služinena e Jehovaske.

O phral o Fligl barilo ki zapadno Pensilvanija (SAD), ki familija soj e Jehovaskere svedokija. Keda sine tinejdžeri, leskiri familija selingja pe ki jekh tikni diz kote so sine pobari potreba taro objavitelija. Kratko palo adava, ko 20 noemvri 1988 berš, ov krstingja pe.

Leskere roditelija sekogaš pottikninela le sine te počminel e polnovremeno službaja. Ola but puti vikinena sine ko gosti pokrainska nadglednikon hem beteliten hem adaleske o phral Fligl šaj sine te dikhel kaj akala phralja hem phenja tane but srekjna. Kratko otkeda krstingja pe, ko 1 septemvri 1989 berš, počmingja e opšto pionersko službaja. Duj berš palo adava, ov ispolningja pli cel so čhivgja peske keda sine le 12 berš — te služinel ko Betel. Ko oktomvri 1991 berš, ov počmingja te služinel ko Betel ko Bruklin.

O phral Fligl ofto berš kergja buti ko Betel kote so sostavinena pe sine o lila, a palo adava dobingja zadača te služinel ko Oddelenie baši služba. Ko adava periodi, nekobor berša služingja ko sobranie ki rusko čhib. Ko 2006 berš, o phral Fligl ženingja pe e Nadjaja. Otkeda lele pe, oj da počmingja te služinel ko Betel. Ola služingje ko sobranie ki portugalsko čhib, a poviše taro deš berš služingje ko sobranie ki špansko čhib. Otkeda but berša služingja ko Oddelenie baši služba, o phral Fligl dobingja zadača te služinel ki Kancelarija taro Odbor sikajbaske, a pokasno ki Kancelarija ko Odbor baši služba. Ko  mart 2022 berš, ov sine imenujmo te služinel sar pomošniko ko Odbor baši služba ko Vodečko telo.

O phral Vinder barilo ki Murieta (Kalifornija, SAD). Leskere roditelija sikavgje le bašo čačipe panda taro tiknipe. Ov krstingja pe ko 29 mart 1986 berš. Odma o sledno masek odlučingja te služinel sar pomošno pioneri. Ov doborom but uživinela sine ki služba so na mangela sine te čhinavel. Otkeda nekobor masek služingja sar pomošno pioneri, ko 1 oktomvri 1986 berš, počmingja e opšto pionersko službaja.

Keda sine tinejdžeri, o phral Vinder gelo ko Betel te posetinel pe duje pobare phralen. Adaja poseta, ki leste bajrargja i želba pokasno ov da te del molba baši betelsko služba. Hem agjaar, ko maj 1990 berš, sine vikimo te služinel ko Betel ko Volkil.

O phral Vinder kergja buti ko različna oddelenija ko Betel — ko Oddelenie bašo čistibe, ko Oddelenie bašo farme hem ki Betelsko kancelarija. Ko 1997 berš, ov ženingja pe jekhe phenjaja so vikinela pe Andžela, hem ottegani ola zaedno služinena ko Betel. Ko 2014 berš, ola selingje pe ko Vorvik, kote so o phral Vinder pomožingja ko gradibe objektija bašo glavno sedište. Ko 2016 berš, selingje pe ko Obrazovno centar Paterson, kote so o phral Vinder služingja ko Oddelenie baši audio hem video produkcija. Štar berš palo adava, irangje pe ko Vorvik kote so o phral Vinder dobingja zadača te služinel ki Kancelarija ko Odbor bašo personal. Ko mart 2022 berš, ov sine imenujmo te služinel sar pomošniko ko Odbor bašo personal ko Vodečko telo.

Molinaja amen o Jehova but te blagoslovinel akale phralen kolen so dengja len amenge sar poklonija, džikote ponadari da dena pestar sa te keren buti bašo Carstvo (Ef. 4:8).