Nesave barile ki kultura kote so o murša mislinena kaj o džuvlja vredinena pohari lendar. Na primer o Hans, jekh pokrainsko nadgledniko tari Bolivija vakerela kaj nesave barile ki kultura kote so o murša mislinena kaj tane pošukar taro džuvlja hem but puti ponašinena pe e lencar bizo poštovanje. O Šengšien, jekh starešina taro Tajvan, vakerela: „Ko than kote so živinava, but murša mislinena kaj o džuvlja na valjani te mešinen pe lenge ko ništo. Ako jekh murš vakerela so mislinela jekh džuvli bašo nešto, leskere amala šaj te na poštujnen le više“. Nesave murša sikavena kaj isi len predrasude sprema o džuvlja ko javera načinija. Na primer, šaj vakerena šale kolencar so ponižinena e džuvlen.

Ama, šukar tano adava so jekh murš šaj te meninel pe, bizi razlika ki koja kultura barilo. Ov šaj te meninel plo stavi kaj o murša tane pošukar taro džuvlja (Ef. 4:22-24). Šaj te kerel adava ako džala palo e Jehovaskoro primer. Ki akaja statija ka dikha sar o Jehova postapinela e džuvlencar, sar o phralja šaj te džan palo e Jehovaskoro primer hem sar šaj o starešine te predvodinen ko sikajbe poštovanje e phenjenge.

SAR POSTAPINELA O JEHOVA E DŽUVLENCAR?

O Jehova tano sovršeno primer bašo adava sar valjani te postapinel pe e džuvlencar. Ov tano sočuvstvitelno Dad kova so mangela sa ple čhaven (Jovan 3:16). A o džuvlja kola so sikavena vera ki leste tane leske sar skapocena čhaja. Razmislin bašo sledna načinija sar o Jehova sikavela kaj mangela hem poštujnela e džuvlen.

Ov postapinela lencar nepristrasno. O Jehova kergja e murše hem e džuvlja sprema plo liko  (1. Moj. 1:27). Ov na stvoringja e murše pointeligentno ili potalentirimo tari džuvli, a ni na mangela e muršen poviše taro džuvlja (2. Let. 19:7). Ov kergja o murš hem i džuvli te ovel len isto sposobnost te haljoven o bibliska čačipa hem te sikaven osobine sar leskere. O Jehova ceninela hem e muršen hem e džuvlen so sikavena vera ki leste. Hem ov sarinenge dela nadež te živinen večno ki phuv ili te služinen sar carija hem sveštenikija ko nebo. Taro akava dikhjola pe kaj e Jehova nane le predrasude sprema o džuvlja.

Ov šunela len. E Jehovaske tano važno sar osetinena pe o džuvlja hem so mučinela len. Na primer, ov šungja hem odgovoringja ko molitve e Rahelakere hem e Anakere (1. Moj. 30:22; 1. Sam. 1:10, 11, 19, 20). Isto agjaar, o Devel ple silaja vodingja nesave bibliska pisatelen te pišinen bašo situacie kolende so o murša šungje e džuvlen. Na primer, o Avraam sine poslušno ko e Jehovaskere lafija te šunel ple romnja e Sara (1. Moj. 21:12-14). O cari o David šungja e Avigeja. Ustvari, ov halilo kaj o Jehova bičhalgja la te kerel lea lafi (1. Sam. 25:32-35). O Isus, kova so sovršeno sikavela sine o osobine ple Dadeskere, šungja ple daja e Marija (Jovan 2:3-10). Taro akala primerija dikhaja kaj jekh način sar o Jehova sikavela poštovanje sprema o džuvlja tano agjaar so šunela len.

Le isi le doverba ki lende. Na primer, e Jehova sine le doverba ki Eva hem lake da dengja i zadača te grižinel pe baši phuv (1. Moj. 1:28). Adalea ov sikavgja kaj i Eva na vredinela pohari taro Adam, nego kaj ki late dikhela sar pomošnička. Isto agjaar, o Jehova dengja e Devorake hem e Oldake, kola so sine proročice, zadača te den sovet leskere narodoske, a isto agjaar jekhe sudijaske hem jekhe careske (Sud. 4:4-9; 2. Car. 22:14-20). Avdive da o Jehova sikavela doverba ko phenja agjaar so dela len različna zadače ki služba baši leste. Akala verna phenja služinena sar objavitelija, pionerija hem misionerija. Ola pomožinena ko proektiribe, gradibe hem održibe dvorane hem podružnice. Nesave lendar služinena ko Betel, a javera ko preveduvačka kancelarie. Akala phenja tane sar jekh bari vojska kolen so o Jehova koristinela te šaj te ispolninel pli volja (Ps. 68:11). Jasno tano kaj o Jehova na mislinela kaj o džuvlja tane slaba ili kaj nane sposobna.

SAR ŠAJ O PHRALJA TE SIKLJOVEN TE PONAŠINEN PE E DŽUVLENCAR SAR O JEHOVA?

Phraljalen, te šaj te dikha dali ponašinaja amen amare phenjencar sar o Jehova, valjani iskreno te ispitina sar razmislinaja hem postapinaja. Te šaj te kera adava, valjani amenge pomoš. Isto sar so jekh rendgen aparati šaj te sikavel dali amaro srce tano ki šukar sostojba, agjaar jekh šukar amal hem e Devleskoro Lafi šaj te pomožinen amenge te otkrina dali hor ki amende isi nesavo negativno čuvstvo sprema o džuvlja. So valjani te kera te šaj te dobina asavki pomoš?

Puč jekhe šukar amale (Izr. 18:17). Šukar ka ovel te puča nesave amale kaste so isi amen doverba hem soj pendžardo sar nekoj soj ljubezno hem razumno akala pučiba: „So mislinea, sar ponašinava man e phenjencar? Dali ola osetinena kaj poštujnava len? Isi li nešto so šaj te meninav ki mande te šaj panda pošukar te ponašinav man lencar?“ Ako tlo amal vakerela tuke nesave bukja kolende so šaj te ove pošukar, ma opravdin tut. Namesto adava, ov spremno te kere adava so valjani.

Proučin e Devleskoro Lafi. O najšukar način te dikha dali ponašinaja amen šukar e phenjencar tano agjaar so preku e Devleskoro Lafi ka ispitina amaro stavi hem amare postapke (Evr. 4:12). Džikote proučinaja i Biblija, šaj te čitina bašo nesave murša kola so ponašingje pe šukar e džuvlencar hem bašo nesave murša so ponašingje pe lošno. Palo adava, šaj te sporedina lengere postapke amare postapkencar. Osven adava, ako sporedinaja poviše bibliska stihija, adava ka pomožinel amenge te na ikala stihija taro kontekst te šaj te poddržina nesave amare pogrešna stavija bašo džuvlja. Na primer, ko but bibliska prevodija ko 1. Petareskoro 3:7 pišinela kaj o murša valjani te poštujnen e džuvlen „sar poslabo čaro“. b Dali adava značinela kaj i džuvli na vredinela isto sar o murš ili kaj nane doborom inteligentno  ili sposobno? Džangjola pe kaj na! Sporedin o lafija e Petareskere adalea so pišinela ko Galatjanja 3:26-29 kote so pišinela kaj o Jehova maškar o murša biringja hem e džuvlen te vladinen zaedno e Isusea ko nebo. Ako proučinaja e Devleskoro Lafi hem ako zamolinaja jekhe šukar amale ili amalinka te vakerel amenge plo mislenje bašo adava sar ponašinaja amen e džuvlencar, adava šaj te pomožinel amenge te sikljova iskreno te poštujna amare phenjen.

SAR O STAREŠINE SIKAVENA KAJ POŠTUJNENA E PHENJEN

Javer način sar šaj o phralja te sikljoven te poštujnen e phenjen tano agjaar so ka sledinen o primer amare grižliva starešinengoro. Sar o starešine sikavena kaj poštujnena e phenjen? Te dikha nekobor konkretna načinija.

Ola pofalinena e phenjen. O apostol Pavle dengja šukar primer e starešinenge. Ov javno pofalingja nekobore phenjen ko pismo bašo sobranie ko Rim (Rim. 16:12). Šaj li te zamisline tuke sar osetingje pe o phenja keda o pismo e Pavleskoro sine čitimo ko sobranie? Slično sar o Pavle, o starešine darežlivo pofalinena e phenjen bašo lengere šuže osobine hem bašo sa adava so kerena e Jehovaske. Akava šaj but te pomožinel e phenjenge te džanen kaj o sobranie but ceninela len hem poštujnela len. Adava so o starešine ohrabrinena len šaj te ovel baš adava so ko momenti ka valjanel lenge te šaj ponadari da te služinen verno e Jehovaske (Izr. 15:23).

Keda pofalinena e phenjen, o starešine tane iskrena hem konkretna. Soske? Jekh phen so vikinela pe Džesika, vakerela: „Šukar tano keda o phralja vakerena jekhe phenjake ’bravo‘. Ama posebno ceninaja keda o phralja ka pofalinen amen bašo nešto konkretno. Na primer, adaleske so amare čhave bešena mirno ko sostanokija ili adaleske so odvojnaja vreme te dža ki jekh interesentka hem so laja la amencar ko sostanok“. Adalea so pofalinena len konkretno, o  starešine kerena o phenja te osetinen pe potrebna hem cenime ko sobranie.

Ola šunena e phenjen. O ponizna starešine haljovena kaj nane samo len šukar idee. Ola pučena e phenjen bašo lengere predlogija hem vnimatelno šunena len džikote kerena lafi. Adava na samo so ka koristinel lenge nego isto agjaar ka ohrabrinen e phenjen. Sar? Jekh starešina so vikinela pe Herardo hem služinela ko Betel, vakerela: „Haliljum kaj adava so pučava e phenjen bašo lengoro mislenje, pomožinela mange pošukar te kerav mi buti. But puti ola kerena sine nesavi buti poviše vreme taro nesavo phral“. Ko sobranie, but phenja služinena sar pionerija hem adaleske ola džanena but poviše bašo manuša taro podračje. Jekh starešina so vikinela pe Brajan, vakerela: „Amare phenjen isi len but šuže osobine hem veštine kola soj potrebna ki organizacija. Adaleske sikljov taro lengoro iskustvo!“

O mudra starešine na ignoririnena e phenjengere predlogija. Soske? Jekh starešina so vikinela pe Edvard, vakerela: „O mislenje jekhe phenjakoro ili lakoro iskustvo šaj te pomožinel jekhe phraleske te ovel le celosno slika baši jekh buti hem pošukar te haljovel o čuvstvija e javerengere“ (Izr. 1:5). Čak ako jekh starešina našti te primeninel o predlog jekhe phenjakoro, sepak ov šaj te zablagodarinel pe lake so vakergja plo mislenje hem so spodelingja plo iskustvo.

Ola obučinena e phenjen. O mudra starešine rodena prilike te obučinen e phenjen. Na primer, ola šaj te sikaven e phenjen sar vodinela pe o sostanok službake, te šaj te oven spremna ako ko sostanok nane krstimo phral. Šaj te obučinen len te keren buti nesave alatencar ili mašinencar te šaj te pomožinen ki izgradba hem ko održibe teokratska objektija. Ko Betel, o nadglednikija obučinena e phenjen te keren različna zadače, sar na primer bašo održibe, baši nabavka, bašo smetkovodstvo, bašo kompjutersko programiribe hem javera bukja. Keda obučinena e phenjen, o starešine sikavena kaj dikhena ki lende sar sposobna sorabotnikija hem kaj isi len doverba ki lende.

But phenja koristinena i obuka so dobingje la taro starešine te šaj te pomožinen e javerenge. Na primer, nesave phenja koristinena i obuka so dobingje la baši izgradba dvorane, te šaj te pomožinen e javerenge te gradinen pumare khera pali nesavi prirodno katastrofa. Javera phenja koristinena o veštine so siklile džikote svedočingje ko prometna thana te šaj te pomožinen poviše phenjenge te učestvujnen ki adaja služba. Savo stavi isi e phenjen bašo starešine so obučingje len? Jekh phen so vikinela pe Dženifer, vakerela: „Džikote pomožingjum te gradinel pe dvorana, jekh nadgledniko odvojngja vreme te obučinel man. Ov dikhlja i buti so kergjum hem pofalingja man. But šukar sine mange te kerav lea buti adaleske so dikhava sine kaj ceninela man hem kaj isi le doverba ki mande“.

SOSKE TANO ŠUKAR TE PONAŠINA AMEN E PHENJENCAR SAR TE PHENE TANE AMENGE FAMILIJA

Amen mangaja amare verno phenjen isto sar o Jehova! Adaleske ponašinaja amen lencar sar te phene siem familija (1. Tim. 5:1, 2). Dičinaja amen so šaj te služina e Jehovaske zaedno lencar. Amenge adaja tani bari čest! Isto agjaar, radujnaja amen keda ola osetinena kaj mangaja hem kaj poddržinaja len. Jekh phen so vikinela pe Vanesa, vakerela: „But sium blagodarno e Jehovaske adaleske so sium delo tari leskiri organizacija koja soj pherdi phralencar so ohrabrinena man“. Jekh phen taro Tajvan vakerela: „But sium blagodarno so o Jehova hem leskiri organizacija ceninena e džuvlen hem poštujnena amare čuvstvija. Adava bajrarela mli vera hem mlo cenenje baši čest so isi man te ovav delo tari e Jehovaskiri organizacija“.

O Jehova sigurno dičinela pe keda dikhela kaj o verna phralja taro sobranie ceninena e džuvlen hem isi len poštovanje sprema lende, isto sar leste (Izr. 27:11). Jekh starešina tari Škotska so vikinela pe Bendžamin, vakerela: „Avdive, isi but murša ko sveto so na poštujnena e džuvlen. Adaleske, keda amare phenja khuvena ki dvorana, amen mangaja ola te osetinen i razlika“. Te da amendar sa te ova sar o Jehova agjaar so ka ponašina amen amare verna phenjencar mangipaja hem ka poštujna len, soske ola adava zaslužinena (Rim. 12:10).