1. Soske i Spomen-svečenost tano o najvažno dive ko berš? (Luka 22:19, 20).

 E JEHOVASKERE narodoske i Spomen-svečenost bašo e Hristoseskoro meribe tano o najvažno dive ko berš. Akava tano o edinstveno nastan kova so o Isus konkretno zapovedingja ple sledbenikonge te ikeren le. (Čitin Luka 22:19, 20.) Taro poviše pričine edvaj adžikeraja i Spomen-svečenost. Te dikha nekobor lendar.

2. Kola tane nesave pričine soske edvaj adžikeraja i Spomen-svečenost?

² I Spomen-svečenost pomožinela amenge te razmislina bašo adava kobor tani važno i otkupnina hem te dikha ko save načinija šaj te sikava amari blagodarnost baši e Isuseskiri žrtva (2. Kor. 5:14, 15). Isto agjaar dela amen prilika „zaedno te ohrabrina amen“ amare phralencar hem phenjencar (Rim. 1:12). Sekova berš, but džene soj tane neaktivna avena ki Spomen-svečenost. Nesave lendar čak tane pottiknime te iranen pe ko Jehova adaleske so o javera ljubezno dodžakerena len. A but džene tane vooduševime taro adava so dikhena hem šunena ki Spomen hem adaleske mangena te proučinen i Biblija. Sa akava kerela i Spomen-svečenost te ovel amenge jekh posebno nastan!

3. Sar i Spomen kerela te ova ko jekhipe ko celo sveto? (Dikh hem i slika.)

³ Isto agjaar, razmislin ko savo način i Spomen-svečenost kerela te ova ko jekhipe amare phralencar hem phenjencar ko celo sveto. Džikote ko različna delija taro sveto o kham pohari perela, e Jehovaskere svedokija khedena pe te šaj te ikeren akava nastan. Hem sarine amen šunaja o isto govor  kote soj istaknimo kobor tani važno i otkupnina. Giljavaja duj falbena gilja, nakhavaja taro vas ko vas o maro hem i mol hem taro vilo vakeraja „amin“ ko štar molitve. Ko periodi taro 24 saatija, sa o sobranija kerena o ista bukja. Šaj li zamislinea tuke kobor but radujnena pe o Jehova hem o Isus keda sarine amen ki celi phuv falinaja len ko asavko način?

4. Bašo so ka kera lafi ki akaja statija?

⁴ Ki akaja statija, ka kera lafi bašo akala pučiba: Sar šaj te spremina amaro vilo baši Spomen-svečenost? Sar šaj te pomožina e javerenge te ovel len korist taro akava nastan? Hem sar šaj te pomožina okolenge so nane aktivna? O odgovorija ko akala pučiba ka pomožinen amenge te ova spremna bašo akava sveto nastan?

SAR ŠAJ TE SPREMINA AMARO VILO?

5. a) Soske valjani te razmislina kobor vredinela i otkupnina? (Psalm 49:7, 8). b) So sikliljan taro videoklipi Soske mulo o Isus?

⁵ Jekh taro najvažna načinija sar šaj te spremina amaro vilo tano agjaar so ka razmislina kobor vredinela e Isuseskiri otkupno žrtva. Amen korkori nikogaš našti sine te oslobodina amen taro grevo hem o meribe. (Čitin Psalm 49:7, 8; dikh hem o videoklipi Soske mulo o Isus?) a Adaleske o Jehova bičhalgja e Isuse te del plo životo amenge. Iako adava koštingja le but hem leskere mangle Čhave (Rim. 6:23). Kobor poviše razmislinaja baši žrtva so kergja amenge o Jehova hem o Isus doborom poviše ka cenina i otkupnina. Te razmislina samo bašo nekobor bukja kola so sikavena kobor koštingja i otkupnina e Jehova hem e Isuse. Prvo, te dikha soj tano vklučimo ki otkupnina.

6. So sine vklučimo ki otkupnina?

⁶ Otkupnina tani cena so platinela pe te šaj te iranel pe nešto. Keda sine stvorimo o prvo manuš, o Adam, sine le sovršeno životo. Ama keda grešingja, ov našavgja i prilika te živinel večno na samo ov nego hem leskere čhave da. Te šaj te iranel adava so Adam našavgja, o Isus dengja plo sovršeno životo sar žrtva. Džikote sine ki phuv, o Isus „na kergja ni jekh grevo, a ni na iklilo nesavo hovajbe taro leskoro muj“ (1. Pet. 2:22). Ov dži ko plo meribe ačhilo sovršeno, isto sar so sine o Adam angleder te grešinel. Adaleske, adalea so žrtvujngja plo životo, o Isus šaj sine te platinel i cena bašo životo so našavgja o Adam (1. Kor. 15:45; 1. Tim. 2:6).

7. Save predizvikija sine e Isuse džikote sine tele ki phuv?

⁷ Džikote sine ki phuv, o Isus sine poslušno e Jehovaske ko sa, čak keda sine ispitimi leskiri vera. Sar čhavo, o Isus mora sine te ovel poslušno ple nesovršeno roditelenge iako ov bijandilo sovršeno (Luka 2:51). Sar tinejdžeri ov valjani sine te borinel pe protiv o pritisok taro javera kola so šaj mangle te ovel neposlušno ple roditelenge ili te na ačhol verno e Jehovaske. A sar vozrasno, o Isus valjani sine te ačhol cvrsto keda o Satana iskušingja le, pa čak keda direktno vakergja leske te otkažinel pe tari pli vernost sprema o Devel (Mat. 4:1-11). O Satana sine odlučno te čhivel e Isuse te grešinel hem agjaar te našti te platinel i otkupnina.

8. Kola javera pharipa valjani sine o Isus te izdržinel?

⁸ Džikote trajnela sine leskiri služba tele ki phuv, o Isus mora sine te istrajnel ko javera da nevolje. Leskere dušmanja progoninena le sine hem mangle te mudaren le (Luka 4:28, 29; 13:31). Mora sine te trpinel  o slabostija ple sledbenikongere . Džikote trajnela sine o sudibe bašo leskoro životo, but sine maltretirimo hem asana sine leske. Palo adava, sine mudardo ko jekh ponižuvačko način hem trpingja bari dukh (Evr. 12:1-3). Keda sine ko stubo mučibaske, ov mora sine korkori te trpinel bare dukha, bizi e Jehovaskiri zaštita b (Mat. 27:46).

9. Sar osetinaja amen keda razmislinaja baši e Isuseskiri žrtva? (1. Petareskoro 1:8).

⁹ Akalestar šaj jasno te dikha kaj o Isus platingja bari cena baši otkupnina. Keda razmislinaja bašo žrtve so o Isus sine spremno te kerel amenge, amaro mangipe bajrola panda poviše sprema leste. (Čitin 1. Petareskoro 1:8.)

10. So sine spremno te trpinel o Jehova te šaj te del i otkupnina?

¹⁰ A so sine spremno te žrtvujnel o Jehova te šaj o Isus te platinel i otkupnina? E Jehova hem e Isuse isi len o najpaše odnos so šaj te postojnel maškar jekh dad hem čhavo (Izr. 8:30). Adaleske, zamislin samo sar osetingja pe o Jehova džikote dikhela sine sar o Isus mora te istrajnel ko sa adala nevolje so sine le ki phuv. Sigurno but dukhandilo le so dikhlja sar maltretirinena leskere Čhave hem sar mučinela pe.

11. Vaker primer kova so sikavela sar verojatno osetingja pe o Jehova keda o Isus sine mudardo.

¹¹ Sekova roditeli kastar so mulo čhavo but šukar džanela kobor but dukhala adava. Amen isi amen silno vera ko voskresenie, ama adava na cidela i dukh so isi amen keda merela amendar nekoj so mangaja le. Akava primer pomožinela amenge te haljova sar o Jehova verojatno osetingja pe keda ko 33 berš a.e. c dikhlja sar leskoro manglo Čhavo mučinela pe hem merela (Mat. 3:17).

12. So šaj te kera o kurke angleder i Spomen?

¹² Šaj te trudine tut taro akava periodi, pa dži ki Spomen ki tli lično studija ili ki Familijarno rat te proučine nešto poviše baši otkupnina. Šaj te koristine o Priračniko istražibaske e Jehovaskere svedokongoro ili javera publikacie te šaj te doznajne poviše detalija baši otkupnina. d Isto agjaar, trudin tut te ikere tut ko raspored čitibaske i Biblija baši Spomen-svečenost so arakhljola ko Amaro životo hem služba sar hristijanja — listija  spremibaske. Hem ko dive keda ikerela pe i Spomen, ma bistre te dikhe i posebno sabalutni programa. Keda spreminaja amaro vilo baši Spomen-svečenost, tegani ka šaj te pomožina e javerenge da te ovel len korist taro adava (Ezra 7:10).

POMOŽIN E JAVERENGE TE OVEL LEN KORIST

13. Koja tani i prvo buti te šaj te pomožine e javeren te ovel len korist tari Spomen?

¹³ Sar šaj te pomožina e javerenge te ovel len korist tari Spomen-svečenost? Džangjola pe, najangle valjani te kanina len. Osven so kaninaja e manušen ki služba, šaj isto agjaar te kera spisako te šaj te kanina okolen so pendžaraja. Na primer, nekas tari familija, kolegen, součenikon hem javeren. Čak ako nane amen dovolno pečatime pokane, šaj te bičhala lenge elektronsko pokana preku link. Šaj ka aven poviše džene taro adava so očekujngjem (Prop. 11:6).

14. Vaker primer so sikavela kobor tano važno lično te kanina nekas.

¹⁴ Ma bistre kaj but tano važno lično te kanine nekas ki Spomen-svečenost. Jekh phen, kolakoro rom nane Svedoko, sine iznenadimi keda vakergja lake kaj ka džal laja ki Spomen. Soske sine iznenadimi? Adaleske so oj beršencar angleder but puti pottikningja le te avel ki Spomen, ama ov nikogaš na alo. Soske lakoro rom akava puti odlučingja te avel? Ov vakergja: „Dobingjum pokana“, objasningja kaj jekh starešina kole so džanela le dengja le pokana. Hem ov na samo adava berš, nego but berša palo adava sine prisutno ki Spomen-svečenost.

15. So na valjani te bistra keda kaninaja e manušen ki Spomen?

¹⁵ Ma bistre kaj okolen so kaninaja len šaj ka ovel len pučiba — posebno ako nikogaš na sine ko amare sostanokija. Adaleske šukar ka ovel te razmislina hem te spremina amen bašo pučiba so šaj ka pučen amen (Kol. 4:6). Na primer, nesave šaj pučena pe: „So ka slučinel pe athe? Kobor ka trajnel? Sar valjani te urava amen? Dali valjani te platinav nešto angleder te khuvav? Dali khedela pe pare?“ Keda kaninaja nekas ki Spomen, šaj te  puča le: „Dali isi le nesave pučiba?“ hem tegani ka šaj te odgovorina leske. Šaj isto agjaar te sikava leske o videoklipija Setin tut ko e Isuseskoro meribe hem So kerela pe ki e Jehovaskere svedokongiri dvorana? Agjaar ka šaj te pomožina leske te haljovel so kerela pe ko amare sostanokija. A ki 28 lekcija taro lil Ov bahtalo zasekogaš, isi but šuže točke baši kolende so šaj te kera lafi.

16. So javer šaj te pučen okola so avena ki Spomen?

¹⁶ Otkeda ka završinel i Spomen-svečenost, e neven šaj ka ovel len javera da pučiba. Šaj te pučen pe, soske nikoj na lela taro simbolija, ili soske samo nekobor džene kergje adava. Isto agjaar, šaj ka pučen pe kobor puti ikeraja i Spomen. Ili šaj te pučen pe dali sa amare sostanokija ikerena pe ko isto način. Iako bašo but taro akala bukja kerela pe lafi ko govor so ikerela pe ki Spomen, e nevenge šaj ka valjani te objasninel pe nešto poviše. I statija tari amari internet-stranica jw.org Soske e Jehovaskere svedokija ikerena e Gospodareskiri večera pojaver taro javera religie? šaj te pomožinel amenge te odgovorina ko nesave taro lengere pučiba. Mangaja te da amendar sa te šaj angleder i Spomen-svečenost, džikote trajnela hem pali late, te pomožina okolenge so isi len „ispravno stavi“ te ovel len korist taro akava nastan (Apo. 13:48).

POMOŽIN OKOLENGE SOJ NEAKTIVNA

17. Sar šaj o starešine te pomožinen okolenge soj neaktivna? (Ezekiel 34:12, 16).

¹⁷ Sar šaj o starešine te pomožinen okolenge soj neaktivna ko periodi keda ikerela pe i Spomen-svečenost? Sikav kaj grižinea tut lenge. (Čitin Ezekiel 34: 13, 16.) Angleder i Spomen, trudin tut te javin tut kobor so šaj poviše dženenge. Uverin len kaj mangea len hem kaj mangea te pomožine lenge ko bilo savo način. Kanin len ki Spomen-svečenost hem ako avena, ljubezno dodžaker len. Pali Spomen, prodolžin te posetine akale mangle phralen hem phenjen ili te javine tut lenge. Hem pomožin lenge ko duhovno pogled te šaj te iranen pe ko Jehova (1. Pet. 2:25).

18. Sar šaj sarine te pomožina okolenge soj neaktivna? (Rimjanja 12:10).

 ¹⁸ Sarine taro sobranie šaj te pomožinen e neaktivnonge so ka aven ki Spomen. Sar? Agjaar so ka sikaven lenge mangipe, ka oven lencar ljubezna hem ka poštujnen len. (Čitin Rimjanja 12:10.) Ma bistre kaj akale bakhrenge šaj na sine lokho te aven ko sostanok. Šaj darana sine taro adava so ka vakeren o phralja hem o phenja. e Adaleske, ma puč len nešto kolea so ka čhive len ki nezgodno situacija, ili ma vaker nešto kolea so ka povredine len (1. Sol. 5:11). Ola tane amare phralja hem phenja. Radujnaja amen so šaj palem zaedno lencar te služina! (Ps. 119:176; Apo. 20:35).

19. Save koristija isi amen ako setinaja amen ko e Isuseskoro meribe?

¹⁹ Blagodarna siem so o Isus vakergja amenge te setina amen ko leskoro meribe sekova berš. Hem haljovaja soske adava tano važno. Keda siem prisutna ki Spomen-svečenost adava koristinela hem amenge hem e javerenge ko but načinija (Isa. 48:17, 18). Amaro mangipe sprema o Jehova hem o Isus bajrola. Sikavaja kobor ceninaja sa adava so kergje amenge. Ovaja popaše amare phralencar hem phenjencar. Hem šaj te pomožina e javerenge te dikhen sar šaj te uživinen ko blagoslovija so avena tari otkupnina. Adaleske, te kera sa so šaj te ova spremna baši Spomen-svečenost — o najvažno dive ko berš!